റിയാദ്: സൗദി അറേബ്യയില്‍ വരാനിരിക്കുന്ന അധ്യയന വര്‍ഷത്തേക്കുള്ള പുതിയ വിദ്യാഭ്യാസ പരിഷ്‌കാരങ്ങള്‍ വിദ്യാഭ്യാസ മന്ത്രി യൂസഫ് അല്‍-ബെന്യാന്‍ പ്രഖ്യാപിച്ചു. പ്രിന്‍സസ് നൂറ സര്‍വ്വകലാശാലയില്‍ നടന്ന ചടങ്ങില്‍ വെച്ചാണ് മന്ത്രി സുപ്രധാന പ്രഖ്യാപനങ്ങള്‍ നടത്തിയത്. രാജ്യത്തെ വിദ്യാഭ്യാസ ആവാസവ്യവസ്ഥയെ ശക്തിപ്പെടുത്തുന്നതിനും, സൗദി വിഷന്‍ 2030-ന്റെ ലക്ഷ്യങ്ങള്‍ക്ക് അനുസൃതമായി വിദ്യാര്‍ത്ഥികളുടെ ആഗോള മത്സരക്ഷമത വര്‍ദ്ധിപ്പിക്കുന്നതിനുമുള്ള സര്‍ക്കാരിന്റെ തുടര്‍ച്ചയായ ശ്രമങ്ങളുടെ ഭാഗമായാണ് പുതിയ ജനറല്‍ എഡ്യൂക്കേഷന്‍ സിസ്റ്റം നടപ്പിലാക്കുന്നത്.

പ്രധാന പരിഷ്‌കാരങ്ങള്‍:
ഹ്യൂമന്‍ കേപ്പബിലിറ്റി ഡെവലപ്മെന്റ് പ്രോഗ്രാം ഇനിഷ്യേറ്റീവിന്റെ ഭാഗമായി 2,40,000-ത്തിലധികം അധ്യാപകര്‍ക്ക് പ്രൊഫഷണല്‍ പരിശീലനം നല്‍കും. അധ്യാപകരുടെയും മറ്റ് ജീവനക്കാരുടെയും പ്രവര്‍ത്തന സമയം ഇനി മുതല്‍ ഓരോ സ്‌കൂളിന്റെയും പ്രത്യേക ആവശ്യങ്ങള്‍ക്കും പ്രതിദിന പ്രവര്‍ത്തന ഷെഡ്യൂളിനും അനുസൃതമായിരിക്കും. നിശ്ചിത ക്ലാസുകളും മറ്റ് ചുമതലകളും പൂര്‍ത്തിയാക്കുന്നതോടെ അധ്യാപകര്‍ക്ക് മടങ്ങാം. വിദ്യാര്‍ത്ഥികള്‍ക്ക് ഗുണനിലവാരമുള്ള വിദ്യാഭ്യാസം ഉറപ്പാക്കുന്നതിന്റെ ഭാഗമായി, അധ്യാപകര്‍ക്ക് തങ്ങളുടെ സ്‌പെഷ്യലൈസേഷന്‍ അല്ലാത്ത വിഷയങ്ങള്‍ പഠിപ്പിക്കുന്നതിന് കര്‍ശനമായ വിലക്കേര്‍പ്പെടുത്തി. 28,000-ത്തിലധികം വിദ്യാഭ്യാസ ജീവനക്കാര്‍ക്കും 9,500 ഭരണപരമായ ജീവനക്കാര്‍ക്കും പുതിയ സ്ഥാനക്കയറ്റങ്ങള്‍ നല്‍കും. അഡ്മിനിസ്‌ട്രേറ്റീവ് ഭാരം കുറയ്ക്കുന്നതിനും അധ്യാപകരെ സഹായിക്കുന്നതിനുമായി ആര്‍ട്ടിഫിഷ്യല്‍ ഇന്റലിജന്‍സ് സാങ്കേതികവിദ്യ വിദ്യാഭ്യാസ മേഖലയില്‍ നടപ്പിലാക്കും.

സമഗ്രമായ സജ്ജീകരണങ്ങളുടെ ഭാഗമായി പുതിയ അധ്യയന വര്‍ഷത്തേക്കുള്ള 36 ദശലക്ഷത്തിലധികം പാഠപുസ്തകങ്ങള്‍ വേനലവധിക്ക് മുന്‍പ് തന്നെ സ്‌കൂളുകളില്‍ എത്തിച്ചു. മതപരമായ മൂല്യങ്ങള്‍ കാത്തുസൂക്ഷിക്കുന്നതിനൊപ്പം വിദ്യാര്‍ത്ഥികളുടെ അവകാശങ്ങളും ഉത്തരവാദിത്തങ്ങളും സംരക്ഷിച്ചുകൊണ്ട് മികച്ച സേവനം ഉറപ്പാക്കുകയാണ് പുതിയ വിദ്യാഭ്യാസ സമ്പ്രദായത്തിന്റെ ലക്ഷ്യമെന്നും മന്ത്രി കൂട്ടിച്ചേര്‍ത്തു.