നഗോയ: ജപ്പാനിലെ നഗോയയില്‍ നടക്കുന്ന 20-ാമത് ഏഷ്യന്‍ ഗെയിംസ് പുരുഷന്മാരുടെ 85 കിലോഗ്രാം വിഭാഗം ജിയു-ജിറ്റ്സു മത്സരത്തില്‍ സൗദി അറേബ്യയുടെ അബ്ദുല്ല നദായ്ക്ക് സ്വര്‍ണം. സൗദി അറേബ്യയുടെ ഈ ഗെയിംസിലെ മൂന്നാമത്തെ സ്വര്‍ണമാണിത്. ഈ നേട്ടത്തോടെ രാജ്യത്തിന്റെ ആകെ മെഡല്‍ നേട്ടം 14 ആയി ഉയര്‍ന്നു.

തന്റെ കന്നി ഏഷ്യന്‍ ഗെയിംസില്‍ മികച്ച പ്രകടനമാണ് 19 കാരനായ അബ്ദുല്ല കാഴ്ചവെച്ചത്. ഫൈനലില്‍ കസാഖ്സ്ഥാന്റെ മിരി കബ്ദുലയേവിനെ 7-0 എന്ന സ്‌കോറിനാണ് അദ്ദേഹം പരാജയപ്പെടുത്തിയത്.

പ്രീ-ക്വാര്‍ട്ടറില്‍ മംഗോളിയയുടെ അല്‍താഞ്ചെറല്‍ ബയാര്‍ഖുവിനെയും, ക്വാര്‍ട്ടറില്‍ ജപ്പാന്റെ ഗുവാറ്റ്‌സുകിയെയും സബ്മിഷന്‍ വഴിയാണ് അബ്ദുല്ല തോല്‍പ്പിച്ചത്. സെമിഫൈനലില്‍ ദക്ഷിണ കൊറിയയുടെ മിന്‍ഗ്യു കിമ്മിനെ 6-2 എന്ന സ്‌കോറിനും പരാജയപ്പെടുത്തിയാണ് അദ്ദേഹം ഫൈനലിലേക്ക് മുന്നേറിയത്.

കഴിഞ്ഞ ദിവസം 94 കിലോഗ്രാം വിഭാഗത്തില്‍ സ്വര്‍ണം നേടിയ സഹോദരന്‍ ഒമര്‍ നദായ്ക്ക് പിന്നാലെ, നഗോയയില്‍ ജിയു-ജിറ്റ്സു സ്വര്‍ണം നേടുന്ന രണ്ടാമത്തെ കുടുംബാംഗമായി മാറിയിരിക്കുകയാണ് അബ്ദുല്ല. ഏഷ്യന്‍ ഗെയിംസിലെ ജിയു-ജിറ്റ്സു മത്സരങ്ങളില്‍ സൗദി ടീം രണ്ട് സ്വര്‍ണവും മൂന്ന് വെങ്കലവുമടക്കം അഞ്ച് മെഡലുകള്‍ സ്വന്തമാക്കി.

നഗോയ 2026 ഗെയിംസില്‍ സൗദി അറേബ്യയുടെ ആകെ മെഡല്‍ നേട്ടം 3 സ്വര്‍ണവും 2 വെള്ളിയും 9 വെങ്കലവുമടക്കം 14 ആയി ഉയര്‍ന്നു.

വ്യക്തിഗത ഷോ ജമ്പിംഗില്‍ മുന്നില്‍3 നിന്ന് സൗദി റൈഡേഴ്‌സ്
വ്യക്തിഗത ഷോ ജമ്പിംഗ് മത്സരങ്ങളുടെ ഉദ്ഘാടന ദിവസം ഇരു ഗ്രൂപ്പുകളിലും സൗദി അറേബ്യന്‍ റൈഡേഴ്‌സ് ഒന്നാം സ്ഥാനത്ത് എത്തി.

1.45 മീറ്റര്‍ വിഭാഗത്തില്‍ നടന്ന ഗ്രൂപ്പ് 1 മത്സരത്തില്‍ ഖാലിദ് അല്‍മോബ്തി 74.38 സെക്കന്‍ഡില്‍ പിഴവുകളൊന്നുമില്ലാതെ ഒന്നാമതെത്തി. സഹതാരം സാദ് അല്‍-അജ്മി 75.18 സെക്കന്‍ഡില്‍ പിഴവുകളില്ലാതെ പൂര്‍ത്തിയാക്കി രണ്ടാം സ്ഥാനം നേടി.

1.55 മീറ്റര്‍ വിഭാഗത്തിലുള്ള ഗ്രൂപ്പ് 2 മത്സരത്തില്‍ അബ്ദുല്‍റഹ്‌മാന്‍ അല്‍രാജ്ഹി 72.87 സെക്കന്‍ഡില്‍ കുറ്റമറ്റ പ്രകടനത്തിലൂടെ ഒന്നാം സ്ഥാനം സ്വന്തമാക്കി. റംസി അല്‍-ദുഹാമി 73.95 സെക്കന്‍ഡില്‍ മൂന്നാം സ്ഥാനത്തെത്തി.

രണ്ടാം ഘട്ട മത്സരങ്ങള്‍ ഞായറാഴ്ച രാവിലെ 9:30-ന് ഗ്രൂപ്പ് 1-ഓടെ ആരംഭിക്കും. തുടര്‍ന്ന് 11:30-ന് ഗ്രൂപ്പ് 2 മത്സരങ്ങള്‍ നടക്കും. ഏഷ്യന്‍ ഗെയിംസ് ചരിത്രത്തില്‍ ആദ്യമായാണ് വ്യക്തിഗത ഷോ ജമ്പിംഗ് മത്സരം രണ്ട് ഗ്രൂപ്പുകളായി തിരിച്ച്, ഓരോ വിഭാഗത്തിലും സ്വര്‍ണ, വെള്ളി, വെങ്കല മെഡലുകള്‍ നല്‍കി മത്സരിപ്പിക്കുന്നത്.