പാരീസ് - ഉന്നത വിദ്യാഭ്യാസ മേഖലയിലെ പ്രതിസന്ധികളിലും വര്‍ധിച്ചുവരുന്ന ജീവിതച്ചെലവിലും പ്രതിഷേധിച്ച് രാജ്യവ്യാപകമായി നടക്കുന്ന വിദ്യാര്‍ത്ഥി പ്രക്ഷോഭങ്ങള്‍ക്ക് തടയിടാന്‍ നിര്‍ണായക പ്രഖ്യാപനങ്ങളുമായി ഫ്രഞ്ച് സര്‍ക്കാര്‍. വിദ്യാര്‍ത്ഥികളുടെ കടുത്ത അമര്‍ഷത്തിന് കാരണമായ സര്‍വകലാശാല പ്രവേശനത്തിനുള്ള നിലവിലെ ദേശീയ ഓണ്‍ലൈന്‍ പോര്‍ട്ടല്‍ 2028ഓടെ പൂര്‍ണ്ണമായും പുതിയ സംവിധാനം ഉപയോഗിച്ച് മാറ്റസ്ഥാപിക്കുമെന്ന് സര്‍ക്കാര്‍ ഉറപ്പുനല്‍കി.

ഉന്നത വിദ്യാഭ്യാസ മന്ത്രി ഫിലിപ്പ് ബാപ്റ്റിസ്റ്റ് ആണ് പ്രവേശന നടപടികളിലെ മാറ്റങ്ങള്‍ പ്രഖ്യാപിച്ചത്. 2027-ല്‍ പോര്‍ട്ടലില്‍ അടിസ്ഥാനപരമായ പരിഷ്‌കാരങ്ങള്‍ കൊണ്ടുവരുമെന്നും തൊട്ടടുത്ത വര്‍ഷം പോര്‍ട്ടല്‍ പൂര്‍ണ്ണമായും പൊളിച്ചെഴുതുമെന്നും അദ്ദേഹം വ്യക്തമാക്കി. പുറമേ, വിദ്യാഭ്യാസ സ്ഥാപനങ്ങളുടെ നവീകരണത്തിനായി 400 കോടി യൂറോയുടെ (450 കോടി യു.എസ് ഡോളര്‍) കുറഞ്ഞ പലിശനിരക്കിലുള്ള വായ്പ അനുമതി, ക്ലാസ് മുറികളിലെ വിദ്യാര്‍ത്ഥികളുടെ എണ്ണം കുറയ്ക്കല്‍, കൂടുതല്‍ അധ്യാപക തസ്തികകളും ഉപരിപഠന സീറ്റുകളും സൃഷ്ടിക്കല്‍, വിദ്യാര്‍ത്ഥി ഗ്രാന്റുകളുടെ തുക വര്‍ദ്ധിപ്പിക്കല്‍ എന്നീ പാക്കേജുകളും സര്‍ക്കാര്‍ പ്രഖ്യാപിച്ചു.

വിദ്യാഭ്യാസ മേഖലയിലെ അസംതൃപ്തിയെ തുടര്‍ന്നാണ് പ്രതിഷേധങ്ങള്‍ ആരംഭിച്ചതെങ്കിലും, പിന്നീട് തൊഴിലാളികളും സാധാരണക്കാരും ജീവിതച്ചെലവ് വര്‍ദ്ധനക്കെതിരെ പ്രക്ഷോഭത്തില്‍ അണിചേര്‍ന്നതോടെ വിഷയം സര്‍ക്കാരിന് കടുത്ത തലവേദനയായി മാറിയിരിക്കുകയാണ്. ഒക്ടോബര്‍ 17-ന് നടന്ന പ്രക്ഷോഭങ്ങള്‍ രാജ്യത്തുടനീളം കടുത്ത അക്രമ സംഭവങ്ങളിലേക്കും കൊള്ളയടിക്കലുകളിലേക്കും വഴിമാറിയിരുന്നു. ലിമോഗ്‌സ് നഗരസഭാ കെട്ടിടത്തിന് തീയിടുകയും മാര്‍സെയിലെ ടൗണ്‍ ഹാള്‍ ആക്രമിക്കുകയും ചെയ്ത പ്രക്ഷോഭകര്‍ക്കെതിരെ പൊലീസ് ശക്തമായ നടപടിയെടുക്കുകയും 2,400-ഓളം പേരെ അറസ്റ്റ് ചെയ്യുകയും ചെയ്തു.

അതിനിടെ, പ്രധാനമന്ത്രി സെബാസ്റ്റ്യന്‍ ലെകോര്‍ണുവുമായി നടത്തിയ ചര്‍ച്ചകള്‍ക്ക് ശേഷം ചില മാറ്റങ്ങളെ സ്വാഗതം ചെയ്ത പ്രൈമറി, ഹൈസ്‌കൂള്‍ വിദ്യാര്‍ത്ഥി സംഘടനകള്‍ പ്രതിഷേധം തുടരുമെന്ന് വ്യക്തമാക്കിയിട്ടുണ്ട്. ഒക്ടോബര്‍ 31-ന് കൂടുതല്‍ പ്രകടനങ്ങളും നവംബര്‍ 5-ന് തൊഴിലാളി യൂണിയനുകളുടെ നേതൃത്വത്തില്‍ രാജ്യവ്യാപക പണിമുടക്കും പ്രഖ്യാപിച്ചിട്ടുണ്ട്.