മെക്സിക്കോ സിറ്റി: ലോകകപ്പ് ഫുട്ബോളിലേക്ക് ഗംഭീര തിരിച്ചുവരവ് നടത്തി കൊളംബിയ. അരങ്ങേറ്റക്കാരായ ഉസ്ബെക്കിസ്ഥാനെ ഒന്നിനെതിരെ മൂന്ന് ഗോളുകള്ക്ക് പരാജയപ്പെടുത്തിയാണ് കൊളംബിയ തങ്ങളുടെ ഗ്രൂപ്പ് കെയിലെ ആദ്യ മത്സരത്തില് വിജയം സ്വന്തമാക്കിയത്. മുന് ലിവര്പൂള് താരം ലൂയിസ് ഡിയാസ്, ക്രിസ്റ്റല് പാലസ് പ്രതിരോധതാരം ഡാനിയല് മുനോസ് എന്നിവരാണ് കൊളംബിയക്കായി ഗോള് കണ്ടെത്തിയത്. 2022-ലെ ലോകകപ്പിന് യോഗ്യത നേടാനാവാതെ പോയ കൊളംബിയ, മെക്സിക്കോ സിറ്റിയിലെ എസ്റ്റാഡിയോ അസ്ടെകയില് നടന്ന മത്സരത്തില് തങ്ങളുടെ കരുത്തറിയിച്ചു.
ലൂയിസ് ഡിയാസ് നല്കിയ മനോഹരമായ പാസ് സ്വീകരിച്ച് ഡാനിയല് മുനോസ് തൊടുത്ത തകര്പ്പന് വോളിയിലൂടെ കൊളംബിയയാണ് ആദ്യം ലീഡ് നേടിയത്.
ഇറ്റലിയുടെ ലോകകപ്പ് ജേതാവായ ഫാബിയോ കന്നവാരോ പരിശീലിപ്പിക്കുന്ന ഉസ്ബെക്കിസ്ഥാന് 60-ാം മിനിറ്റില് തിരിച്ചടിച്ചു. ഗോള്കീപ്പര് കാമിലോ വര്ഗാസ് തടുത്തിട്ട പന്ത് ഹെഡറിലൂടെ വലയിലാക്കി അബ്ബോസ്ബെക്ക് ഫൈസുല്ലയേവാണ് അവര്ക്ക് സമനില നേടിക്കൊടുത്തത്.
സമനിലയ്ക്ക് പിന്നാലെ ആക്രമണം ശക്തമാക്കിയ കൊളംബിയ ലൂയിസ് ഡിയാസിലൂടെ വീണ്ടും മുന്നിലെത്തി. ഉസ്ബെക്കിസ്ഥാന് ഗോള്കീപ്പര് ഉത്കിര് യൂസുപോവ് പന്തില് കൈ വെച്ചെങ്കിലും ഗോളാകുന്നത് തടയാനായില്ല. 90-ാം മിനിറ്റില് അക്മല് മൊസ്ഗോവോയ് ഉസ്ബെക്കിസ്ഥാന് സമനില നേടിക്കൊടുക്കാന് ശ്രമിച്ചെങ്കിലും പന്ത് ലക്ഷ്യം തെറ്റി പുറത്തേക്ക് പോയി. തൊട്ടുപിന്നാലെ പകരക്കാരനായി ഇറങ്ങിയ ജാമിന്റണ് കാമ്പാസ് ഹെഡറിലൂടെ മൂന്നാം ഗോളും നേടി കൊളംബിയയുടെ ജയം ഉറപ്പിച്ചു.
2024-25 സീസണില് ലിവര്പൂളിനൊപ്പം പ്രീമിയര് ലീഗ് കിരീടം ചൂടിയ ശേഷം കഴിഞ്ഞ വേനല്ക്കാലത്ത് 65.5 ദശലക്ഷം പൗണ്ടിനാണ് ലൂയിസ് ഡിയാസ് ബയേണ് മ്യൂണിക്കിലേക്ക് മാറിയത്. ബയേണിനായി മികച്ച പ്രകടനം കാഴ്ചവെക്കുന്ന താരം, ഈ ലോകകപ്പിലെ തന്റെ ആദ്യ ഗോളാണ് ഇതിലൂടെ സ്വന്തമാക്കിയത്.
