.jpg)
മുംബൈ - നിതീഷ് തിവാരി സംവിധാനം ചെയ്യുന്ന ബിഗ് ബജറ്റ് ചിത്രം 'രാമായണ'ത്തിലെ 'മംഗള്‍ രംഗ്' എന്ന പുതിയ ഗാനത്തിനെതിരെ സോഷ്യല്‍ മീഡിയയില്‍ വ്യാപക അമര്‍ഷവും വിമര്‍ശനവും. എ.ആര്‍. റഹ്‌മാന്‍ ഈണം പകര്‍ന്ന് ശ്രേയാ ഘോഷാലും അരിജിത് സിംഗും ചേര്‍ന്ന് ആലപിച്ച ഗാനത്തില്‍ ഖവ്വാലി, സൂഫി സംഗീത ശൈലികള്‍ അനാവശ്യമായി തിരുകിക്കയറ്റിയെന്നാണ് ഒരു വിഭാഗം പ്രേക്ഷകരുടെ ആരോപണം.
രണ്‍ബീര്‍ കപൂര്‍ ശ്രീരാമനായും സായ് പല്ലവി സീതയായും വേഷമിടുന്ന ചിത്രത്തിലെ സീതാസ്വയംവരവും അയോധ്യയിലേക്കുള്ള വരവും ചിത്രീകരിക്കുന്നതാണ് ഈ ഗാനം. കുമാര്‍ വിശ്വാസാണ് ഗാനരചന നിര്‍വ്വഹിച്ചിരിക്കുന്നത്. എന്നാല്‍ ഗാനത്തിലെ ഈണവും വാദ്യോപകരണങ്ങളുടെ ഉപയോഗവും 'ഖവ്വാലി' ശൈലിയിലുള്ളതാണെന്നും, രാമായണം പോലൊരു ഇതിഹാസ കാവ്യത്തിന് അനുയോജ്യമായ പരമ്പരാഗത ഇന്ത്യന്‍ വാദ്യോപകരണങ്ങളോ സംസ്‌കൃതം കലര്‍ന്ന വരികളോ അല്ല റഹ്‌മാന്‍ ഉപയോഗിച്ചിരിക്കുന്നതെന്നും സോഷ്യല്‍ മീഡിയ പ്ലാറ്റ്ഫോമായ എക്സില്‍ വിമര്‍ശനമുയര്‍ന്നു.
റഹ്‌മാന്റെ തന്നെ മുന്‍കാല സൂപ്പര്‍ഹിറ്റ് ഗാനങ്ങളായ കണ്ടുകൊണ്ടേന്‍ കണ്ടുകൊണ്ടേന്‍ സിനിമയിലെ 'എന്ന സൊല്ല പോകിറായ്', റോക്ക്സ്റ്റാര്‍ സിനിമയിലെ സൂഫി ഗാനമായ 'കുന്‍ ഫയാ കുന്‍' എന്നിവയുടെ പകര്‍പ്പാണ് ഈ ഗാനമെന്നും ചിലര്‍ ആരോപിക്കുന്നു. ഛത്രപതി സംഭാജി മഹാരാജിന്റെ കഥ പറഞ്ഞ 'ഛാവ' എന്ന ചിത്രത്തിലും റഹ്‌മാന്‍ സമാനമായ രീതിയില്‍ സംഗീതത്തില്‍ ഇസ്ലാമിക്/സൂഫി സ്വാധീനം കൊണ്ടുവന്നുവെന്ന് ആരോപിച്ച് വിമര്‍ശനങ്ങള്‍ ഉയര്‍ന്നിരുന്നു. അജയ്-അതുല്‍ അല്ലെങ്കില്‍ ശങ്കര്‍-ഇഹ്‌സാന്‍-ലോയ് തുടങ്ങിയ സംഗീതസംവിധായകരായിരുന്നു ഈ ചിത്രത്തിന് കൂടുതല്‍ അനുയോജ്യരെന്നും ചില ഉപയോക്താക്കള്‍ അഭിപ്രായപ്പെട്ടു.
Related News
