കൊച്ചി: കഥ പറയുന്നതിന്റെ പുതുവഴികളും താരപരിവേഷത്തിനപ്പുറമുള്ള കഥാപാത്രങ്ങളും കൈകോര്‍ത്തപ്പോള്‍ പ്രേക്ഷകര്‍ക്ക് സന്തോഷത്തിന്റെ ആഘോഷക്കാലം. വായ്‌മൊഴി പ്രചാരണവും ഒ.ടി.ടി. പ്ലാറ്റ്‌ഫോമുകളുടെ ആഗോള വ്യാപനവും ചേര്‍ന്നപ്പോള്‍ മലയാള സിനിമയ്ക്ക് ലഭിക്കുന്നത് അപൂര്‍വമായൊരു സുവര്‍ണകാലം. തിയേറ്ററുകളില്‍ വന്‍ വിജയങ്ങള്‍ സൃഷ്ടിക്കുന്നതിനൊപ്പം ലോകത്തിന്റെ വിവിധ ഭാഗങ്ങളിലുള്ള പ്രേക്ഷകരിലേക്കും മലയാള സിനിമ അതിവേഗം എത്തുകയാണ്.
2024ലെ മഞ്ഞുമ്മല്‍ ബോയ്‌സ്, പ്രേമലു, ആവേശം, ആടുജീവിതം, ഭ്രമയുഗം തുടങ്ങിയ ചിത്രങ്ങള്‍ മലയാള സിനിമയുടെ വിപണിയെ കേരളത്തിന് പുറത്തേക്ക് ശക്തമായി വികസിപ്പിച്ചു. ഏകദേശം 18-20 കോടി രൂപ ബജറ്റില്‍ ഒരുക്കിയ മഞ്ഞുമ്മല്‍ ബോയ്‌സ് ആഗോളതലത്തില്‍ 240 കോടി രൂപയ്ക്കു മുകളില്‍ നേടി. പ്രേമലുവാകട്ടെ താരതമ്യേന ചെറിയ ബജറ്റില്‍ നിര്‍മിച്ചിട്ടും 100 കോടിയിലേറെ കളക്ഷന്‍ നേടി വലിയ വിജയമായി.
2026ലും ഈ കുതിപ്പ് തുടരുകയാണ്. ദൃശ്യം 3 ആഗോള ബോക്‌സ് ഓഫീസില്‍ 238 കോടി രൂപ നേടിയതായി റിപ്പോര്‍ട്ടുകള്‍ പറയുന്നു. നിവിന്‍ പോളി-മമിത ബൈജു ചിത്രം ബെത്‌ലഹേം കുടുംബ യൂണിറ്റ് മൂന്നാം വാരവും പിന്നിട്ട് മികച്ച പ്രകടനം തുടരുന്നു. സെപ്റ്റംബര്‍ 11 വരെയുള്ള കണക്കുകള്‍ പ്രകാരം ചിത്രത്തിന്റെ ആഗോള കളക്ഷന്‍ 288 കോടി രൂപ കടന്നതായി റിപ്പോര്‍ട്ടുണ്ട്; ഇന്ത്യയിലെ കളക്ഷന്‍ 135 കോടിയിലേറെയായി.
ഈ വിജയങ്ങളുടെ പ്രധാന രഹസ്യം കഥയാണ് താരം എന്ന സമീപനമാണ്. പ്രണയം, സൗഹൃദം, കുടുംബം, സാധാരണ മനുഷ്യരുടെ ജീവിതം തുടങ്ങിയ പരിചിതമായ വിഷയങ്ങളില്‍ പുതുമയുള്ള കഥപറച്ചിലാണ് പ്രേക്ഷകരെ ആകര്‍ഷിക്കുന്നത്. മഞ്ഞുമ്മല്‍ ബോയ്‌സ് സൗഹൃദത്തെയും ഗുഹാ രക്ഷാപ്രവര്‍ത്തനത്തെയും ആവേശകരമായ അനുഭവമാക്കി മാറ്റിയപ്പോള്‍ പ്രേമലു യുവതലമുറയുടെ പ്രണയവും നഗരജീവിതവും ലളിതമായി അവതരിപ്പിച്ചു.
