റിയാദ്: പ്രവാസജീവിതം അവസാനിപ്പിച്ച് നാട്ടിലേക്ക് മടങ്ങുന്ന സാമുഹ്യപ്രവര്ത്തകന്നും സൗഹൃദ വേദിയുടെ സജീവ സാന്നിധ്യവുമായ കളപറമ്പില് പങ്കജാക്ഷന് തൃശൂര് ജില്ലാ സൗഹൃദവേദിയുടെ ആഭിമുഖ്യത്തില് യാത്രയയപ്പ് നല്കി. സൗഹൃദവേദി പ്രസിഡന്റ് ഷാഹിദ് അറക്കല് അധ്യക്ഷത വഹിച്ചു. ജനറല് സെക്രട്ടറി സൂരജ് കുമാര് സ്വാഗതം ആശംസിച്ചു.
കഴിഞ്ഞ മുപ്പത് വര്ഷമായി വിവിധ മേഖലകളില് സജീവ സാന്നിധ്യ മായിരുന്ന പങ്കജാക്ഷന്റെ പ്രവാസിയാത്രയിലെ സേവനങ്ങളെയും സൗഹൃദവലയത്തെയും ചടങ്ങില് പങ്കെടുത്തവര് അനുസ്മരിച്ചു. നാട്ടിലെ പുതിയ ജീവിതത്തോടൊപ്പം എല്ലാവിധ നന്മകളും ആശംസിക്കുന്നതായി ചടങ്ങില് സംസാരിച്ച ഭാരവാഹികള് പറഞ്ഞു. ആശംസകള് അര്പ്പിച്ചുകൊണ്ട് എഫ്.എസ്.എസ് ചെയര്മാന് കൃഷ്ണകുമാര് സി.വി, മെമ്പര്ഷിപ്പ് കോര്ഡിനേറ്റര് ശരത് ജോഷി, ഫിനാന്ഷ്യല് കണ്ട്രോളര് രാജീവ് വാര്യര്, പ്രോഗ്രാം കോര്ഡിനേറ്റര് സുരേഷ് തിരുവില്ല്വാമല, മീഡിയ കണ്വീനര് ജയന് കൊടുങ്ങല്ലൂര് എന്നിവര് സംസാരിച്ചു. സംഘടനയുടെ സ്നേഹോപഹാരം ചടങ്ങില് വെച്ച് പ്രസിഡണ്ടും ഭാരവാഹികളും ചേര്ന്ന് കൈമാറി.. തനിക്ക് ലഭിച്ച സ്നേഹത്തിനും ആദരവിനും പങ്കജാക്ഷന് നന്ദി രേഖപ്പെടുത്തി. സൗഹൃദ വേദിയുടെ നാട്ടിലെ പ്രവര്ത്തനങ്ങളില് സജീവമായി ഉണ്ടാകുമെന്നും അദ്ദേഹം പറഞ്ഞു.ട്രഷറര് നമസ്തേ സന്തോഷ് നന്ദി പറഞ്ഞു.
തൃശ്ശൂര് ചുവന്നമണ്ണ് സ്വദേശിയായ പങ്കജാക്ഷന് റിയാദിലെ ഒരു സ്വകാര്യകമ്പനിയിലാണ് ജോലി ചെയ്തിരുന്നത്. കണ്ടന്കുട്ടി വത്സല ദമ്പതികളുടെ മകനാണ്. ഭാര്യ അനിത. മക്കള്: അമൃത, അംഗിത.
Related News
