ബെയറി- 2023 ഒക്ടോബര്‍ 7-ലെ ഹമാസ് ആക്രമണത്തില്‍ കൊല്ലപ്പെട്ട പുരുഷന്മാരുടെയും സ്ത്രീകളുടെയും കുഞ്ഞുങ്ങളുടെയും പേരുകള്‍ കൊത്തിവെച്ച സ്മാരക മതിലിന് മുന്നിലൂടെ ഗാല്‍ കോഹന്‍ നടക്കുകയാണ്. അദ്ദേഹത്തെ സംബന്ധിച്ചിടത്തോളം, ആ ദിനത്തിലും അതിനുശേഷവും രാജ്യത്തെ നയിച്ച വ്യക്തി തന്നെ ചൊവ്വാഴ്ച വീണ്ടും അധികാരത്തിലെത്തിയേക്കാം എന്ന ചിന്തപോലും അതീവ വേദനാജനകമാണ്.

ബെയറി കിബ്ബുട്സിലെ ജനസംഖ്യയില്‍ പത്തിലൊരാള്‍ എന്ന കണക്കിലാണ് ഹമാസിന്റെ മിന്നലാക്രമണത്തില്‍ കൊല്ലപ്പെട്ടത്. ആകെ കൊല്ലപ്പെട്ട 1,200 പേരില്‍ വലിയൊരു ഭാഗം ഇവിടെ നിന്നുള്ളവരായിരുന്നു. ഗാസയിലേക്ക് ബന്ദികളാക്കി കൊണ്ടുപോയ 251 പേരില്‍ ഡസന്‍ കണക്കിന് ആളുകളും ഇവിടുത്തെ നിവാസികളായിരുന്നു. ഇസ്രായേലിന്റെ ചരിത്രത്തിലെ ഏറ്റവും ഭീകരമായ ദിനമായിരുന്നു അത്.

നീതിപൂര്‍വ്വം ചിന്തിച്ചാല്‍ പ്രധാനമന്ത്രി ബെഞ്ചമിന്‍ നെതന്യാഹു ആ ദുരന്തത്തിന്റെ ഉത്തരവാദിത്തമേറ്റെടുത്ത് രാജിവെക്കുകയായിരുന്നു വേണ്ടതെന്ന് 61-കാരനായ കോഹന്‍ പറയുന്നു. എന്നാല്‍ അദ്ദേഹം കാലാവധി തികച്ചു ഭരിച്ചു എന്നത് ജനങ്ങളെ അപമാനിക്കുന്നതിന് തുല്യമാണ്. നളെ നടക്കുന്ന തിരഞ്ഞെടുപ്പ് ഇസ്രായേലിന്റെ ഭാവിക്ക് തന്നെ നിര്‍ണ്ണായകമാണെന്ന് കോഹന്‍ കൂട്ടിച്ചേര്‍ക്കുന്നു.

'ഈ ഭരണകൂടം തന്നെ വീണ്ടും അധികാരത്തില്‍ തുടരുകയാണെങ്കില്‍, ജനങ്ങളുടെ പ്രതീക്ഷകളും ഹൃദയങ്ങളും തകര്‍ന്നടിയും. മുന്നോട്ടു പോവുക എന്നത് വളരെ പ്രയാസകരമായിരിക്കും,' കോഹന്‍ പറഞ്ഞു.

തലമുറകള്‍ കണ്ട ഏറ്റവും വലിയ സുരക്ഷാ വീഴ്ചയ്ക്ക് നെതന്യാഹുവിന് ഒടുവില്‍ മറുപടി പറയേണ്ടി വരുമെന്നാണ് അദ്ദേഹത്തിന്റെ രാഷ്ട്രീയ എതിരാളികള്‍ കരുതുന്നത്. എന്നാല്‍ ഇസ്രായേലില്‍ ഏറ്റവും കൂടുതല്‍ കാലം പ്രധാനമന്ത്രിയായിരുന്ന നെതന്യാഹുവിന് ഭൂരിപക്ഷം നഷ്ടപ്പെട്ടാല്‍ പോലും, വിചാരണയില്‍ നിന്നും തന്ത്രപരമായി രക്ഷപ്പെടാന്‍ അദ്ദേഹത്തിന് കഴിഞ്ഞേക്കും.

