തിരുവനന്തപുരം: എക്സാലോജിക്-സിഎംആര്എല് പേഓഫ് കേസില് പ്രതിപക്ഷ നേതാവും മുന് മുഖ്യമന്ത്രിയുമായ പിണറായി വിജയന്, മുന് പൊതുമരാമത്ത് മന്ത്രി പി.എ. മുഹമ്മദ് റിയാസ്, പിണറായി വിജയന്റെ മകളും എക്സാലോജിക് ഉടമയുമായ ടി. വീണ എന്നിവര്ക്കെതിരെ അഴിമതി നിരോധന നിയമപ്രകാരം പ്രത്യേക എഫ്.ഐ.ആര് രജിസ്റ്റര് ചെയ്യണമെന്ന് ആവശ്യപ്പെട്ട് എന്ഫോഴ്സ്മെന്റ് ഡയറക്ടറേറ്റ് (ഇ.ഡി) സംസ്ഥാന പൊലീസ് മേധാവിക്ക് വിശദമായ റിപ്പോര്ട്ട് കൈമാറി.
കള്ളപ്പണം വെളുപ്പിക്കല് നിരോധന നിയമത്തിലെ വകുപ്പ് 66(2) പ്രകാരമാണ് ഇ.ഡി ഈ റിപ്പോര്ട്ട് കൈമാറിയിരിക്കുന്നത്. അന്വേഷണത്തിനിടെ ശേഖരിച്ച തെളിവുകള് അഴിമതി നിരോധന നിയമം, ഇന്ത്യന് ന്യായ സംഹിത, മറ്റ് അനുബന്ധ നിയമങ്ങള് എന്നിവ പ്രകാരം സ്വതന്ത്ര ക്രിമിനല് കേസ് രജിസ്റ്റര് ചെയ്യാന് പര്യാപ്തമാണെന്ന് റിപ്പോര്ട്ടില് ചൂണ്ടിക്കാട്ടുന്നതായാണ് വിവരം.
ഇ.ഡി അന്വേഷണത്തില് ലഭിച്ച സാമ്പത്തിക ഇടപാട് രേഖകള്, ബാങ്ക് വിവരങ്ങള്, സാക്ഷിമൊഴികള്, ഡിജിറ്റല് തെളിവുകള് എന്നിവയുടെ അടിസ്ഥാനത്തിലാണ് നടപടി ശുപാര്ശ ചെയ്തിരിക്കുന്നതെന്നാണ് റിപ്പോര്ട്ട്. സംസ്ഥാന പൊലീസ് മേധാവിയോട് എഫ്.ഐ.ആര് രജിസ്റ്റര് ചെയ്ത് തുടര് അന്വേഷണം ആരംഭിക്കണമെന്നും കേന്ദ്ര ഏജന്സി ആവശ്യപ്പെട്ടിട്ടുണ്ട്.
എക്സാലോജിക് സൊല്യൂഷന്സ് െ്രെപവറ്റ് ലിമിറ്റഡിന് സേവനമൊന്നും നല്കാതെയാണ് സിഎംആര്എല്ലില് നിന്ന് മാസപ്പടി രീതിയില് പണം ലഭിച്ചതെന്നാണ് ഇഡിയുടെ പ്രധാന കണ്ടെത്തല്. ഈ ഇടപാടുകള് അനധികൃത സാമ്പത്തിക നേട്ടം ലക്ഷ്യമിട്ടതാണെന്നും, കള്ളപ്പണം വെളുപ്പിക്കലുമായി ബന്ധപ്പെട്ട കുറ്റകൃത്യങ്ങളുടെ ഭാഗമാണെന്നുമാണ് ഇ.ഡിയുടെ നിലപാട്.
ഇതിനുമുമ്പ് ഇതേ കേസില് ഇ.ഡി സമര്പ്പിച്ച കുറ്റപത്രത്തില് ടി. വീണയെ പ്രതിചേര്ത്തിരുന്നു. തുടര്ന്ന് അന്വേഷണം വ്യാപിപ്പിച്ച കേന്ദ്ര ഏജന്സി, അഴിമതി നിരോധന നിയമപ്രകാരമുള്ള നടപടിക്കായി സംസ്ഥാന പോലീസിന്റെ ഇടപെടല് ആവശ്യമായതിനാലാണ് വിശദ റിപ്പോര്ട്ട് കൈമാറിയത്.
അതേസമയം, കേസുമായി ബന്ധപ്പെട്ട എല്ലാ ആരോപണങ്ങളും നേരത്തേ തന്നെ പിണറായി വിജയനും ടി. വീണയും നിഷേധിച്ചിരുന്നു. എക്സാലോജിക്കിന് ലഭിച്ച തുക നിയമാനുസൃതമായ ഐ.ടി. കണ്സള്ട്ടന്സി സേവനത്തിനുള്ള പ്രതിഫലമാണെന്നും, രാഷ്ട്രീയ പ്രേരിതമായ അന്വേഷണമാണ് നടക്കുന്നതെന്നുമാണ് അവരുടെ നിലപാട്.
ഇ.ഡിയുടെ റിപ്പോര്ട്ട് ലഭിച്ച സാഹചര്യത്തില് സംസ്ഥാന പൊലീസ് മേധാവി നിയമോപദേശം തേടി തുടര്നടപടി സ്വീകരിക്കുമോ എന്നതാണ് ഇനി നിര്ണായകം.
Related News
