ന്യൂഡല്‍ഹി: 2,000 രൂപയ്ക്ക് മുകളിലുള്ള യു.പി.ഐ. (UPI) ഇടപാടുകളില്‍ പുതിയ മെര്‍ച്ചന്റ് ഡിസ്‌കൗണ്ട് റേറ്റ് (MDR) ഏര്‍പ്പെടുത്തിയത് ഹ്രസ്വകാലത്തേക്ക് ഡിജിറ്റല്‍ ഇടപാടുകളുടെ അളവിനെ പ്രതികൂലമായി ബാധിച്ചേക്കാമെന്ന് നാഷണല്‍ സ്റ്റോക്ക് എക്‌സ്‌ചേഞ്ച് (NSE) എം.ഡി.യും സി.ഇ.ഒ.യുമായ ആശിഷ്‌കുമാര്‍ ചൗഹാന്‍ പറഞ്ഞു. എങ്കിലും, കാലക്രമേണ ഇടപാടുകള്‍ സാധാരണ നിലയിലേക്ക് തിരിച്ചെത്തുമെന്നാണ് പ്രതീക്ഷയെന്നും അദ്ദേഹം വ്യക്തമാക്കി.

'2,000 രൂപയ്ക്ക് മുകളിലുള്ള തുകയ്ക്ക് എം.ഡി.ആര്‍. ചാര്‍ജ് വരുന്നതിനാല്‍ തുടക്കത്തില്‍ ഇടപാടുകളുടെ എണ്ണത്തില്‍ ചില കുറവുകള്‍ ഉണ്ടായേക്കാം. എന്നാല്‍ കുറച്ചു കാലത്തിന് ശേഷം സ്ഥിതി സാധാരണ നിലയിലാകുമെന്നാണ് ഞാന്‍ പ്രതീക്ഷിക്കുന്നത്,' ചൗഹാന്‍ പറഞ്ഞു.

2,000 രൂപയ്ക്ക് മുകളിലുള്ള വ്യാപാരികളിലേക്കുള്ള (P2M) യു.പി.ഐ. പേയ്‌മെന്റുകള്‍ക്ക് സര്‍ക്കാര്‍ 0.4 ശതമാനം നിരക്ക് നിശ്ചയിച്ചു. 75,000 രൂപയ്ക്കും അതിനുമുകളിലുള്ളതുമായ പണമിടപാടുകള്‍ക്ക് ഫീസ് പരമാവധി 300 രൂപയായി നിജപ്പെടുത്തിയിട്ടുണ്ട്. 2,000 രൂപ വരെയുള്ള യു.പി.ഐ. ഇടപാടുകളെ വ്യാപാരി ചാര്‍ജുകളില്‍ നിന്ന് ഒഴിവാക്കിയിട്ടുണ്ട്.

സുപ്രധാന മാറ്റം: 2020 ജനുവരി മുതല്‍ തുടര്‍ന്നുവന്ന 'പൂജ്യം എം.ഡി.ആര്‍.' നയത്തിനാണ് ഈ പുതിയ ഉത്തരവോടെ അവസാനമാകുന്നത്. ഡിജിറ്റല്‍ പേയ്‌മെന്റുകള്‍ പ്രോത്സാഹിപ്പിക്കുന്നതിനായി കൊണ്ടുവന്ന ഈ നയം അശാസ്ത്രീയമാണെന്ന് ബാങ്കുകളും ഫിന്‍ടെക് കമ്പനികളും നേരത്തെ മുതല്‍ വിമര്‍ശനം ഉന്നയിച്ചിരുന്നു.