ന്യൂഡല്‍ഹി- ഡല്‍ഹി ഷാഹ്ദര ജില്ലയിലെ കൃഷ്ണ നഗറിലുള്ള സര്‍ക്കാര്‍ സ്‌കൂളില്‍ പന്ത്രണ്ടാം ക്ലാസ് വിദ്യാര്‍ത്ഥിനി സ്വയം തീക്കൊളുത്തിയതായി റിപ്പോര്‍ട്ട്. ശനിയാഴ്ച നടന്ന സംഭവത്തിന് പിന്നാലെ പെണ്‍കുട്ടിയുടെ പക്കല്‍ നിന്നും മൂന്ന് പേജുള്ള കുറിപ്പ് പൊലീസ് കണ്ടെടുത്തു. സംഭവത്തില്‍ അന്വേഷണം പുരോഗമിക്കുകയാണെന്ന് അധികൃതര്‍ അറിയിച്ചു. പെണ്‍കുട്ടിയുടെ മരണവിവരം പൊലീസ് ഇതുവരെ സ്ഥിരീകരിച്ചിട്ടില്ല.
സ്‌കൂളില്‍ തീപിടിത്തമുണ്ടായതായി ലഭിച്ച പി.സി.ആര്‍ സന്ദേശത്തെ തുടര്‍ന്നാണ് വിവരമറിയുന്നത്. കൃഷ്ണ നഗര്‍ പൊലീസ് സ്റ്റേഷനില്‍ നിന്നുള്ള സംഘം സ്ഥലത്തെത്തിയപ്പോള്‍ സ്‌കൂളിലെ ഗാര്‍ഡ് റൂമിന് പിന്നില്‍ പെണ്‍കുട്ടിയെ ഗുരുതരമായി പൊള്ളലേറ്റ നിലയില്‍ കണ്ടെത്തുകയായിരുന്നുവെന്ന് ഡെപ്യൂട്ടി കമ്മീഷണര്‍ ഓഫ് പൊലീസ് പ്രസ്താവനയില്‍ വ്യക്തമാക്കി.
പെണ്‍കുട്ടിക്ക് 17 വയസ്സുണ്ടെന്നാണ് കുടുംബം പൊലീസിനെ അറിയിച്ചിട്ടുള്ളത്. പ്രാഥമിക പരിശോധനകള്‍ക്കിടെ സംഭവസ്ഥലത്തു നിന്നും പെണ്‍കുട്ടിയുടെ ബാഗില്‍ നിന്നും ചില സാമഗ്രികള്‍ കണ്ടെത്തിയിട്ടുണ്ട്. തെളിവുകള്‍ ശേഖരിക്കുന്നതിനായി ക്രൈം സീന്‍ ഇന്‍സ്‌പെക്ഷന്‍ ടീമും സ്‌കൂളിലെത്തി പരിശോധന നടത്തി. ഫയര്‍ ഫോഴ്‌സും പൊലീസും സ്ഥലത്തുണ്ടായിരുന്നതായും സംഭവത്തിലേക്ക് നയിച്ച സാഹചര്യങ്ങളെക്കുറിച്ച് വിശദമായി അന്വേഷിച്ചുവരികയാണെന്നും അധികൃതര്‍ അറിയിച്ചു.
Related News
