ടെഹ്റാന്‍: കരിമ്പടമണിഞ്ഞ ലക്ഷക്കണക്കിന് ജനങ്ങള്‍, ആകാശംമുട്ടെ ഉയര്‍ന്ന വന്‍ചിത്രങ്ങള്‍, പ്രാര്‍ത്ഥനാ ഹാളുകളില്‍ അലയടിക്കുന്ന വിലാപഗീതങ്ങള്‍... ഇറാന്‍ പരമോന്നത നേതാവ് ആയത്തുള്ള അലി ഖാംഇനയുടെ വിലാപയാത്രയും ഔദ്യോഗിക ചടങ്ങുകളും ലോകം ഉറ്റുനോക്കുമ്പോള്‍, അവിടെ ഉയര്‍ന്നുകേട്ട രാഷ്ട്രീയ മുദ്രാവാക്യങ്ങളെക്കാളും പ്രകടിപ്പിക്കപ്പെട്ട ഭരണകൂട കരുത്തിനേക്കാളും ലോകത്തിന്റെ നെഞ്ചുപൊള്ളിക്കുന്നത് ഒരൊറ്റ കാഴ്ചയാണ്ഖാനഊയുടെ പേരക്കുട്ടി സഹ്റ മുഹമ്മദി ഗോല്‍പയേഗാനിയുടെ ആ കുഞ്ഞുപെട്ടി!

യുഎസിന്റെയും ഇസ്രായേലിന്റെയും വ്യോമാക്രമണത്തില്‍ ഖാംനഇക്കൊപ്പം കൊല്ലപ്പെട്ട കുടുംബാംഗങ്ങളില്‍ 14 മാസം മാത്രം പ്രായമുള്ള ഈ കുഞ്ഞും ഉണ്ടായിരുന്നു. ഖാംനഇയുടെയും മറ്റ് മുതിര്‍ന്ന നേതാക്കളുടെയും പെട്ടികള്‍ക്കൊപ്പം വെച്ചിരിക്കുന്ന ആ ചെറിയ പെട്ടി, ഇറാന്‍ ആചരിക്കുന്ന ഒരാഴ്ചത്തെ ദുഃഖാചരണത്തിലെ ഏറ്റവും വലിയ വിങ്ങലായി മാറിയിരിക്കുകയാണ്.

ഭരണകൂടത്തിന്റെ കരുത്തും വിപ്ലവവീര്യവും ദേശീയ ഐക്യവും വിളിച്ചോതാന്‍ കൃത്യമായി ആസൂത്രണം ചെയ്തതായിരുന്നു ഈ ചടങ്ങുകളെങ്കിലും, ആ കുഞ്ഞുപെട്ടി പ്രൗഢഗംഭീരമായ ആ ചടങ്ങിനെ ഒരു കുടുംബത്തിന്റെ ആഴത്തിലുള്ള വ്യക്തിപരമായ ദുരന്തമാക്കി മാറ്റി. ഭൂമിയിലെ ഏതൊരു മനുഷ്യനും തിരിച്ചറിയാന്‍ കഴിയുന്ന, ഒരു കുഞ്ഞിനെ നഷ്ടപ്പെട്ട കുടുംബത്തിന്റെ ആരും തകര്‍ന്നുപോകുന്ന വേദനയായി അത് മാറി.

സൈനിക ബഹുമതികളും മതപരമായ ആചാരങ്ങളും രാഷ്ട്രീയ പ്രതീകങ്ങളും നിറഞ്ഞ ഒരു ചടങ്ങില്‍, ഒരു പിഞ്ചുകുഞ്ഞിന്റെ അവസാന യാത്രയുടെ ചിത്രമാണ് എല്ലാവരുടെയും ശ്രദ്ധ കവര്‍ന്നത്. ഇതോടെ ചര്‍ച്ചകള്‍ അന്താരാഷ്ട്ര രാഷ്ട്രീയത്തില്‍ നിന്നും മനുഷ്യന്റെ നിസ്സഹായാവസ്ഥയിലേക്കും നഷ്ടങ്ങളിലേക്കും വഴിമാറി.