സിനിമയുടെ വിജയത്തില്‍ വായ്‌മൊഴി പ്രചാരണത്തിനും വലിയ പങ്കുണ്ട്. സോഷ്യല്‍ മീഡിയയിലൂടെ പ്രേക്ഷകര്‍ തന്നെ സിനിമയുടെ പ്രചാരകരാകുന്നു. ആദ്യദിവസങ്ങളിലെ പ്രതികരണം മികച്ചതായാല്‍ അത് മറ്റ് ഭാഷകളിലെ പ്രേക്ഷകരിലേക്കും അതിവേഗം വ്യാപിക്കുന്നു.
ഒ.ടി.ടി. മലയാള സിനിമയുടെ ഭൂപടം തന്നെ മാറ്റി. മുമ്പ് കേരളത്തിന് പുറത്തുള്ള മലയാളികള്‍ക്ക് പരിമിതമായ തിയേറ്റര്‍ റിലീസുകള്‍ മാത്രമായിരുന്നു ലഭിച്ചിരുന്നത്. ഇപ്പോള്‍ ലോകത്തിന്റെ വിവിധ ഭാഗങ്ങളിലുള്ള മലയാളികള്‍ക്ക് സിനിമകള്‍ വളരെ വേഗത്തില്‍ കാണാന്‍ കഴിയുന്നു. മിന്നല്‍ മുരളി നെറ്റ്ഫ്‌ലിക്‌സിലെ ആഗോള നോണ്‍ഇംഗ്ലീഷ് സിനിമകളുടെ മുന്‍നിരയിലെത്തിയതും മലയാള സിനിമയുടെ അന്താരാഷ്ട്ര സാധ്യത വ്യക്തമാക്കുന്നു.
പണം എത്തുന്നതോടെ സിനിമയുടെ ബജറ്റും ഉയരുകയാണ്. ഏതാനും വര്‍ഷം മുമ്പ് 5-7 കോടി രൂപയില്‍ ഒരുക്കിയിരുന്ന ശരാശരി ചിത്രങ്ങളുടെ സ്ഥാനത്ത് ഇപ്പോള്‍ 20-25 കോടി രൂപ ബജറ്റുകള്‍ സാധാരണയാകുന്നു. മഞ്ഞുമ്മല്‍ ബോയ്‌സ് പോലുള്ള ചിത്രങ്ങള്‍ കുറഞ്ഞ ചെലവില്‍ വലിയ തിരിച്ചുവരവ് സാധ്യമാണെന്ന് തെളിയിക്കുകയും ചെയ്തു.
ഈ വളര്‍ച്ചയ്ക്ക് മറുവശവുമുണ്ട്. കോര്‍പ്പറേറ്റ് കമ്പനികളുടെ ഇടപെടല്‍ വര്‍ധിക്കുന്നതോടെ സൃഷ്ടിപരമായ സ്വാതന്ത്ര്യം നഷ്ടപ്പെടുമോ എന്ന ആശങ്ക സിനിമാരംഗത്തുണ്ട്. വലിയ സ്റ്റുഡിയോകളുടെയും നിക്ഷേപകരുടെയും വരവ് അടിസ്ഥാനസൗകര്യങ്ങള്‍ മെച്ചപ്പെടുത്താന്‍ സഹായിക്കുമെങ്കിലും, വിപണിയുടെ കണക്കുകള്‍ മാത്രം തീരുമാനിക്കുന്ന സിനിമകള്‍ മലയാള സിനിമയുടെ പ്രത്യേകതയായ എഴുത്തിനെയും പരീക്ഷണങ്ങളെയും ദുര്‍ബലപ്പെടുത്തരുതെന്നാണ് രംഗത്തുള്ളവരുടെ മുന്നറിയിപ്പ്.
ചെറിയ ബജറ്റ്, ശക്തമായ തിരക്കഥ, പ്രാദേശിക ജീവിതത്തോട് ചേര്‍ന്ന കഥ, മികച്ച അഭിനയം, വായ്‌മൊഴി പ്രചാരണം, ആഗോള ഒ.ടി.ടി. വിപണി തുടങ്ങിയ കൂട്ടുകെട്ടാണ് മലയാള സിനിമയുടെ പുതിയ വിജയഫോര്‍മുല. കേരളത്തിന്റെ പരിമിതമായ സിനിമാ അടിസ്ഥാനസൗകര്യങ്ങള്‍ക്കിടയിലും മലയാള സിനിമ ശ്രദ്ധേയമാവുന്നത് കഥപറച്ചിലിന്റെ പ്രത്യേകത കൊണ്ടാണ്.