പെഷവാര്‍: വടക്കുപടിഞ്ഞാറന്‍ പാകിസ്ഥാനിലെ ഖൈബര്‍ പക്തൂണ്‍ഖ്വ പ്രവിശ്യയില്‍ പോലീസ് കോംപ്ലക്‌സിനു സമീപമുള്ള പള്ളിയിലുണ്ടായ ശക്തമായ ചാവേര്‍ സ്‌ഫോടനത്തില്‍ 16 പേര്‍ കൊല്ലപ്പെടുകയും 50-ലധികം പേര്‍ക്ക് പരിക്കേല്‍ക്കുകയും ചെയ്തു. വെള്ളിയാഴ്ച ജുമുഅ നമസ്‌കാരത്തിനിടെയായിരുന്നു ദാരുണമായ സംഭവം.

പെഷവാറില്‍ നിന്ന് ഏകദേശം 60 കിലോമീറ്റര്‍ തെക്കുപടിഞ്ഞാറുള്ള കോഹത്ത് ജില്ലയിലെ പഴയ പോലീസ് ലൈന്‍സിന് സമീപമുള്ള പള്ളിയിലാണ് സ്‌ഫോടനം നടന്നത്. സ്‌ഫോടകവസ്തുക്കള്‍ നിറച്ച വാഹനം കോംപ്ലക്‌സിന്റെ ഗേറ്റിലേക്ക് ഇടിച്ചുകയറ്റി പൊട്ടിത്തെറിപ്പിക്കുകയായിരുന്നുവെന്നും, തൊട്ടുപിന്നാലെ വെടിവെപ്പും രണ്ടാമതൊരു ചാവേര്‍ സ്‌ഫോടനവും ഉണ്ടായതായും അധികൃതര്‍ അറിയിച്ചു.

വെള്ളിയാഴ്ചത്തെ പ്രാര്‍ത്ഥനയ്ക്കായി വിശ്വാസികള്‍ പള്ളിയില്‍ ഒത്തുകൂടിയിരുന്ന സമയത്താണ് ആക്രമണം ഉണ്ടായത്. കൊല്ലപ്പെട്ടവരില്‍ 5 പോലീസ് ഉദ്യോഗസ്ഥരും 11 സാധാരണക്കാരും ഉള്‍പ്പെടുന്നുവെന്ന് ഖൈബര്‍ പക്തൂണ്‍ഖ്വ പോലീസ് മേധാവി സുല്‍ഫിക്കര്‍ ഹമീദ് സ്ഥിരീകരിച്ചു. ആക്രമണത്തിന്റെ ഉത്തരവാദിത്തം ഇതുവരെ ആരും ഏറ്റെടുത്തിട്ടില്ല. ജില്ലാ ഹെഡ്ക്വാര്‍ട്ടേഴ്‌സ് ആശുപത്രി അധികൃതരാണ് മരണസംഖ്യ ഔദ്യോഗികമായി സ്ഥിരീകരിച്ചത്.

സ്‌ഫോടനത്തെ തുടര്‍ന്ന് 16 മൃതദേഹങ്ങളും പരിക്കേറ്റ 50-ലധികം ആളുകളെയും ആശുപത്രിയില്‍ എത്തിച്ചതായി മെഡിക്കല്‍ സൂപ്രണ്ട് താഹിര്‍ അലി ഷാ അറിയിച്ചു. പരിക്കേറ്റവരില്‍ ഭൂരിഭാഗവും പള്ളിക്കുള്ളിലോ പരിസരത്തോ പ്രാര്‍ത്ഥനയ്ക്കായി എത്തിയവരാണ്. സ്‌ഫോടനത്തിന്റെ ആഘാതത്തില്‍ പള്ളിക്ക് പുറത്ത് വലിയൊരു ഗര്‍ത്തം രൂപപ്പെട്ടിട്ടുണ്ട്.രക്ഷാപ്രവര്‍ത്തനം പുരോഗമിക്കുന്നു.

വിവരമറിഞ്ഞ ഉടന്‍ തന്നെ ഖൈബര്‍ പക്തൂണ്‍ഖ്വയിലെ റെസ്‌ക്യൂ 1122 സേന സ്ഥലത്തെത്തി രക്ഷാപ്രവര്‍ത്തനം ആരംഭിച്ചു. പരിക്കേറ്റവരെ ഉടന്‍ തന്നെ അടുത്തുള്ള ആശുപത്രികളില്‍ പ്രവേശിപ്പിച്ചതായി റെസ്‌ക്യൂ 1122 വക്താവ് ബിലാല്‍ അഹമ്മദ് ഫൈസി വ്യക്തമാക്കി. സ്ഥിതിഗതികള്‍ വിലയിരുത്തുന്നതിനും തുടര്‍നടപടികള്‍ സ്വീകരിക്കുന്നതിനുമായി സുരക്ഷാ ഉദ്യോഗസ്ഥര്‍ സ്ഥലത്ത് ക്യാമ്പ് ചെയ്യുന്നുണ്ട്. ഖൈബര്‍ പക്തൂണ്‍ഖ്വയില്‍ നിലനില്‍ക്കുന്ന സുരക്ഷാ ഭീഷണികള്‍ക്കിടയിലാണ് ഈ ആക്രമണം നടന്നിരിക്കുന്നത്.