റിയാദ്: കഴിഞ്ഞ ആറു വര്‍ഷത്തിനിടെ അന്താരാഷ്ട്ര വിനോദസഞ്ചാര മേഖലയില്‍ ചരിത്രപരമായ കുതിച്ചുചാട്ടവുമായി സൗദി അറേബ്യ. രാജ്യത്തെത്തുന്ന വിദേശ വിനോദസഞ്ചാരികളുടെ എണ്ണത്തില്‍ 67 ശതമാനത്തിനടുത്ത് വര്‍ദ്ധനവ് രേഖപ്പെടുത്തിയതായി ഓര്‍ഗനൈസേഷന്‍ ഫോര്‍ ഇക്കണോമിക് കോ-ഓപ്പറേഷന്‍ ആന്‍ഡ് ഡെവലപ്മെന്റിന്റെ ഏറ്റവും പുതിയ റിപ്പോര്‍ട്ട് വ്യക്തമാക്കുന്നു. 2019-ല്‍ 1.75 കോടിയായിരുന്ന (17.5 ദശലക്ഷം) വിദേശ സഞ്ചാരികളുടെ എണ്ണം 2025-ഓടെ 2.93 കോടിയായാണ് (29.3 ദശലക്ഷം) ഉയര്‍ന്നത്.

പാരിസ് ആസ്ഥാനമായി പ്രവര്‍ത്തിക്കുന്ന ഒ.ഇ.സി.ഡിയുടെ 'ടൂറിസം ട്രെന്‍ഡ്‌സ് ആന്‍ഡ് പോളിസീസ് 2026' റിപ്പോര്‍ട്ട് പ്രകാരം, കോവിഡ് മഹാമാരിക്ക് മുമ്പുള്ള കണക്കുകളെ അപേക്ഷിച്ച് ലോകത്ത് ഏറ്റവും ഉയര്‍ന്ന വിനോദസഞ്ചാര വളര്‍ച്ചാ നിരക്ക് രേഖപ്പെടുത്തിയ രാജ്യങ്ങളുടെ പട്ടികയില്‍ സൗദി അറേബ്യ ഒന്നാമതെത്തി. ലോകത്തെ പ്രമുഖ വിനോദസഞ്ചാര കേന്ദ്രങ്ങളെയെല്ലാം പിന്നിലാക്കിയാണ് സൗദിയുടെ ഈ മുന്നേറ്റം.

പ്രധാന രാജ്യങ്ങളിലെ വിനോദസഞ്ചാര വളര്‍ച്ചാ നിരക്ക് (20192025):

സൗദി അറേബ്യ: 67%

മൊറോക്കോ: 53%

ഈജിപ്ത്: 47%

ബ്രസീല്‍: 46%

കൊളംബിയ: 45%

ജപ്പാന്‍: 34%

ചിലി: 33%

നോര്‍വേ: 28%


2025-ല്‍ സൗദിയില്‍ 2.93 കോടി അന്താരാഷ്ട്ര വിനോദസഞ്ചാരികള്‍ എത്തി. 2024-ലെ 2.97 കോടിയെ അപേക്ഷിച്ച് 1.6 ശതമാനത്തിന്റെ നിസ്സാര കുറവുണ്ടായെങ്കിലും, മഹാമാരിക്ക് മുമ്പുള്ള 2019-ലെ നിരക്കിനേക്കാള്‍ മൂന്നില്‍ രണ്ട് പങ്ക് ഉയര്‍ന്ന നിലവാരം നിലനിര്‍ത്താന്‍ സൗദിക്കായി. അതേസമയം, പ്രമുഖ ആഗോള വിപണികളില്‍ പലതും കോവിഡിന് മുമ്പുള്ള നിലയിലേക്ക് തിരിച്ചെത്താന്‍ ഇപ്പോഴും പാടുപെടുകയാണ്. ഉദാഹരണത്തിന്, 2025-ല്‍ 6.83 കോടി വിദേശ സഞ്ചാരികളെ സ്വീകരിച്ച അമേരിക്കയ്ക്ക് 2019-ലെ കണക്കിന്റെ 86 ശതമാനത്തില്‍ മാത്രമാണ് എത്താനായത്.