റിയാദ്- സൗദി അറേബ്യയിലെ 13 പ്രവിശ്യാ കൗണ്സിലുകളുടെ എട്ടാം ടേമിലേക്കുള്ള പുതിയ അംഗങ്ങളുടെ നിയമനത്തിന് അംഗീകാരം നല്കി രാജകീയ ഉത്തരവ് പുറത്തിറങ്ങി. നാല് വര്ഷ കാലാവധിയുള്ളതാണ് ഈ പുതിയ സമിതി. രാജ്യത്തെ വിവിധ പ്രവിശ്യകളുടെ വികസന കുതിപ്പിന് കരുത്തുപകരുന്ന പ്രധാന സമിതികളിലൊന്നാണ് ഈ റീജിയണല് കൗണ്സിലുകള്.
കഴിഞ്ഞ മുപ്പത് വര്ഷമായി രാജ്യത്തിന്റെ വികസന വഴിയില് നിര്ണായക സാന്നിധ്യമാണ് ഈ കൗണ്സിലുകള്. ആഭ്യന്തര മന്ത്രിയുടെ മേല്നോട്ടത്തിലും പ്രവിശ്യാ ഗവര്ണര്മാരുടെ കൃത്യമായ മാര്ഗനിര്ദേശത്തിലുമാണ് ഇവ പ്രവര്ത്തിക്കുന്നത്. സ്വദേശികളുടെ കഴിവുകള് പരമാവധി പ്രയോജനപ്പെടുത്താനും, വിവിധ സര്ക്കാര് വകുപ്പുകള് തമ്മിലുള്ള ഏകോപനം മെച്ചപ്പെടുത്തി സമഗ്ര വികസനം സാധ്യമാക്കാനും കൗണ്സിലുകള് വഴി സാധിക്കുന്നു.
ഉത്തരവ് പുറത്തുവന്ന പശ്ചാത്തലത്തില്, സല്മാന് രാജാവിനും കിരീടാവകാശിയും പ്രധാനമന്ത്രിയുമായ മുഹമ്മദ് ബിന് സല്മാന് രാജകുമാരനും ആഭ്യന്തര മന്ത്രി അബ്ദുല് അസീസ് ബിന് സൗദ് രാജകുമാരന് നന്ദി അറിയിച്ചു. ഭരണകൂടം പ്രവിശ്യാ കൗണ്സിലുകള്ക്ക് നല്കുന്ന മികച്ച പിന്തുണയുടെ തെളിവാണിതെന്നും, സൗദി വിഷന് 2030-ന്റെ ലക്ഷ്യങ്ങള് കൈവരിക്കുന്നതില് ഈ തീരുമാനം വലിയ പങ്കുവഹിക്കുമെന്നും അദ്ദേഹം വ്യക്തമാക്കി.
കഴിഞ്ഞ 30 വര്ഷമായി പ്രാദേശിക വികസനത്തിലും സേവന ഏകോപനത്തിലും സജീവമായിരുന്ന കൗണ്സിലുകള്, പുതിയ എട്ടാം ഘട്ടത്തിലും അതേ കാര്യക്ഷമതയോടെ മുന്നോട്ടുപോകുമെന്ന് അദ്ദേഹം കൂട്ടിച്ചേര്ത്തു. സ്വദേശി പ്രതിഭകളുടെ സേവനം ഉറപ്പാക്കി പൗരന്മാര്ക്കും രാജ്യത്ത് താമസിക്കുന്നവര്ക്കും ലഭിക്കുന്ന സേവനങ്ങളുടെ ഗുണനിലവാരം വര്ധിപ്പിക്കുകയാണ് ഇതിലൂടെ ലക്ഷ്യമിടുന്നത്.
.jpg)
Related News
