ബെയ്റൂട്ട്: ലോകകപ്പ് ചരിത്രത്തില് ആദ്യമായി പ്രീക്വാര്ട്ടര് പ്രവേശനം ഉറപ്പിച്ച ഈജിപ്ഷ്യന് ടീമിനൊപ്പം ചരിത്രം കുറിച്ച പരിശീലകന് ഹൊസാം ഹസ്സന്, വിജയാഘോഷത്തിനിടെ ഫലസ്തീന് പതാകയേന്തി ശ്രദ്ധേയനായി. വെള്ളിയാഴ്ച ഡാലസ് സ്റ്റേഡിയത്തില് നടന്ന ലോകകപ്പ് റൗണ്ട് ഓഫ് 32 മത്സരത്തില് ഓസ്ട്രേലിയയെ പെനാല്റ്റി ഷൂട്ടൗട്ടില് പരാജയപ്പെടുത്തിയതിന് പിന്നാലെയായിരുന്നു പരിശീലകന് ഫലസ്തീന് പതാകയുമായി മൈതാനത്തിറങ്ങി വിജയം ആഘോഷിച്ചത്.
ഈജിപ്തിന്റെയും പലസ്തീന്റെയും പതാകകളുമായി ഹസ്സന് മൈതാനത്ത് ആഘോഷിക്കുന്ന ദൃശ്യങ്ങള് സമൂഹമാധ്യമങ്ങളില് വൈറലായി. 'എന്റെ ഹൃദയവും ആത്മാവും പലസ്തീനിലെ നല്ലവരായ ജനങ്ങള്ക്കൊപ്പമാണ്. ഞങ്ങളുടെ വിജയത്തില് സന്തോഷിക്കുന്ന അവരോട് വലിയ നന്ദിയുണ്ട്. ദൈവം അവരെ അനുഗ്രഹിക്കട്ടെ, അവരുടെ രക്തസാക്ഷികളുടെ ആത്മാവിന് ശാന്തി നല്കട്ടെ. ഈ വിജയം ഈജിപ്തിലെയും ഫലസ്തീനിലെയും ജനങ്ങള്ക്ക് സമര്പ്പിക്കുന്നു,' മത്സരശേഷം ഹസ്സന് പ്രതികരിച്ചു.
എക്സില് ആയിരക്കണക്കിന് ആളുകള് പങ്കുവെച്ച 28 സെക്കന്ഡ് ദൈര്ഘ്യമുള്ള വീഡിയോയില്, ഇറ്റലിയില് നടന്ന 1990-ലെ ലോകകപ്പില് ഈജിപ്തിനായി ബൂട്ടണിഞ്ഞ മുന് സ്ട്രൈക്കര് കൂടിയായ ഹസ്സന് പലസ്തീന് പതാക വീശുന്നതും, സ്റ്റേഡിയത്തിലെ കാണികള് 'ഫ്രീ ഫലസ്തീന്' എന്ന് ആര്പ്പുവിളിക്കുന്നതും കാണാം.
ഈജിപ്തിന്റെ ചരിത്രവിജയം ഗസ്സയിലെ ജനങ്ങള് വലിയ ആവേശത്തോടെയാണ് ആഘോഷിച്ചത്. പ്രീക്വാര്ട്ടറില് ലയണല് മെസ്സിയുടെ അര്ജന്റീനയുമായാണ് ഈജിപ്തിന്റെ അടുത്ത പോരാട്ടം.
Related News
