ടെഹ്റാന്: യു.എസ് പ്രസിഡന്റ് ഡൊണാള്ഡ് ട്രംപിന്റെ വാക്കുകള് വിശ്വസിക്കാന് കൊള്ളില്ലെന്ന് കടുത്ത ഭാഷയില് പരിഹസിച്ച് ഇറാന്റെ ഇസ്ലാമിക് റെവല്യൂഷണറി ഗാര്ഡ് കോര്പ്സ് (ഐ.ആര്.ജി.സി) മുതിര്ന്ന ഉപദേഷ്ടാവ് ബ്രിഗേഡിയര് ജനറല് മുഹമ്മദ് റെസാ നഖ്ദി. ട്രംപിന്റെ വാക്കുകളേക്കാള് കൂടുതല് തനിക്ക് വിശ്വാസം ഒരു ടാക്സി ഡ്രൈവറുടെ വാക്കിനാണെന്നും, ട്രംപ് തികച്ചും 'കുട്ടിക്കളിയും ദീര്ഘവീക്ഷണമില്ലാത്തവനുമാണ്' എന്നും അദ്ദേഹം കുറ്റപ്പെടുത്തി.
സോഷ്യല് മീഡിയയില് വ്യാപകമായി പ്രചരിക്കുന്ന വീഡിയോയിലാണ് നഖ്ദിയുടെ ഈ പരാമര്ശങ്ങള്. യു.എസിന്റെ വാഗ്ദാനങ്ങള്ക്ക് യാതൊരു സ്ഥിരതയോ അടിസ്ഥാനമോ ഇല്ലെന്ന് നഖ്ദി ആരോപിച്ചു. പറയുന്ന കാര്യങ്ങള് 24 മണിക്കൂര് തികയുന്നതിനുമുമ്പ് മാറ്റിപ്പറയുന്നത് യു.എസിന്റെ നയതന്ത്ര ബലഹീനതയാണെന്നും, ഇത് ലോകരാജ്യങ്ങള്ക്ക് മുന്നില് അമേരിക്കയുടെ വിശ്വാസ്യത തകര്ത്തതായും അദ്ദേഹം കൂട്ടിച്ചേര്ത്തു.
ഹോര്മൂസ് കടലിടുക്കിലെ സൈനിക സംഘര്ഷങ്ങളുടെയും ഉപരോധങ്ങളുടെയും പശ്ചാത്തലത്തിലാണ് ഈ പ്രസ്താവന. ഇറാനില് ഭരണമാറ്റം കൊണ്ടുവരാനും രാജ്യത്തെ വിഭജിക്കാനും ശ്രമിച്ച അമേരിക്കന് തന്ത്രങ്ങള് പൂര്ണ്ണമായും പരാജയപ്പെട്ടുവെന്ന് നഖ്ദി അവകാശപ്പെട്ടു. വ്യക്തവും ഉറപ്പുള്ളതുമായ കരാറുകളില്ലാതെ അമേരിക്കയുമായി യാതൊരുവിധ ചര്ച്ചകള്ക്കും ഇറാന് തയ്യാറല്ലെന്ന കൃത്യമായ സൂചനയാണ് നഖ്ദിയുടെ വാക്കുകള് നല്കുന്നത്.
Related News
