ജിദ്ദ: പതിറ്റാണ്ടുകാലത്തെ പ്രവാസം അവസാനിപ്പിച്ച് തൊഴില്‍ ആവശ്യത്തിനായി യൂറോപ്പിലേക്ക് പോകുന്ന മുരളീധരന് ജിദ്ദ നവോദയ ബവാദി ഏരിയ കമ്മിറ്റി യാത്രയയപ്പ് നല്‍കി. കഴിഞ്ഞ ഒരു പതിറ്റാണ്ടായി സംഘടനയുടെ സജീവ ഭാരവാഹിയും പ്രവര്‍ത്തകനുമായിരുന്നു അദ്ദേഹം.

ജിദ്ദ നവോദയ ഓഫീസില്‍ സംഘടിപ്പിച്ച യാത്രയയപ്പ് യോഗത്തില്‍ സജീവന്‍ മാവൂര്‍ അധ്യക്ഷത വഹിച്ചു. ജിദ്ദ നവോദയ പ്രസിഡന്റ് കിസ്മത്ത് മമ്പാട് ഉദ്ഘാടനം ചെയ്തു. ജിദ്ദ നവോദയ ജനറല്‍ സെക്രട്ടറി ശ്രീകുമാര്‍ മാവേലിക്കര മുരളീധരന് ഏരിയ കമ്മിറ്റിയുടെ ഉപഹാരം സമ്മാനിച്ചു.

സംഘടനാ പ്രവര്‍ത്തനങ്ങളില്‍ മുരളീധരന്‍ പുലര്‍ത്തിയ പ്രതിബദ്ധതയും ആത്മാര്‍ത്ഥതയും യോഗം പ്രശംസിച്ചു. അദ്ദേഹത്തിന്റെ പുതിയ തൊഴില്‍മേഖലയ്ക്കും ജീവിതത്തിനും ചടങ്ങില്‍ സംസാരിച്ചവര്‍ ആശംസകള്‍ നേര്‍ന്നു. കെ.വി. മൊയ്തീന്‍, റഫീഖ് മമ്പാട്, രതീഷ് പൊന്നാനി എന്നിവര്‍ ആശംസാ പ്രസംഗം നടത്തി.

ജിദ്ദയിലെ പ്രവാസജീവിതവും സംഘടനയും നല്‍കിയ ഊഷ്മളമായ സൗഹൃദങ്ങള്‍ക്ക് മുരളീധരന്‍ മറുപടി പ്രസംഗത്തില്‍ നന്ദി അറിയിച്ചു. ഹുസൈന്‍ സ്വാഗതവും കുടുംബവേദി കണ്‍വീനര്‍ രമ്യ ലക്ഷ്മി നന്ദിയും പറഞ്ഞു.

ചിത്രം: ജിദ്ദ നവോദയ ജനറല്‍ സെക്രട്ടറി ശ്രീകുമാര്‍ മാവേലിക്കര മുരളീധരന് ഉപഹാരം നല്‍കുന്നു.