സുരക്ഷാ വീഴ്ചയുടെ ഉത്തരവാദിത്തം ഏറ്റെടുക്കാന്‍ നെതന്യാഹു ഇതുവരെ തയ്യാറായിട്ടില്ല. സ്വതന്ത്ര അന്വേഷണം വേണമെന്ന ആവശ്യങ്ങളെയും അദ്ദേഹം എതിര്‍ത്തു. ഗാസയിലെ ഹമാസിനും ലെബനനിലെയും ഇറാനിലെയും അവരുടെ സഖ്യകക്ഷികള്‍ക്കുമെതിരെ ഇസ്രായേല്‍ നടത്തുന്ന പോരാട്ടങ്ങള്‍ ഒടുവില്‍ മിഡില്‍ ഈസ്റ്റില്‍ സമാധാനം കൊണ്ടുവരുമെന്നാണ് അദ്ദേഹത്തിന്റെ വാദം.

ഇറാനിലെ ഭരണാധികാരികളുടെ പതനത്തോടെ മാത്രമേ തങ്ങളുടെ ലക്ഷ്യം പൂര്‍ത്തിയാകൂ എന്നും, അതിന് ദൃഢനിശ്ചയവും അന്താരാഷ്ട്ര തലത്തില്‍ വ്യക്തിത്വവുമുള്ള ഒരേയൊരു നേതാവ് താന്‍ മാത്രമാണെന്നുമാണ് നെതന്യാഹു പ്രചാരണ വേളകളില്‍ അവകാശപ്പെടുന്നത്.

മാസങ്ങളായി പുറത്തുവരുന്ന അഭിപ്രായ സര്‍വേകള്‍ നെതന്യാഹുവിന്റെ 'ലിക്കുഡ്' പാര്‍ട്ടിക്ക് വലിയ തിരിച്ചടിയുണ്ടാകുമെന്ന് പ്രവചിക്കുന്നു. എന്നാല്‍ വലത്, ഇടത്, മധ്യപക്ഷ പാര്‍ട്ടികള്‍ അടങ്ങുന്ന പ്രതിപക്ഷ സഖ്യത്തിനും ഭൂരിപക്ഷം ഉറപ്പിക്കാന്‍ സാധിച്ചിട്ടില്ല. ഇത് രാജ്യത്ത് രാഷ്ട്രീയ അനിശ്ചിതത്വത്തിന് വഴിവെച്ചേക്കാം. അങ്ങനെ സംഭവിച്ചാല്‍ ഒരു താത്കാലിക സര്‍ക്കാരിന്റെ തലവനായി നെതന്യാഹു തന്നെ അധികാരത്തില്‍ തുടരാനും സാധ്യതയുണ്ട്.

'വലതുപക്ഷത്തേക്ക് മാറിയ ചിന്തകള്‍'

ഒക്ടോബര്‍ 7-ന് ശേഷമുള്ള ദിവസങ്ങളില്‍, തകര്‍ന്നടിഞ്ഞതും കത്തിയമര്‍ന്നതുമായ വീടുകള്‍ക്കിടയിലൂടെ ഇസ്രായേല്‍ സൈനികര്‍ കാവല്‍ നില്‍ക്കുന്ന കാഴ്ചയായിരുന്നു ബെയറിയില്‍. രക്തക്കറ പുരണ്ട തറകളും വെടിയുണ്ടകള്‍ തുളച്ചുകയറിയ വാതിലുകളും മൃതദേഹങ്ങളുടെ ദുര്‍ഗന്ധവും അന്ന് അവിടെ നിറഞ്ഞുനിന്നിരുന്നു. പീരങ്കിയുണ്ടകളുടെയും യുദ്ധവിമാനങ്ങളുടെയും ഭീകര ശബ്ദങ്ങള്‍ ഒഴിഞ്ഞുമാറിയിരുന്നില്ല.

