റിയാദ്: ആര്ട്ടിഫിഷ്യല് ഇന്റലിജന്സിന്റെ (AI) ഭാവി രൂപപ്പെടുത്തുന്നതിനുള്ള ആശയവിനിമയങ്ങളുമായി നാലാമത് ആഗോള AI എത്തിക്സ് ഫോറം റിയാദില് ആരംഭിച്ചു. തിങ്കളാഴ്ച ആരംഭിച്ച സമ്മേളനം വ്യാഴാഴ്ചവരെ തുടരും.
ദേശീയ ഭരണനിര്വ്വഹണം ശക്തിപ്പെടുത്തുന്നതിനും, AI സാങ്കേതികവിദ്യ ജനങ്ങള്ക്കും ഭൂമിക്കും ഒരുപോലെ പ്രയോജനപ്പെടുന്നുണ്ടെന്ന് ഉറപ്പാക്കുന്നതിനുമാണ് ഈ സമ്മേളനം ലക്ഷ്യമിടുന്നതെന്ന് യുനെസ്കോ ഡെപ്യൂട്ടി ഡയറക്ടര് ജനറല് അസ റോഗ്നര് വാര്ത്താസമ്മേളനത്തില് വ്യക്തമാക്കി.
ഈ ഫോറത്തിന് ആതിഥേയത്വം വഹിക്കുന്ന ആദ്യ അറബ് രാജ്യമാണ് സൗദി അറേബ്യ. എത്തിക്കല് റെഗുലേഷനുകള് തങ്ങളുടെ സ്ഥാപനങ്ങളില് ഉള്പ്പെടുത്തുന്നതില് രാജ്യം മുന്പന്തിയിലാണുള്ളത്. ഇന്റര്നാഷണല് സെന്റര് ഫോര് അക റിസര്ച്ച് ആന്ഡ് എത്തിക്സ് (ICAIRE) ആണ് ചടങ്ങില് രാജ്യത്തെ പ്രതിനിധീകരിക്കുന്നത്.
സൗദി അറേബ്യ 2026-നെ 'ആര്ട്ടിഫിഷ്യല് ഇന്റലിജന്സ് വര്ഷമായി' പ്രഖ്യാപിച്ച വേളയിലാണ് ഫോറം നടക്കുന്നതെന്ന് സൗദി ഡാറ്റ ആന്ഡ് അക അതോറിറ്റി പ്രസിഡന്റ് ഡോ. അബ്ദുല്ല ബിന് ഷറഫ് അല്ഘാംദി പറഞ്ഞു. സവിശേഷമായ വര്ക്ക്ഷോപ്പുകളിലൂടെയും ഉന്നതതല സെഷനുകളിലൂടെയും ആഗോളതലത്തിലുള്ള മികച്ച സംരംഭങ്ങളും അനുഭവങ്ങളും ഫോറത്തില് പ്രദര്ശിപ്പിക്കും.
യുനെസ്കോയുടെ 'റെക്കമെന്ഡേഷന് ഓണ് ദി എത്തിക്സ് ഓഫ് AI' മാനദണ്ഡങ്ങള്ക്കനുസൃതമായി ദേശീയ AI നയങ്ങളും തന്ത്രങ്ങളും രൂപീകരിക്കാന് 78 രാജ്യങ്ങള്ക്ക് യുനെസ്കോ സാങ്കേതിക വൈദഗ്ദ്ധ്യം നല്കിയിട്ടുണ്ടെന്ന് അസ റോഗ്നര് കൂട്ടിച്ചേര്ത്തു. സാങ്കേതികവിദ്യ വികസിപ്പിക്കുന്നതിനും നിയന്ത്രിക്കുന്നതിനുമുള്ള തയ്യാറെടുപ്പുകള് വിലയിരുത്തുന്നതിനായി 58 രാജ്യങ്ങള് ഇതിനകം യുനെസ്കോയുടെ AI റീഡിനസ് അസസ്മെന്റ് മെത്തഡോളജി (RAM) പൂര്ത്തിയാക്കിയിട്ടുണ്ട്.
വികസിത രാജ്യങ്ങളും അവികസിത രാജ്യങ്ങളും തമ്മിലുള്ള വിടവ് നികത്തുന്നതില് അന്താരാഷ്ട്ര സഹകരണം അത്യന്താപേക്ഷിതമാണെന്ന് അസ റോഗ്നര് ഓര്മ്മിപ്പിച്ചു. ഗവണ്മെന്റുകളും കമ്പനികളും തമ്മിലുള്ള ഫലപ്രദമായ സഹകരണത്തിന്റെ ആവശ്യകത ഉള്പ്പെടെയുള്ള പ്രധാനപ്പെട്ട വിഷയങ്ങള് ഫോറത്തില് ചര്ച്ച ചെയ്യും. രാജ്യങ്ങള്, ശാസ്ത്രജ്ഞര്, സാങ്കേതിക വിദഗ്ധര് എന്നിവര് തമ്മിലുള്ള ആശയവിനിമയ വേദിയായാണ് ഈ സമ്മേളനം പ്രവര്ത്തിക്കുന്നത്.
