കവരത്തി: ലക്ഷദ്വീപില്‍ പുതുതായി നടപ്പിലാക്കിയ 'ലക്ഷദ്വീപ് എക്‌സൈസ് റെഗുലേഷന്‍, 2026' പിന്‍വലിക്കണമെന്ന ആവശ്യവുമായി ലക്ഷദ്വീപ് എംപി മുഹമ്മദ് ഹംദുള്ള സഈദ്. ഇന്ത്യന്‍ ഭരണഘടനയുടെ 240-ാം അനുച്ഛേദപ്രകാരം പുറപ്പെടുവിച്ച ഈ റെഗുലേഷന്‍ പുനഃപരിശോധിക്കണമെന്നാവശ്യപ്പെട്ട് അദ്ദേഹം രാഷ്ട്രപതിക്ക് കത്തയത്തു, ദ്വീപിലെ ജനങ്ങളുടെ വികാരങ്ങളെ മാനിക്കാതെയും, പ്രാദേശിക സമൂഹവുമായി അര്‍ത്ഥവത്തായ ചര്‍ച്ചകളോ പൊതുതെളിവെടുപ്പോ നടത്താതെയുമാണ് നിയമം നടപ്പിലാക്കിയതെന്ന് എംപി കത്തില്‍ ചൂണ്ടിക്കാട്ടി.

മദ്യപാനത്തെ പരമ്പരാഗതമായി നിരുത്സാഹപ്പെടുത്തുന്ന, തനതായ സാംസ്‌കാരിക-സാമൂഹിക പശ്ചാത്തലമുള്ള പട്ടികവര്‍ഗ സമൂഹമാണ് ലക്ഷദ്വീപിലേത്. 1979-ലെ ലക്ഷദ്വീപ് മദ്യനിരോധന നിയമം കഴിഞ്ഞ 46 വര്‍ഷമായി ദ്വീപിലെ സാമൂഹിക ഭദ്രതയും പൊതുജനാരോഗ്യവും സംരക്ഷിക്കുന്നതില്‍ വിജയിച്ചിട്ടുണ്ട്. മദ്യപാനം പോലുള്ള ആരോഗ്യത്തിന് ഹാനികരമായ കാര്യങ്ങള്‍ നിരോധിക്കാന്‍ പ്രേരിപ്പിക്കുന്ന ഇന്ത്യന്‍ ഭരണഘടനയുടെ 47-ാം അനുച്ഛേദത്തിന് വിരുദ്ധമാണ് ഈ പുതിയ റെഗുലേഷന്‍. ഇന്ത്യയിലെ ഏറ്റവും സമാധാനപരമായ പ്രദേശങ്ങളിലൊന്നായ ലക്ഷദ്വീപിലെ ക്രമസമാധാന നിലയെയും കുടുംബമൂല്യങ്ങളെയും ഈ നിയമം അപകടത്തിലാക്കും. കൂടാതെ, മദ്യലഭ്യത വര്‍ദ്ധിക്കുന്നത് സ്ത്രീകള്‍ക്കും കുട്ടികള്‍ക്കും യുവാക്കള്‍ക്കും വലിയ സാമൂഹിക-ആരോഗ്യ ഭീഷണിയാകുമെന്നും കത്തില്‍ പറഞ്ഞു.

നിലവിലുള്ള ലക്ഷദ്വീപ് ടൂറിസം പോളിസി 2020-ലോ, ടൂറിസം പെര്‍സ്‌പെക്ടീവ് പ്ലാനിലോ, ഇന്റഗ്രേറ്റഡ് ഐലന്‍ഡ് മാനേജ്മെന്റ് പ്ലാനിലോ ടൂറിസത്തിന് മദ്യം അനിവാര്യമാണെന്ന് എവിടെയും പരാമര്‍ശിക്കുന്നില്ലെന്നും അതീവ പരിസ്ഥിതി ലോലമായ ദ്വീപ് മേഖലയില്‍ സുസ്ഥിര വികസനത്തിന് ഈ റെഗുലേഷന്‍ വെല്ലുവിളിയാകുമെന്നും അദ്ദേഹം ചൂണ്ടിക്കാട്ടി. ജസ്റ്റിസ് ആര്‍.വി. രവീന്ദ്രന്‍ കമ്മിറ്റിയുടെ ശുപാര്‍ശകളെയും തദ്ദേശീയരുടെ അഭിപ്രായങ്ങളെയും മാനിക്കാതെ നടപ്പിലാക്കിയ ഈ നിയമം എത്രയും വേഗം പിന്‍വലിക്കണമെന്നാണ് എംപി ആവശ്യപ്പെട്ടു.