ന്യൂഡല്‍ഹി: ഡല്‍ഹിയിലെ വോട്ടര്‍പട്ടികയുടെ പ്രത്യേക തീവ്ര പരിഷ്‌കരണ (എസ്.ഐ.ആര്‍) നടപടിക്കിടെ മുസ്‌ലിം വോട്ടര്‍മാരുടെ പേരുകള്‍ വ്യാപകമായി വെട്ടാന്‍ ശ്രമം നടന്നെന്ന് ദ ഹിന്ദു പത്രം നടത്തിയ അന്വേഷണത്തില്‍ തെളിഞ്ഞു. ബി.ജെ.പി നിയോഗിച്ച ബൂത്ത് ലെവല്‍ ഏജന്റുമാരാണ് ഇതിനായി അപേക്ഷകള്‍ സമര്‍പ്പിച്ചതെന്നാണ് റിപ്പോര്‍ട്ട്. വടക്കുകിഴക്കന്‍ ഡല്‍ഹിയിലെ മുസ്തഫാബാദ് മണ്ഡലത്തില്‍ വോട്ടര്‍പട്ടികയില്‍നിന്ന് പേരുകള്‍ നീക്കാന്‍ സമര്‍പ്പിച്ച ഫോം 7 അപേക്ഷകളില്‍ 68 ശതമാനത്തോളം ബി.ജെ.പി ബൂത്ത് ലെവല്‍ ഏജന്റുമാരുടേതാണെന്ന് 'ദ ഹിന്ദു' റിപ്പോര്‍ട്ട് ചെയ്തു. അപേക്ഷകളിലെല്ലാം മുസ്‌ലിം വോട്ടര്‍മാരെയാണ് ലക്ഷ്യമിട്ടിരിക്കുന്നതെന്നും റിപ്പോര്‍ട്ടില്‍ പറയുന്നു.
മുസ്തഫാബാദിലെ ദയാല്‍പുര്‍ പ്രദേശത്ത് രണ്ട് പതിറ്റാണ്ടിലേറെയായി ഒരേ വിലാസത്തില്‍ താമസിക്കുന്ന തയ്യല്‍ക്കാരനായ സാജിദ് ഹുസൈന് ഒക്ടോബര്‍ 28നാണ് കുടുംബാംഗങ്ങള്‍ക്കെതിരായ അപേക്ഷകളെക്കുറിച്ച് അറിവായത്. ഭാര്യ അഫ്‌സാന ഖാത്തൂന്റെയും മകന്‍ അസദ് റസാ സൈദിയുടെയും പേരുകള്‍ വോട്ടര്‍പട്ടികയില്‍നിന്ന് നീക്കണമെന്നാവശ്യപ്പെട്ടാണ് ഫോം 7 സമര്‍പ്പിച്ചിരുന്നത്.
തന്റെ ഭാര്യയ്ക്കും മകനുമെതിരെ അപേക്ഷ നല്‍കിയ വ്യക്തിയെക്കുറിച്ച് അറിയില്ലെന്ന് സാജിദ് ഹുസൈന്‍ പറഞ്ഞു. പ്രദേശത്തെ 28 വോട്ടര്‍മാര്‍ക്കെതിരെയാണ് സമാനമായ രീതിയില്‍ പേരുകള്‍ നീക്കം ചെയ്യാന്‍ അപേക്ഷകള്‍ സമര്‍പ്പിച്ചിരുന്നത്. വോട്ടര്‍മാര്‍ താമസസ്ഥലത്തുനിന്ന് സ്ഥിരമായി മാറിപ്പോയെന്നോ മരിച്ചെന്നോ ചൂണ്ടിക്കാട്ടിയാണ് അപേക്ഷകള്‍ നല്‍കിയിരിക്കുന്നത്.
തിരഞ്ഞെടുപ്പ് കമ്മീഷന്റെ രേഖകള്‍ പ്രകാരം ഈ അപേക്ഷകളെല്ലാം ബി.ജെ.പി നിയോഗിച്ച ബൂത്ത് ലെവല്‍ ഏജന്റ്2 (ബി.എല്‍.എ2) ചന്ദ്രശേഖര്‍ നൈന്വാളാണ് സമര്‍പ്പിച്ചത്.
വോട്ടര്‍പട്ടികയിലെ പേര് നീക്കം ചെയ്യുന്നതിനുള്ള നടപടികള്‍ക്കായി ഉപയോഗിക്കുന്ന ഫോം 7, എസ്.ഐ.ആറിന്റെ ഭാഗമായി നടക്കുന്ന അവകാശവാദങ്ങളും എതിര്‍പ്പുകളും പരിഗണിക്കുന്ന ഘട്ടത്തിലാണ് സമര്‍പ്പിക്കപ്പെട്ടത്. ഒരേ വിലാസത്തില്‍ വര്‍ഷങ്ങളായി താമസിക്കുന്നവരുടെ പേരുകള്‍ പോലും നീക്കം ചെയ്യാന്‍ അപേക്ഷ നല്‍കിയെന്ന ആരോപണം നടപടിയുടെ സുതാര്യതയെക്കുറിച്ചും വോട്ടര്‍മാരുടെ അവകാശങ്ങളെക്കുറിച്ചും ചോദ്യങ്ങളുയര്‍ത്തുന്നു.
അപേക്ഷകളിലെ ആരോപണങ്ങളും ബന്ധപ്പെട്ട വോട്ടര്‍മാരുടെ താമസവിവരങ്ങളും തിരഞ്ഞെടുപ്പ് അധികൃതര്‍ പരിശോധിച്ച ശേഷമായിരിക്കും പേരുകള്‍ നീക്കം ചെയ്യുന്നതുമായി ബന്ധപ്പെട്ട അന്തിമ തീരുമാനം ഉണ്ടാകുക.