കൊച്ചി: നടന് നിവിന് പോളി നായകനായെത്തുന്ന പുതിയ സിനിമയുടെ ചിത്രീകരണത്തിനിടെയുണ്ടായ ദാരുണമായ അപകടത്തില് ഒപ്പമുണ്ടായിരുന്ന ലൈറ്റ് ടെക്നീഷ്യന് ജീവന് നഷ്ടമായി. തൃശൂര് കാഞ്ഞാണി സ്വദേശി വിഷ്ണു (32) ആണ് എടയാറിലെ ഷൂട്ടിങ് സെറ്റില് വെച്ച് മരിച്ചത്.
നാഷിദ് ഫാമി സംവിധാനം ചെയ്യുന്ന പേരിട്ടിട്ടില്ലാത്ത ഈ ചിത്രത്തിന്റെ ഷൂട്ടിങ് ബുധനാഴ്ചയാണ് എടയാറില് ആരംഭിച്ചത്. ചിത്രീകരണത്തിന്റെ ആദ്യദിനം ലൈറ്റ് ക്രമീകരണങ്ങള് നടത്തുന്നതിനിടെയായിരുന്നു ദുരന്തം. ചിത്രീകരണത്തിനായി ഉയര്ന്ന സ്ഥലത്തുനിന്ന് വൈദ്യുത ലൈറ്റുകള് ക്രമീകരിക്കുന്നതിനിടയിലാണ് വിഷ്ണുവിന് ശക്തമായി ഷോക്കേറ്റത്. അപകടം ശ്രദ്ധയില്പ്പെട്ട ഉടന് തന്നെ സെറ്റിലുണ്ടായിരുന്നവര് മെയിന് സ്വിച്ച് ഓഫ് ചെയ്തു. തുടര്ന്ന് നിയന്ത്രണം വിട്ട വിഷ്ണു താഴേക്ക് വീഴുകയായിരുന്നു.
തീവ്രമായ വൈദ്യുതാഘാതമേറ്റ വിഷ്ണുവിനെ ഉടന് തന്നെ എറണാകുളത്തെ സ്വകാര്യ ആശുപത്രിയില് എത്തിച്ചെങ്കിലും ജീവന് രക്ഷിക്കാനായില്ല. വിവരമറിഞ്ഞ് നടന് നിവിന് പോളി ഉള്പ്പെടെയുള്ള സിനിമാ പ്രവര്ത്തകര് ആശുപത്രിയിലെത്തി. സംഭവത്തില് പൊലീസ് തുടര്നടപടികള് ആരംഭിച്ചിട്ടുണ്ട്.
Related News
