തിരുവനന്തപുരം: വയനാട്ടില്‍ അഞ്ച് പതിറ്റാണ്ടോളം അമ്മയെപ്പോലെ പരിപാലിച്ച 85-കാരിയായ ഹിന്ദു വയോധികയുടെ അന്ത്യകര്‍മ്മങ്ങള്‍ നിര്‍വഹിച്ച മുസ്ലിം സഹോദരങ്ങളെ കേരള മുഖ്യമന്ത്രി വി.ഡി. സതീശന്‍ അഭിനന്ദിച്ചു. എക്‌സില്‍ (X) പങ്കുവെച്ച കുറിപ്പിലൂടെയാണ് അദ്ദേഹം റസാഖ്, സുലൈമാന്‍ എന്നീ സഹോദരങ്ങളെ പ്രശംസിച്ചത്.
'ഇതാണ് എനിക്കറിയാവുന്ന, ഞാന്‍ സ്‌നേഹിക്കുന്ന, ഞാന്‍ വിശ്വസിക്കുന്ന കേരളം,' റസാഖിന്റെയും സുലൈമാന്റെയും ഹൃദയസ്പര്‍ശിയായ പ്രവൃത്തിയെക്കുറിച്ചുള്ള വാര്‍ത്ത പങ്കുവെച്ചുകൊണ്ട് മുഖ്യമന്ത്രി കുറിച്ചു. മൂപ്പൈനാട് പഞ്ചായത്തിലെ ചിത്രഗിരിയിലുള്ള കല്യാണി അമ്മ അന്തരിച്ചതിനെത്തുടര്‍ന്നാണ് മക്കളോ മറ്റ് അടുത്ത ബന്ധുക്കളോ ഇല്ലാതിരുന്ന അവരുടെ സംസ്‌കാര ചടങ്ങുകള്‍ ഹൈന്ദവ ആചാരപ്രകാരം ഈ സഹോദരങ്ങള്‍ നിര്‍വഹിച്ചത്.
ഏകദേശം 50 വര്‍ഷത്തോളമായി അയല്‍വാസിയായിരുന്ന കല്യാണി അമ്മയുമായി റസാഖിനും സുലൈമാനും അവരുടെ കുടുംബത്തിനും ആഴത്തിലുള്ള ആത്മബന്ധമാണുണ്ടായിരുന്നത്. അവരുടെ ദൈനംദിന കാര്യങ്ങള്‍ നോക്കുന്നതിലും മരുന്നുകള്‍ എത്തിക്കുന്നതിലും ആവശ്യമുള്ളപ്പോഴെല്ലാം ആശുപത്രിയില്‍ കൊണ്ടുപോകുന്നതിലും ഇവര്‍ മുന്‍പന്തിയിലുണ്ടായിരുന്നു. ഇവരുടെ കുടുംബത്തിലെ എല്ലാ ആഘോഷങ്ങളിലും കല്യാണി അമ്മയും ഭാഗമായിരുന്നു. കാലക്രമേണ ഇവര്‍ തമ്മിലുള്ള സ്‌നേഹബന്ധം കൂടുതല്‍ ദൃഢമായി.
താന്‍ സ്വന്തം മക്കളായി കണ്ടിരുന്ന ഈ രണ്ട് സഹോദരങ്ങളും തന്റെ മരണശേഷം അന്ത്യകര്‍മ്മങ്ങള്‍ നിര്‍വഹിക്കണമെന്ന് കല്യാണി അമ്മ ആഗ്രഹം പ്രകടിപ്പിച്ചിരുന്നു.
