കൊച്ചി: തൃക്കാക്കര ഭാരതമാതാ കോളജിലെ അധ്യാപകരുടെയും സഹപാഠികളുടെയും ചിത്രങ്ങളും വിഡിയോകളും മോര്‍ഫ് ചെയ്ത് അശ്ലീല രൂപത്തിലാക്കി പ്രചരിപ്പിച്ച സംഭവത്തില്‍ രണ്ടാം വര്‍ഷ ബിബിഎ വിദ്യാര്‍ഥി എസ്. ശ്രീഹരി (20) അറസ്റ്റിലായി. കോളജ് അധികൃതര്‍ നല്‍കിയ പരാതിയുടെ അടിസ്ഥാനത്തില്‍ ഐടി ആക്ടിലെ 67 എ അടക്കമുള്ള വകുപ്പുകള്‍ ചുമത്തി തൃക്കാക്കര പൊലീസാണ് കേസെടുത്തത്.

പൊലീസ് അനുമതിയോടെ ശ്രീഹരിയുടെ ഫോണ്‍ പരിശോധിച്ച വിദ്യാര്‍ത്ഥികളാണ് ഈ വിവരങ്ങള്‍ കണ്ടത്. ഫോണ്‍ പരിശോധിച്ച പെണ്‍കുട്ടിയുടെ ആടക്കം മോര്‍ഫ് ചെയ്ത ചിത്രങ്ങള്‍ കണ്ടെത്തിയിട്ടുണ്ട്. ഈ ചിത്രങ്ങള്‍ ടെലഗ്രാം, ഇന്‍സ്റ്റഗ്രാം ഗ്രൂപ്പുകള്‍ വഴി ശ്രീഹരി പണം വാങ്ങി വിറ്റതിന്റെ തെളിവുകളും കണ്ടെത്തിയതായാണ് വിവരം.

കോളജ് പരിപാടികള്‍ക്കിടെ പകര്‍ത്തിയ ദൃശ്യങ്ങളും വ്യക്തികളുടെ സാധാരണ ചിത്രങ്ങളും വിഡിയോകളുമാണ് പ്രതി ദുരുപയോഗം ചെയ്തത്. ഇയാളുടെ ഫോണില്‍നിന്ന് ഇത്തരം മോര്‍ഫ് ചെയ്ത ദൃശ്യങ്ങള്‍ പൊലീസ് കണ്ടെടുത്തു. കുറ്റക്കാരനെതിരെ ശക്തമായ നടപടി ആവശ്യപ്പെട്ട് കോളജില്‍ വിദ്യാര്‍ഥികള്‍ പ്രതിഷേധ സമരം നടത്തിയിരുന്നു.