റിയാദ്: 'നിങ്ങള്‍ ആഗ്രഹിക്കുന്ന രീതിയില്‍ സൗദി ശീതകാലം' എന്ന മുദ്രാവാക്യമുയര്‍ത്തി ഈ വര്‍ഷത്തെ സൗദി വിന്റര്‍ സീസണ്‍ പരിപാടികളുടെ കലണ്ടര്‍ ടൂറിസം മന്ത്രി അഹമ്മദ് അല്‍-ഖതീബ് പുറത്തിറക്കി. രാജ്യത്തിന്റെ വിവിധ വിനോദസഞ്ചാര കേന്ദ്രങ്ങളില്‍ നിന്നായി വന്‍തോതിലുള്ള ടൂറിസം പ്രവൃത്തികളും കലാ-സാംസ്‌കാരിക പരിപാടികളുമാണ് ഈ ശീതകാല സീസണില്‍ ഒരുക്കിയിരിക്കുന്നത്.
റിയാദ്, അല്‍-ഉല, അല്‍-ഖസീം, ഹായില്‍, ജിദ്ദ, അല്‍-ഖോബാര്‍, അല്‍-അഹ്‌സ, മദീന, ചെങ്കടല്‍ തീരങ്ങള്‍ തുടങ്ങി രാജ്യത്തെ പ്രധാന വിനോദസഞ്ചാര മേഖലകളിലാണ് സീസണ്‍ പരിപാടികള്‍ കേന്ദ്രീകരിച്ചിരിക്കുന്നത്. കുടുംബങ്ങള്‍ക്കും വിവിധ പ്രായക്കാര്‍ക്കും ഒരുപോലെ ആസ്വദിക്കാന്‍ സാധിക്കുന്ന വിനോദം, സംസ്‌കാരം, കായികം, സാഹസിക വിനോദങ്ങള്‍, മരുഭൂമി യാത്രകള്‍, റിസോര്‍ട്ട് സ്റ്റേകള്‍, അന്താരാഷ്ട്ര തരം ഭക്ഷണശാലകള്‍, ഷോപ്പിംഗ് എന്നിവ ഉള്‍പ്പെടെയുള്ള വിശാലമായ അവസരങ്ങളാണ് സന്ദര്‍ശകര്‍ക്കായി തുറന്നിടുന്നത്.
സൗദി ടൂറിസം അതോറിറ്റി പൊതു-സ്വകാര്യ മേഖലയിലെ നൂറിലധികം പങ്കാളികളെ പങ്കെടുപ്പിച്ചുകൊണ്ട് സൗദി വിന്റര്‍ പ്രോഗ്രാമിനായി പ്രത്യേക വര്‍ക്ക്ഷോപ്പ് സംഘടിപ്പിച്ചു. രാജ്യത്തിന്റെ വിനോദസഞ്ചാര മേഖലയുടെ ആകര്‍ഷണീയത വര്‍ദ്ധിപ്പിക്കുന്നതിനായി 1800-ലധികം ടൂറിസം ഉല്‍പ്പന്നങ്ങളും നിരവധി ഗുണനിലവാരമുള്ള പരിപാടികളുമാണ് ഈ വര്‍ഷത്തെ ശീതകാല സീസണിന്റെ ഭാഗമായി അവതരിപ്പിക്കുന്നത്.
Related News
