അല്‍ ഐന്‍: 'ദാര്‍ അല്‍ സൈന്‍' (അഴകിന്റെ നാട്) എന്നറിയപ്പെടുന്ന അല്‍ ഐന്‍ നഗരത്തിന് വര്‍ണ്ണശബളമായ പുതിയ മുഖമൊരുക്കി അല്‍ ഐന്‍ സിറ്റി മുനിസിപ്പാലിറ്റി. നഗരസൗന്ദര്യവല്‍ക്കരണ പദ്ധതിയുടെ ഭാഗമായി നഗരത്തിലെ പ്രധാന പാതയോരങ്ങളിലും പൊതുഇടങ്ങളിലും ഏകദേശം 9.9 കോടിയോളം പൂക്കളാണ് മുനിസിപ്പാലിറ്റി നട്ടുപിടിപ്പിച്ചത്. നഗരജീവിതത്തിന്റെ ഗുണനിലവാരം ഉയര്‍ത്തുന്നതിനും പരിസ്ഥിതി സൗഹൃദ അന്തരീക്ഷം സൃഷ്ടിക്കുന്നതിനുമായി നടപ്പിലാക്കുന്ന വിപുലമായ പച്ചപ്പുനിര്‍മ്മാണ പദ്ധതിയുടെ ഭാഗമാണിത്. നാല് ലക്ഷത്തോളം ചതുരശ്ര മീറ്റര്‍ വിസ്തൃതിയിലാണ് ഈ മനോഹരമായ പൂന്തോട്ടങ്ങള്‍ ക്രമീകരിച്ചിരിക്കുന്നത്.

30 വ്യത്യസ്ത ഇനങ്ങള്‍, 20 നിറങ്ങള്‍

മുനിസിപ്പാലിറ്റിയുടെ കീഴിലുള്ള നേഴ്‌സറികളില്‍ പ്രതിവര്‍ഷം 55 ലക്ഷത്തിലധികം തൈകളാണ് ഉത്പാദിപ്പിക്കുന്നത്. 30 വ്യത്യസ്ത സസ്യവര്‍ഗ്ഗങ്ങളില്‍പ്പെട്ട 40 ഇനം പൂച്ചെടികളും 20 വ്യത്യസ്ത വര്‍ണ്ണഭേദങ്ങളും ഉപയോഗിച്ചാണ് നഗരത്തിന് കാന്തി പകരുന്നത്. ചൂടിനെ പ്രതിരോധിക്കാനുള്ള ശേഷി, പൂത്തുനില്‍ക്കുന്ന സമയം, വര്‍ണ്ണ സാന്ദ്രത, കുറഞ്ഞ ജലഉപയോഗം എന്നിവ കണക്കിലെടുത്താണ് ചെടികള്‍ തിരഞ്ഞെടുക്കുന്നത്.

പെറ്റൂണിയ, വിന്‍ക, അമരാന്തസ്, സിന്നിയ, മരിഗോള്‍ഡ്, ഡാലിയ, സൂര്യകാന്തി, ക്രൈസാന്തമം (ചെമ്പരത്തി ഇനങ്ങള്‍) തുടങ്ങിയ പ്രമുഖ ഇനങ്ങള്‍ ഇതില്‍ ഉള്‍പ്പെടുന്നു. നഗരത്തിലെ റൗണ്ട് എബൗട്ടുകള്‍, നടപ്പാതകള്‍, പാര്‍ക്കുകള്‍, സര്‍ക്കാര്‍ സ്ഥാപനങ്ങള്‍, പ്രധാന റോഡുകളുടെ മധ്യഭാഗങ്ങള്‍ എന്നിവ കേന്ദ്രീകരിച്ചാണ് പൂന്തോട്ടങ്ങള്‍ നിര്‍മ്മിച്ചിരിക്കുന്നത്.

വര്‍ഷം മുഴുവന്‍ നീളുന്ന പരിപാലനം

കാലാവസ്ഥയ്ക്ക് അനുയോജ്യമായ രീതിയിലാണ് പൂച്ചെടികള്‍ നടുന്നത്. കടുത്ത ചൂടിനെ അതിജീവിക്കുന്ന ചെടികള്‍ മേയ് പകുതിയോടെയും, കൂടുതല്‍ വര്‍ണ്ണ വൈവിധ്യമുള്ള ശൈത്യകാല ചെടികള്‍ ഡിസംബര്‍ അവസാനത്തോടെയും നട്ടുതുടങ്ങും. ഓട്ടോമേറ്റഡ് ജലസേചന സംവിധാനവും കൃത്യമായ ജൈവവള പ്രയോഗവും വഴിയാണ് പൂന്തോട്ടങ്ങള്‍ സംരക്ഷിക്കുന്നത്.

അബുദാബിയുടെ ദീര്‍ഘകാല വികസന ലക്ഷ്യങ്ങള്‍ക്ക് അനുസൃതമായി, ആധുനിക ഹോര്‍ട്ടികള്‍ച്ചര്‍ സാങ്കേതികവിദ്യകള്‍ പ്രയോജനപ്പെടുത്തി നഗരത്തെ മേഖലയിലെ തന്നെ ഏറ്റവും മികച്ച ഹരിത നഗരമായി നിലനിര്‍ത്താനുള്ള തയ്യാറെടുപ്പിലാണ് അധികൃതര്‍.