റിയാദ്: പ്രവാസലോകത്തിന് അഭിമാനമായി മലയാള സിനിമയ്ക്ക് അന്താരാഷ്ട്ര വേദിയില്‍ ശ്രദ്ധേയ നേട്ടം. പ്രവാസി വ്യവസായിയും ചലച്ചിത്ര നിര്‍മ്മാതാവുമായ ഷാജു വാലപ്പന്‍ നിര്‍മ്മിച്ച മലയാള ചിത്രം 'സ്വാലിഹ്' ദുര്‍ഗാപുര്‍ അന്താരാഷ്ട്ര ചലച്ചിത്രമേളയില്‍ (Durgapur International Film Festival) മികച്ച ചിത്രത്തിനുള്ള പുരസ്‌കാരം നേടി. വാലപ്പന്‍ ക്രിയേഷന്‍സിന്റെ ബാനറില്‍ ഷാജു വാലപ്പന്‍ നിര്‍മ്മിച്ച് സിദ്ദിഖ് പറവൂര്‍ സംവിധാനം ചെയ്ത ചിത്രത്തിനാണ് ഈ അംഗീകാരം.

ഓഗസ്റ്റ് 18 മുതല്‍ 23 വരെ നടന്ന ചലച്ചിത്രമേളയില്‍ വിവിധ രാജ്യങ്ങളില്‍ നിന്നുള്ള ശ്രദ്ധേയ ചിത്രങ്ങള്‍ പ്രദര്‍ശിപ്പിച്ചു. മത്സരവിഭാഗത്തില്‍ പങ്കെടുത്ത 'സ്വാലിഹ്' മികച്ച ചിത്രമായി തിരഞ്ഞെടുക്കപ്പെടുകയായിരുന്നു. സിനിമയെ പ്രതിനിധീകരിച്ച് നിര്‍മ്മാതാവ് ഷാജു വാലപ്പന്‍ മേളയില്‍ പങ്കെടുത്ത് പുരസ്‌കാരം ഏറ്റുവാങ്ങി.

പ്രവാസജീവിതത്തിനിടയിലും സിനിമയോടുള്ള താല്‍പര്യം കൈവിടാതെ മികച്ച സൃഷ്ടികള്‍ക്ക് പിന്തുണ നല്‍കിവരുന്ന ഷാജു വാലപ്പന്റെ നേട്ടം പ്രവാസി മലയാളികള്‍ക്കും അഭിമാനമായി. മലയാള സിനിമയെ അന്താരാഷ്ട്ര ചലച്ചിത്രവേദികളിലേക്ക് എത്തിക്കുന്നതില്‍ പ്രവാസി നിര്‍മ്മാതാക്കള്‍ നല്‍കുന്ന സംഭാവനയുടെ മറ്റൊരു ഉദാഹരണമായും ഈ പുരസ്‌കാരത്തെ വിലയിരുത്താം.

മാനവിക മൂല്യങ്ങള്‍, സാമൂഹിക ഐക്യം, കരുണ, മനുഷ്യബന്ധങ്ങളുടെ പ്രാധാന്യം എന്നിവ പ്രമേയമാക്കുന്ന ചിത്രമാണ് 'സ്വാലിഹ്'. പ്രേക്ഷകരുടെയും നിരൂപകരുടെയും പ്രശംസ നേടിയ ചിത്രം ഇതിനുമുമ്പും വിവിധ ചലച്ചിത്ര വേദികളില്‍ ശ്രദ്ധ നേടിയിരുന്നു.

പുരസ്‌കാര നേട്ടത്തില്‍ പ്രതികരിച്ച ഷാജു വാലപ്പന്‍, ''ഈ അംഗീകാരം സിനിമയുടെ മുഴുവന്‍ സംഘത്തിന്റെയും കഠിനാധ്വാനത്തിനുള്ള അംഗീകാരമാണ്. മലയാള സിനിമയെ അന്താരാഷ്ട്ര വേദികളില്‍ അവതരിപ്പിക്കാന്‍ ലഭിച്ച അവസരത്തിന് ഞങ്ങള്‍ നന്ദിയുള്ളവരാണ്,'' എന്ന് പറഞ്ഞു. സംവിധായകന്‍ സിദ്ദിഖ് പറവൂര്‍, ''മനുഷ്യസ്‌നേഹവും സഹവര്‍ത്തിത്വവും പ്രമേയമാക്കിയ ഈ സിനിമയെ ലോകത്തിന്റെ വിവിധ ഭാഗങ്ങളില്‍ നിന്നുള്ള പ്രേക്ഷകര്‍ സ്വീകരിച്ചതില്‍ സന്തോഷമുണ്ട്. ഈ പുരസ്‌കാരം കൂടുതല്‍ ഉത്തരവാദിത്വത്തോടെ മുന്നോട്ടുപോകാന്‍ പ്രചോദനമാകും,'' എന്ന് വ്യക്തമാക്കി.

പ്രവാസി മലയാളിയുടെ നിര്‍മ്മാണ സംരംഭത്തില്‍ പിറന്ന 'സ്വാലിഹ്' നേടിയ അന്താരാഷ്ട്ര അംഗീകാരം മലയാള സ്വതന്ത്ര സിനിമയ്ക്കും പ്രവാസി ചലച്ചിത്ര പ്രവര്‍ത്തനങ്ങള്‍ക്കും ഒരുപോലെ അഭിമാനകരമായ നേട്ടമായി മാറിയിരിക്കുകയാണ്.