കാരാക്കാസ് - ഒരു വര്‍ഷത്തോളമായി പനാമയില്‍ നാടുകടത്തലില്‍ കഴിഞ്ഞിരുന്ന വെനസ്വേലന്‍ പ്രതിപക്ഷ നേതാവും നോബല്‍ സമ്മാന ജേതാവുമായ മരിയ കോറിന മച്ചാഡോ രാജ്യത്ത് തിരിച്ചെത്തി. ഞായറാഴ്ച സോഷ്യല്‍ മീഡിയ പ്ലാറ്റ്ഫോമായ എക്സിലൂടെ 'ഞാന്‍ ഇവിടെ നിങ്ങളോടൊപ്പമുണ്ട്' എന്ന് കുറിച്ചുകൊണ്ടാണ് അവര്‍ തിരിച്ചെത്തിയ വിവരം ലോകത്തെ അറിയിച്ചത്.
തലസ്ഥാനമായ കാരാക്കാസില്‍നിന്ന് 400 കിലോമീറ്റര്‍ അകലെയുള്ള ലാറ സംസ്ഥാനത്തിലെ ബാര്‍ക്വിസിമെറ്റോയിലുള്ള സാന്താ റോസ പള്ളിയില്‍ അവര്‍ സന്ദര്‍ശനം നടത്തി. പള്ളിയിലെത്തിയ മച്ചാഡോയെ വൈകാരികമായാണ് അണികള്‍ സ്വീകരിച്ചത്. രാജ്യത്തേക്ക് തിരികെയെത്താന്‍ സാധിച്ചതില്‍ പ്രാര്‍ത്ഥനകള്‍ അര്‍പ്പിച്ച അവര്‍, ദേശീയഗാനവും ആലപിച്ചു. തുടര്‍ന്ന് യാരാകുയിലെ ചിവാക്കോവ, കാരബോബോ, മറാക്കെ എന്നീ സ്ഥലങ്ങള്‍ സന്ദര്‍ശിച്ച് കാരാക്കാസിലേക്ക് യാത്ര തിരിക്കാനാണ് അവരുടെ പദ്ധതി.
നേരത്തെ ഏഴിലധികം തവണ മച്ചാഡോ രാജ്യത്തേക്ക് തിരിച്ചെത്താന്‍ ശ്രമിച്ചിരുന്നെങ്കിലും ഭരണകൂടം അത് തടയുകയായിരുന്നുവെന്ന് അവരുടെ പാര്‍ട്ടിയായ 'വെന്റെ വെനസ്വേല' ആരോപിച്ചിരുന്നു. എന്നാല്‍ അമേരിക്കന്‍ പ്രസിഡന്റ് ഡൊണാള്‍ഡ് ട്രംപ് മച്ചാഡോയുടെ തിരിച്ചുവരവിനെ സ്വാഗതം ചെയ്യുകയും അവരുടെ സുരക്ഷയില്‍ ആശങ്ക പ്രകടിപ്പിക്കുകയും ചെയ്തു. വാഷിംഗ്ടണ്‍ സ്‌പോണ്‍സര്‍ ചെയ്ത അനുരഞ്ജന ചര്‍ച്ചകളുടെ നേരിട്ടുള്ള ഫലമാണ് അവരുടെ മടങ്ങിവരവെന്ന് യു.എസ് സ്റ്റേറ്റ് സെക്രട്ടറി മാര്‍ക്കോ റൂബിയോ വ്യക്തമാക്കി.
മുന്‍ പ്രസിഡന്റ് നിക്കോളാസ് മഡൂറോയെ യു.എസ് സേന പിടികൂടിയതിനെ തുടര്‍ന്ന് നിലവില്‍ ആക്ടിംഗ് പ്രസിഡന്റായി വൈസ് പ്രസിഡന്റ് ഡെല്‍സി റോഡ്രിഗസ് ഭരണത്തിന് നേതൃത്വം നല്‍കിവരികയാണ്. എന്നാല്‍ ഭരണഘടന അനുസരിച്ച് പുതിയ തെരഞ്ഞെടുപ്പ് തീയതി പ്രഖ്യാപിക്കാന്‍ റോഡ്രിഗസ് തയ്യാറായിട്ടില്ല. ഈ സാഹചര്യത്തില്‍ മച്ചാഡോയുടെ തിരിച്ചുവരവ് വെനസ്വേലയിലെ ജനാധിപത്യ പുനഃസ്ഥാപനത്തിനും സ്വതന്ത്ര തെരഞ്ഞെടുപ്പിനുമുള്ള നീക്കങ്ങള്‍ക്ക് വലിയ ഊര്‍ജ്ജമാകുമെന്ന് മറ്റ് പ്രതിപക്ഷ നേതാക്കളായ എഡ്മണ്ടോ ഗോണ്‍സാലസ് ഉറുതിയയും എന്റിക് കാപ്രില്‍സും അഭിപ്രായപ്പെട്ടു.
Related News