മൂന്ന് വര്‍ഷങ്ങള്‍ക്കിപ്പുറം, പച്ചപ്പ് നിറഞ്ഞ ഈ ഗ്രാമം വീണ്ടും ജീവസ്സുറ്റതായി മാറുകയാണ്. പുതിയ വീടുകളുടെ നിര്‍മ്മാണ ശബ്ദങ്ങള്‍ എങ്ങും കേള്‍ക്കാം. നിലവില്‍ മറ്റൊരു പ്രദേശത്ത് താമസിക്കുന്ന ഭൂരിഭാഗം നിവാസികളും വരും വേനല്‍ക്കാലത്തോടെ തിരികെ എത്തും.

1946-ല്‍ സ്ഥാപിതമായ, ഏകദേശം ആയിരത്തോളം നിവാസികളുള്ള ഈ കൂട്ടായ്മ ഇസ്രായേലിന്റെ ആദ്യകാല സോഷ്യലിസ്റ്റ് ആശയങ്ങളുടെ പ്രതീകമാണ്. 2022-ലെ തിരഞ്ഞെടുപ്പില്‍ ഇവിടുത്തെ ബഹുഭൂരിപക്ഷം വോട്ടുകളും കേന്ദ്ര-ഇടതുപക്ഷ പാര്‍ട്ടികള്‍ക്കാണ് ലഭിച്ചത്. നെതന്യാഹുവിന്റെ സഖ്യത്തിന് നാല് ശതമാനം വോട്ട് മാത്രമാണ് ഇവിടെ ലഭിച്ചിരുന്നത്.

എന്നാല്‍, ഹമാസ് ആക്രമണം ഇവിടുത്തെ നിവാസികളുടെ രാഷ്ട്രീയ കാഴ്ചപ്പാടുകളെപ്പോലും സ്വാധീനിച്ചിട്ടുണ്ട്. ഫലസ്തീനുമായി സമാധാനം സാധ്യമാണ് എന്ന ദീര്‍ഘകാല വിശ്വാസത്തെക്കുറിച്ച് ചിന്തിക്കാന്‍ അവര്‍ നിര്‍ബന്ധിതരായി.

'ബെയറിയിലെ എല്ലാവരുടെയും ചിന്തകള്‍ വലതുപക്ഷത്തേക്ക് മാറി തുടങ്ങി. എങ്കിലും ഭൂരിഭാഗം ആളുകളും നിലവിലെ ഭരണകൂട മാറ്റം ആഗ്രഹിക്കുന്ന പ്രതിപക്ഷത്തിനൊപ്പം തന്നെ നിലകൊള്ളുമെന്നാണ് ഞാന്‍ കരുതുന്നത്,' കോഹന്‍ പറഞ്ഞു.

ബെയറിയിലെ മൂന്നാം തലമുറക്കാരിയായ 48-കാരി മിരി ഗാഡ് മെസ്സിക്ക ആര്‍ക്ക് വോട്ട് ചെയ്യണമെന്ന് ഇതുവരെ തീരുമാനിച്ചിട്ടില്ല. എന്നാല്‍ അത് നെതന്യാഹുവിന് ആയിരിക്കില്ലെന്ന് ഉറപ്പിച്ചു പറയുന്നു.

'ഒരു നേതാവ് എന്ന നിലയില്‍ അദ്ദേഹം പലതവണ പരാജയപ്പെട്ടു. ഇനി അദ്ദേഹം രാഷ്ട്രീയത്തില്‍ തുടരരുത്. ഒരു നല്ല നേതാവിനായി ഞാന്‍ തിരയുകയാണ്, എന്നാല്‍ നിലവില്‍ ഇസ്രായേലില്‍ അങ്ങനെ ഒരാളെ കാണുക പ്രയാസമാണ്,' അവര്‍ പറഞ്ഞു. 'പ്രതീക്ഷയോടെ ഇരിക്കാനാണ് എനിക്കിഷ്ടം, ഒരു നല്ല മാറ്റമുണ്ടാകുമെന്ന് ഞാന്‍ കരുതുന്നു.'

