ഗാസ: കനത്ത മഴയെയും ന്യൂനമര്‍ദ്ദത്തെയും തുടര്‍ന്ന് ഗാസ മുനമ്പിലെ താഴ്ന്ന പ്രദേശങ്ങളില്‍ സ്ഥിതി ചെയ്യുന്ന ആയിരക്കണക്കിന് അഭയാര്‍ത്ഥി ടെന്റുകള്‍ വെള്ളത്തിനടിയിലായി. ഇതോടെ ലക്ഷക്കണക്കിന് വരുന്ന കുടുംബങ്ങളുടെ ദുരിതം വീണ്ടും രൂക്ഷമായി. മഴ കനത്തതോടെ വടക്കന്‍ ഗാസയില്‍ മുന്‍പ് ഇസ്രായേല്‍ വ്യോമാക്രമണത്തില്‍ തകര്‍ന്ന കെട്ടിടത്തിന്റെ മതില്‍ ഇടിഞ്ഞുവീണ് രണ്ട് പൗരന്മാര്‍ക്ക് പരിക്കേറ്റു.

പാലസ്തീന്‍ വാര്‍ത്താ ഏജന്‍സിയായ 'വഫ' നല്‍കുന്ന വിവരമനുസരിച്ച്, തുണിയും പ്ലാസ്റ്റിക്കും കൊണ്ട് താത്കാലികമായി നിര്‍മ്മിച്ച ടെന്റുകളിലേക്ക് വെള്ളം ഇരച്ചുകയറി ജനങ്ങളുടെ വസ്ത്രങ്ങളും മറ്റ് സാധനസാമഗ്രികളും പൂര്‍ണ്ണമായും നശിച്ചു. തകര്‍ച്ചയുടെ വക്കിലുള്ള അപകടനിലയിലായ കെട്ടിടങ്ങള്‍ മഴയില്‍ തകര്‍ന്നുവീഴാന്‍ സാധ്യതയേറെയാണെന്ന് അധികൃതര്‍ മുന്നറിയിപ്പ് നല്‍കുന്നു.

വെള്ളപ്പൊക്കത്തിലും കനത്ത മഴയിലും ടെന്റുകള്‍ നശിച്ചതിനെ തുടര്‍ന്ന് സഹായം അഭ്യര്‍ത്ഥിച്ച് ആയിരക്കണക്കിന് ഫോണ്‍ കോളുകളാണ് ലഭിക്കുന്നതെന്ന് ഗാസയിലെ സിവിലിയന്‍ പ്രൊട്ടക്ഷന്‍ വിഭാഗം വ്യക്തമാക്കി. പരിക്കേറ്റവര്‍ക്കും അഭയകേന്ദ്രങ്ങള്‍ നഷ്ടപ്പെട്ടവര്‍ക്കും അടിയന്തര സഹായം എത്തിക്കണമെന്ന് സന്നദ്ധ സംഘടനകളോട് അധികൃതര്‍ അഭ്യര്‍ത്ഥിച്ചു.

ഗാസയുടെ വിവിധ ഭാഗങ്ങളിലായി 2,70,000-ത്തോളം ടെന്റുകളാണ് നിലവിലുള്ളത്. താഴ്ന്ന പ്രദേശങ്ങളിലും കടല്‍തീരങ്ങളിലും താമസിക്കുന്ന നാല് ലക്ഷത്തിലധികം അഭയാര്‍ത്ഥികള്‍ വെള്ളപ്പൊക്ക ഭീഷണിയിലാണ്. കൊടും തണുപ്പും മഴയും തുടരുമ്പോള്‍ കുട്ടികള്‍ക്കും വയോധികര്‍ക്കും തണുപ്പിനെ പ്രതിരോധിക്കാനുള്ള ഇന്ധനത്തിന്റെയും ഹീറ്റിംഗ് സാമഗ്രികളുടെയും കടുത്ത ക്ഷാമം അനുഭവപ്പെടുന്നുണ്ട്.

മഴയും ന്യൂനമര്‍ദ്ദവും ശക്തമായി തുടരുമെന്ന പ്രവചനം ഗാസയിലെ അഭയാര്‍ത്ഥികളുടെ അവസ്ഥ കൂടുതല്‍ ദയനീയമാക്കുന്നു. അടിയന്തരമായി പുതിയ ടെന്റുകളും തണുപ്പിനെ പ്രതിരോധിക്കാനുള്ള സാധനങ്ങളും എത്തിച്ചില്ലെങ്കില്‍ സ്ഥിതിഗതികള്‍ ഗുരുതരമാകുമെന്ന് മുന്നറിയിപ്പുണ്ട്.