റിയാദ്: ലോകപ്രശസ്തമായ ഫോബ്സ് മാഗസിന്റെ 2026-ലെ 'ടോപ്പ് ഹെല്ത്ത് കെയര് ലീഡേഴ്സ്' പട്ടികയില് അബീര് മെഡിക്കല് ഗ്രൂപ്പ് സ്ഥാപകനും ചെയര്മാനുമായ ആലുങ്ങല് മുഹമ്മദ് തുടര്ച്ചയായ രണ്ടാം തവണയും ഇടംനേടി. പശ്ചിമേഷ്യയിലെ ആരോഗ്യമേഖലയില് ചരിത്രം കുറിച്ച പ്രമുഖ വ്യവസായ പ്രതിഭകളെ ആദരിക്കുന്ന ഈ പട്ടികയില് ഇടംപിടിച്ചത് മലയാളി സമൂഹത്തിനും പ്രവാസി ലോകത്തിനും അഭിമാനകരമായ നേട്ടമാണ്.
1999-ല് ജിദ്ദയില് ഒരു ചെറിയ പോളിക്ലിനിക്കായി പ്രവര്ത്തനമാരംഭിച്ച അബീര് മെഡിക്കല് ഗ്രൂപ്പ്, ഇന്ന് സൗദി അറേബ്യ, യു.എ.ഇ, ഖത്തര്, ഒമാന്, കുവൈത്ത്, ഇന്ത്യ എന്നീ രാജ്യങ്ങളിലായി പടര്ന്നുപന്തലിച്ച വമ്പന് ആരോഗ്യ ശൃംഖലയായി വളര്ന്നു കഴിഞ്ഞു. മള്ട്ടി-സ്പെഷ്യാലിറ്റി ആശുപത്രികള്, ഫാര്മസികള് ഉള്പ്പെടെയുള്ള 50-ലധികം കേന്ദ്രങ്ങളിലൂടെ പ്രതിവര്ഷം 40 ലക്ഷത്തിലധികം രോഗികള്ക്കാണ് ഗ്രൂപ്പ് സേവനം നല്കുന്നത്. കഴിഞ്ഞ ഒരു വര്ഷത്തിനിടെ മാത്രം 12 പുതിയ മെഡിക്കല് കേന്ദ്രങ്ങളാണ് പുതുതായി പ്രവര്ത്തനം ആരംഭിച്ചത്.
സൗദിയിലെ അല് ഖോബാര്, ജിസാന്, യാമ്പു എന്നിവിടങ്ങളില് പുതിയ മള്ട്ടി-സ്പെഷ്യാലിറ്റി ആശുപത്രികളുടെയും, ദഹ്റാന്, റിയാദ് എന്നിവിടങ്ങളില് ഡേ-സര്ജറി സെന്ററുകളുടെയും പണികള് അതിവേഗം പുരോഗമിക്കുകയാണ്.
ഗിന്നസ് റെക്കോര്ഡുകള് ഉള്പ്പെടെ നിരവധി അന്താരാഷ്ട്ര അംഗീകാരങ്ങള് അബീര് ഗ്രൂപ്പ് നേടിയിട്ടുണ്ട്. ആരോഗ്യരംഗത്തിന് പുറമേ മാധ്യമ-വിദ്യാഭ്യാസ മേഖലകളിലെ സജീവ സാന്നിധ്യമായ അദ്ദേഹത്തിന്റെ ഈ നേട്ടം പ്രവാസി സമൂഹത്തിന് പുതിയ ഊര്ജ്ജമാണ് പകരുന്നത്.
Related News
