ഗാസ: യുദ്ധക്കെടുതികള്ക്കിടയിലും കുട്ടികളുടെ വിദ്യാഭ്യാസം പുനരാരംഭിക്കാന് ലക്ഷ്യമിട്ട് സൗദി അറേബ്യയുടെ പിന്തുണയോടെ തെക്കന് ഗാസയില് ആരംഭിച്ച 'മക്ക സ്കൂളിലേക്ക്' വിദ്യാര്ത്ഥികള്ക്കായുള്ള രജിസ്ട്രേഷന് ആരംഭിച്ചതായി സൗദി പ്രസ് ഏജന്സി റിപ്പോര്ട്ട് ചെയ്തു.
സൗദി അറേബ്യയുടെ ജീവകാരുണ്യ ഏജന്സി കെ.എസ് റിലീഫ് നല്കുന്ന സഹായത്തോടെയാണ് ഫലസ്തീന് കുട്ടികള്ക്കായി സുരക്ഷിത പഠനകേന്ദ്രങ്ങള് സ്ഥാപിക്കുന്ന ഈ പദ്ധതി നടപ്പിലാക്കുന്നത്. ഗാസയിലെ നടപ്പാക്കല് പങ്കാളിയായ സൗദി സെന്റര് ഫോര് കള്ച്ചര് ആന്ഡ് ഹെറിറ്റേജിലെ വിദഗ്ധ സംഘം അപേക്ഷകള് സ്വീകരിക്കുന്ന നടപടികള് ആരംഭിച്ചു കഴിഞ്ഞു.
32 അധ്യാപകരുമായി പ്രാഥമികമായി 1,000 പെണ്കുട്ടികള്ക്കും ആണ്കുട്ടികള്ക്കും പഠിക്കാനുള്ള സൗകര്യത്തോടെയാണ് സ്കൂളിന്റെ പ്രവര്ത്തനം ആരംഭിക്കുന്നത്. ഭാവിയില് ഇത് 4,000 വിദ്യാര്ത്ഥികള്ക്കായി വിപുലീകരിക്കാനാണ് പദ്ധതി. യുദ്ധമൂലം പൂര്ണ്ണമായി തകര്ന്ന ഗാസയിലെ വിദ്യാഭ്യാസ മേഖലയുടെ പുനരുദ്ധാരണത്തിനായുള്ള നിര്ണ്ണായക ചുവടുവെപ്പാണിതെന്ന് ഈസ്റ്റേണ് ഖാന് യൂനിസിലെ വിദ്യാഭ്യാസ ഡയറക്ടര് ഇബ്രാഹിം റമദാന് വ്യക്തമാക്കി.
വിദ്യാഭ്യാസ മേഖലക്ക് പുറമെ ഗാസയില് ഭക്ഷണവും മറ്റ് അടിയന്തര മാനുഷിക സഹായങ്ങളും കെ.എസ്. റിലീഫ് നല്കുന്നുണ്ട്. ഇവരുടെ സെന്ട്രല് കിച്ചണ് വഴി അടുത്തിടെ മധ്യ, തെക്കന് ഗാസയിലെ നിര്ധന കുടുംബങ്ങള്ക്ക് 25,000 ഭക്ഷണപ്പൊതികള് വിതരണം ചെയ്തിരുന്നു. പാര്പ്പിടം, മെഡിക്കല് സാമഗ്രികള്, അവശ്യ സേവനങ്ങള്ക്കുള്ള സഹായം എന്നിവ ഉള്പ്പെടുന്ന സൗദി അറേബ്യയുടെ വിശാലമായ മാനുഷിക സഹായ പ്രചാരണത്തിന്റെ ഭാഗമായാണ് ഈ നടപടികള്.
