നഗോയ: ലൈംഗികാതിക്രമ ആരോപണവുമായി ബന്ധപ്പെട്ട പരാതി ഉയര്‍ന്നതിനെ തുടര്‍ന്ന് ഇന്ത്യന്‍ ഹോക്കി അമ്പയറും ടെക്‌നിക്കല്‍ ഒഫീഷ്യലുമായ ഗുരിന്ദര്‍ സിങ് സാംഘയെ ഏഷ്യന്‍ ഗെയിംസ് ഹോക്കി മത്സരങ്ങള്‍ക്കിടെ നാട്ടിലേക്ക് തിരിച്ചയച്ചു. മലേഷ്യന്‍ വനിതാ ഹോക്കി ഉദ്യോഗസ്ഥ നല്‍കിയ പരാതിയെ തുടര്‍ന്നാണ് നടപടി ഉണ്ടായതെന്നാണ് ഹോക്കി ഇന്ത്യയുമായി ബന്ധപ്പെട്ട വൃത്തങ്ങള്‍ പറയുന്നത്.
മലേഷ്യന്‍ വനിതാ ഉദ്യോഗസ്ഥയോടും ഹോട്ടല്‍ ജീവനക്കാരനോടും സാംഘ മോശമായി പെരുമാറിയെന്ന പരാതികളാണ് ഉയര്‍ന്നതെന്ന് ഹോക്കി ഇന്ത്യ വൃത്തങ്ങള്‍ അറിയിച്ചു. സംഭവത്തെ തുടര്‍ന്ന് രണ്ട് ദിവസം മുമ്പ് സാംഘ ഇന്ത്യയിലേക്ക് മടങ്ങിയതായും ഉദ്യോഗസ്ഥന്‍ വ്യക്തമാക്കി.
ഏഷ്യന്‍ ഹോക്കി ഫെഡറേഷനാണ് ഏഷ്യന്‍ ഗെയിംസിലെ ഹോക്കി മത്സരങ്ങളിലേക്കുള്ള അമ്പയര്‍മാരെയും ടെക്‌നിക്കല്‍ ഒഫീഷ്യല്‍മാരെയും നിയമിക്കുന്നത്. വിശദമായ റിപ്പോര്‍ട്ട് ലഭിച്ചശേഷം മാത്രമേ ഹോക്കി ഇന്ത്യ തുടര്‍നടപടി സ്വീകരിക്കൂ. ആരോപണങ്ങള്‍ ശരിയാണെന്ന് അന്വേഷണത്തില്‍ കണ്ടെത്തിയാല്‍ കര്‍ശന നടപടി സ്വീകരിക്കുമെന്ന് ഹോക്കി ഇന്ത്യ വൃത്തങ്ങള്‍ വ്യക്തമാക്കി.
സാംഘയ്‌ക്കെതിരെ പരാതി ഉയരുന്നത് ഇതാദ്യമല്ല. 025ലെ ഹോക്കി ഇന്ത്യ ലീഗിനിടെ റാഞ്ചിയിലും ഒരു വനിതാ അമ്പയര്‍ അദ്ദേഹത്തിനെതിരെ പരാതി നല്‍കിയിരുന്നു. തുടര്‍ന്ന് ഹോക്കി ഇന്ത്യ മൂന്നംഗ അന്വേഷണ സമിതിയെ നിയോഗിച്ചെങ്കിലും ആരോപണങ്ങള്‍ക്ക് മതിയായ തെളിവുകള്‍ കണ്ടെത്താനായില്ലെന്ന് പറഞ്ഞ് കുറ്റവിമുക്തനാക്കി.
ഈ വര്‍ഷം ദേശീയ വനിതാ ഹോക്കി ടീമിന്റെ സപ്പോര്‍ട്ട് സ്റ്റാഫിലെ ഒരാള്‍ക്കെതിരെയും പീഡനാരോപണം ഉയര്‍ന്നതിനെ തുടര്‍ന്ന് ഹോക്കി ഇന്ത്യ നടപടി സ്വീകരിച്ചിരുന്നു.
Related News
