കോഴിക്കോട് : 68ാമത് സംസ്ഥാന സ്‌കൂള്‍ കായിക മേളക്ക് ഇന്ന് തിരശ്ശീല ഉയരും. അതിതീവ്ര മഴയുടെ ആശങ്കയിലാണ് കായിക കൗമാര മേള ഒരുങ്ങുന്നത്. ഇന്ന് (ഞായറാഴ്ച) വൈകിട്ട് നാലിന് കോഴിക്കോട്ട് മുഖ്യമന്ത്രി വി ഡി സതീശന്‍ കായികമേള ഉദ്ഘാടനം ചെയ്യും. നഗരത്തില്‍നിന്ന് 22 കിലോമീറ്റര്‍ അകലെയുള്ള ചാത്തമംഗലത്തെ എന്‍ഐടി സ്റ്റേഡിയമാണ് ഉദ്ഘാടന വേദി. മേളയുടെ ബ്രാന്‍ഡ് അംബാസഡര്‍ ഒളിമ്പ്യന്‍ പി ടി ഉഷ ദീപം തെളിക്കും. കായിക താരങ്ങളുടെ മാര്‍ച്ച് പാസ്റ്റും കലാവിരുന്നുമുണ്ടാകും. ആദ്യ ദിവസം മത്സരങ്ങളില്ല. 31വരെയാണ് കായികമേള.

കേന്ദ്ര കാലാവസ്ഥാ വകുപ്പ് കനത്ത കാറ്റും മഴയും പ്രവചിച്ച് കോഴിക്കോട്ട ഇന്ന് റെഡ് അലര്‍ട്ട് പ്രഖ്യാപിച്ചിരിക്കുകയാണ്. മേളയെ ഇത് പ്രതികൂലമായി ബാധിക്കുമോ എന്ന ആശങ്കയുണ്ട്.

ഇന്നു രാവിലെ ഒമ്പതിന് കോഴിക്കോട് കടപ്പുറത്തെത്തുന്ന സ്വര്‍ണക്കപ്പും ദീപശിഖയും മന്ത്രി എന്‍ ഷംസുദ്ദീന്‍ ഏറ്റുവാങ്ങും. ഭിന്നശേഷി കുട്ടികള്‍ക്കായുള്ള ഇന്‍ക്ലൂസീവ് കായിക മേളയ്ക്കൊപ്പം വിവിധ ഗെയിംസ് മത്സരങ്ങളും തിങ്കളാഴ്ച നടക്കും. അത്ലറ്റിക്സ് ചൊവ്വാഴ്ച ആണ് ആരംഭിക്കുക.

ഇക്കുറി 10 വേദികളിലായി 12 കായിക ഇനങ്ങളാണ്. ഗെയിംസ്, അത്ലറ്റിക്സ്, ഇന്‍ക്ലൂസീവ് സ്പോര്‍ട്സ് വിഭാഗങ്ങളിലായി പതിനായിരത്തോളം കായികതാരങ്ങള്‍ പങ്കെടുക്കും. സമാപന സമ്മേളനം 31ന് വൈകിട്ട് നാലിന് മന്ത്രി രമേശ് ചെന്നിത്തല ഉദ്ഘാടനംചെയ്യും. ഒളിമ്പ്യന്‍ അഞ്ജു ബോബി ജോര്‍ജ് വിശിഷ്ടാതിഥിയാകും.