ലോസ് ആഞ്ചലസ്: ഹോളിവുഡിലെ വിഖ്യാത നടന്‍ പാട്രിക് സ്റ്റുവര്‍ട്ട് (86) അന്തരിച്ചു. ലോസ് ആഞ്ചലസിലായിരുന്നു അന്ത്യം. അല്‍ഷിമേഴ്സ് രോഗവും ഡിമെന്‍ഷ്യയും ബാധിച്ചിരുന്ന അദ്ദേഹം 'ഹ്രസ്വവും ഹൃദയസ്പര്‍ശിയുമായ യാത്രയ്ക്ക്' ശേഷമാണ് വിടവാങ്ങിയതെന്ന് വക്താവ് കെല്ലി ബുഷ് നോവാക് അറിയിച്ചു. രോഗവിവരങ്ങള്‍ ഇതുവരെ പരസ്യപ്പെടുത്തിയിരുന്നില്ല.
നാടകവേദിയിലും സിനിമയിലും ഒരുപോലെ ശ്രദ്ധേയനായിരുന്നു സ്റ്റുവര്‍ട്ട്. ഷേക്സ്പിയര്‍ നാടകങ്ങളിലെ അഭിനയമികവ് സയന്‍സ് ഫിക്ഷന്‍, സൂപ്പര്‍ഹീറോ സിനിമകളിലേക്കും എത്തിച്ച താരമായിരുന്നു. 'സ്റ്റാര്‍ ട്രെക്ക്' പരമ്പരയിലെ ക്യാപ്റ്റന്‍ ജീന്‍ലൂക് പിക്കാര്‍ഡ് എന്ന കഥാപാത്രത്തിലൂടെയും 'എക്സ്മെന്‍' സിനിമകളിലെ പ്രൊഫസര്‍ ചാള്‍സ് സേവ്യര്‍ എന്ന കഥാപാത്രത്തിലൂടെയും ലോകമെമ്പാടുമുള്ള പ്രേക്ഷകരുടെ പ്രിയങ്കരനായി.
'എക്സ്മെന്‍' സിനിമകളില്‍ സ്റ്റുവര്‍ട്ടിനൊപ്പം അഭിനയിച്ച ഹ്യൂ ജാക്ക്മാന്‍ അദ്ദേഹത്തിന്റെ വിയോഗത്തില്‍ അനുശോചനം രേഖപ്പെടുത്തി. നാടകസിനിമാ ലോകത്തെ മഹാന്മാരില്‍ ഒരാളെയാണ് നഷ്ടമായതെന്നും മികച്ച സുഹൃത്തും വ്യക്തിത്വവുമായിരുന്നു അദ്ദേഹമെന്നും ജാക്ക്മാന്‍ സമൂഹമാധ്യമങ്ങളില്‍ കുറിച്ചു. സ്റ്റുവര്‍ട്ടില്‍നിന്ന് ഏറെ പഠിക്കാനായെന്നും അദ്ദേഹത്തെ ജീവിതകാലം മുഴുവന്‍ ഓര്‍ക്കുമെന്നും ജാക്ക്മാന്‍ പറഞ്ഞു.
നാടകവേദിയില്‍നിന്ന് തുടങ്ങി ആഗോള സിനിമാടെലിവിഷന്‍ രംഗത്ത് തന്റേതായ ഇടം നേടിയ പാട്രിക് സ്റ്റുവര്‍ട്ടിന്റെ വിയോഗം കലാലോകത്തിന് വലിയ നഷ്ടമാണ്.
Related News