'വേദനയേക്കാള്‍ ശക്തമാണ് പ്രതീക്ഷ'

കഴിഞ്ഞ മൂന്ന് വര്‍ഷമായി, ഗാസയില്‍ ബന്ദികളാക്കപ്പെട്ടവരുടെ കുടുംബാംഗങ്ങളാണ് നെതന്യാഹു ഭരണകൂടത്തിനെതിരായ പ്രതിഷേധങ്ങള്‍ക്ക് നേതൃത്വം നല്‍കുന്നത്. സര്‍ക്കാരിന്റെ വീഴ്ചയാണ് പ്രിയപ്പെട്ടവരുടെ മോചനത്തിന് തടസ്സമായതെന്ന് അവര്‍ ആരോപിക്കുന്നു.

ടെല്‍ അവീവിലെ ഒരു പൊതുചതുരം ഇന്ന് 'ബന്ദികളുടെ ചതുരം' എന്നാണ് അറിയപ്പെടുന്നത്. ഒരു വര്‍ഷം മുമ്പ് അമേരിക്കയുടെ മധ്യസ്ഥതയില്‍ നിലവില്‍ വന്ന വെടിനിര്‍ത്തലിലൂടെ അവസാന ബന്ദികളും മോചിതരായെങ്കിലും, ഉത്തരവാദികള്‍ മറുപടി പറയണമെന്ന ആവശ്യത്തില്‍ ഈ കുടുംബങ്ങള്‍ ഇപ്പോഴും ഉറച്ചുനില്‍ക്കുന്നു.

'ഈ സര്‍ക്കാര്‍ വീണ്ടും തിരഞ്ഞെടുപ്പില്‍ മത്സരിക്കുന്നതിന് ന്യായമായ ഒരു കാരണവും ഞാന്‍ കാണുന്നില്ല,' ഗാസയില്‍ കൊല്ലപ്പെട്ട രണ്ട് കുഞ്ഞുങ്ങളുടെയും അമ്മയുടെയും ബന്ധുവായ ഓഫ്രി ബിബാസ് പറയുന്നു. (2025ന്റെ തുടക്കത്തില്‍ നടന്ന വെടിനിര്‍ത്തലിലൂടെയാണ് ഓഫ്രിയുടെ സഹോദരനും കുട്ടികളുടെ പിതാവുമായ യാര്‍ഡന്‍ മോചിതനായത്).

ഒക്ടോബര്‍ 7-ലെ സംഭവം എല്ലാ ഇസ്രായേലികളും ഓര്‍ക്കണമെന്നാണ് തന്റെ ആഗ്രഹമെന്ന് ബിബാസ് പറയുന്നു. വോട്ട് ചെയ്യുമ്പോള്‍ അവിടെ എന്താണ് സംഭവിച്ചതെന്നും ആരാണ് ഇതിന് ഉത്തരവാദികളെന്നും ഓരോരുത്തരും ഓര്‍ക്കണം.

കഴിഞ്ഞ ശനിയാഴ്ച ആയിരക്കണക്കിന് ആളുകളാണ് 'ഹോസ്റ്റജസ് സ്‌ക്വയറില്‍' തടിച്ചുകൂടിയത്. നിര ഓസില്‍ നിന്ന് തന്റെ അഞ്ച് വയസ്സുള്ള മകളോടൊപ്പം തട്ടിക്കൊണ്ടുപോകപ്പെടുകയും പിന്നീട് മോചിപ്പിക്കപ്പെടുകയും ചെയ്ത ഡാനിയേല്‍ അലോണി അവിടെ സംസാരിച്ചു:

'പോയി വോട്ട് ചെയ്യൂ,' അലോണി ജനക്കൂട്ടത്തോട് ആഹ്വാനം ചെയ്തു. 'മൂന്ന് ദിവസത്തിനുള്ളില്‍ നമ്മുടെ കുട്ടികള്‍ക്കായി ഒരു പുതിയ അധ്യായം എഴുതിത്തുടങ്ങാന്‍ നമുക്ക് കഴിയും. ഭയത്തേക്കാള്‍ സത്യത്തിനും, വീഴ്ചകളേക്കാള്‍ ഉത്തരവാദിത്തത്തിനും, വേദനയേക്കാള്‍ പ്രതീക്ഷയ്ക്കും ശക്തിയുള്ള ഒരു പുതിയ ഭാവി!'