കൊച്ചി: നീറ്റ് പരീക്ഷാ ക്രമക്കേടിനെതിരെ ഡല്ഹി ജന്തര്മന്തറില് സമരം ചെയ്ത വിദ്യാര്ഥികളെയും സമരത്തില് പങ്കെടുത്ത സ്ത്രീകളെയും അധിക്ഷേപിച്ച് വിവാദ പരാമര്ശങ്ങള് നടത്തിയ ആര്എസ്എസ് സൈദ്ധാന്തികന് ടി.ജി. മോഹന്ദാസിന്റെ കൊച്ചിയിലെ വീട്ടില് പൊലീസ് പരിശോധന. തിരുവനന്തപുരത്തു നിന്നെത്തിയ സൈബര് പൊലീസ് സംഘമാണ് കൊച്ചി മട്ടാഞ്ചേരിയിലെ വീട്ടില് പരിശോധന നടത്തിയത്.
ടി.ജി. മോഹന്ദാസിന്റെ മൊഴിയെടുക്കാനാണോ അതോ അറസ്റ്റ് രേഖപ്പെടുത്താനാണോ പൊലീസ് എത്തിയതെന്ന കാര്യത്തില് ഔദ്യോഗിക സ്ഥിരീകരണമില്ല. ജൂലൈ 29-നാണ് കലാപാഹ്വാനം നടത്തിയതിന് ഇയാള്ക്കെതിരെ തിരുവനന്തപുരം സൈബര് പൊലീസ് കേസെടുത്തത്. കേസ് രജിസ്റ്റര് ചെയ്ത് പത്ത് ദിവസത്തോളമായിട്ടും യാതൊരു നടപടിയും ഉണ്ടാകാത്തത് വലിയ വിമര്ശനങ്ങള്ക്ക് കാരണമായിരുന്നു. ഇതിനിടയിലാണ് ഇപ്പോള് പൊലീസിന്റെ ഭാഗത്തുനിന്നും നിര്ണായക നീക്കമുണ്ടായിരിക്കുന്നത്.
ഡല്ഹിയിലെ സമരക്കാര്ക്കെതിരെ പ്രകോപനപരമായ രീതിയിലായിരുന്നു ടി.ജി. മോഹന്ദാസിന്റെ വാക്കുകള്. തനിക്ക് അവസരം ലഭിച്ചിരുന്നെങ്കില് സമരം ചെയ്യുന്നവരെ വെടിവച്ചുകൊല്ലുമായിരുന്നു എന്നായിരുന്നു ഇയാളുടെ പരാമര്ശം. ''ജന്തര്മന്തര് പരിസരത്ത് നാല് സ്ക്വയര് കിലോമീറ്റര് പരിസരത്ത് കര്ഫ്യൂ പ്രഖ്യാപിക്കും. ആളുകളോട് പിരിഞ്ഞുപോകാന് മൂന്ന് തവണ ആവശ്യപ്പെടും. പിന്നെ വെടിവയ്ക്കും. ആളുകള് ചിതറിയോടും, കുറേപ്പേര് മരിക്കും, കുറേപ്പേര് മരിക്കില്ല... കുറേപ്പേര്ക്ക് അംഗഭംഗം സംഭവിക്കും... ഏകദേശം ഒരു നാല് മണിക്കൂര് കൊണ്ട് രംഗം ശാന്തമാകും. ശവങ്ങള് പെറുക്കി ആശുപത്രിയിലെത്തിക്കും'' - എന്നായിരുന്നു മോഹന്ദാസിന്റെ വാക്കുകള്. ഇതിനുപുറമെ, സമരത്തില് പങ്കെടുത്ത സ്ത്രീകളെ സാമൂഹ്യ മാധ്യമങ്ങള് വഴി അധിക്ഷേപിക്കുന്ന തരത്തിലുള്ള പരാമര്ശങ്ങളും ഇയാള് നടത്തിയിരുന്നു. ഈ വിവാദ പരാമര്ശങ്ങളടങ്ങിയ വിഡിയോ കൂടുതല് വിമര്ശനങ്ങള്ക്ക് വഴിവെച്ചിട്ടും യൂട്യൂബില് നിന്ന് നീക്കം ചെയ്തിരുന്നില്ല.
മറ്റു ചില കേസുകളില് പ്രതികള് വേഗത്തില് അറസ്റ്റിലായപ്പോള്, ടി.ജി. മോഹന്ദാസിനെതിരെ നടപടി വൈകുന്നതിനെതിരെ സമൂഹമാധ്യമങ്ങളിലും രാഷ്ട്രീയ രംഗത്തും ശക്തമായ പ്രതിഷേധം ഉയര്ന്നിരുന്നു. ഡെപ്യൂട്ടി സ്പീക്കര് ഷാനിമോള് ഉസ്മാന് ഉള്പ്പെടെയുള്ള പ്രമുഖര് പൊലീസിന്റെ നിഷ്ക്രിയത്വത്തെ പരസ്യമായി ചോദ്യം ചെയ്തിരുന്നു. ഈ സാഹചര്യത്തിലാണ് വ്യാപകമായ വിമര്ശനങ്ങള്ക്കൊടുവില് സൈബര് പൊലീസ് സംഘം ടി.ജി. മോഹന്ദാസിന്റെ വീട്ടിലെത്തി പരിശോധന ആരംഭിച്ചിരിക്കുന്നത്.
Related News
