ന്യൂഡല്‍ഹി: മുതിര്‍ന്ന ബി.ജെ.പി നേതാവും മുന്‍ ഉപപ്രധാനമന്ത്രിയുമായ എല്‍.കെ അദ്വാനി നാളെ (നവംബര്‍ എട്ട്) നൂറാം വയസ്സിലേക്ക് പ്രവേശിക്കും. അദ്ദേഹത്തിന്റെ 99-ാം ജന്മദിനം ഞായറാഴ്ച ന്യൂഡല്‍ഹിയിലെ പാര്‍ട്ടി ആസ്ഥാനത്ത് ആഘോഷിക്കും. 1927 നവംബര്‍ 8 നാണ് അദ്വാനി ജനിച്ചത്. അദ്ദേഹത്തിന്റെ ആരോഗ്യത്തിനായി പ്രത്യേക യാഗവും പ്രാര്‍ത്ഥനകളും ചടങ്ങിന്റെ ഭാഗമായി സംഘടിപ്പിച്ചിട്ടുണ്ട്.

ബി.ജെ.പി ദേശീയ അധ്യക്ഷന്‍ നിതിന്‍ നബിന്‍, കേന്ദ്രമന്ത്രി പീയൂഷ് ഗോയല്‍ എന്നിവര്‍ അദ്വാനിയുടെ മകള്‍ പ്രതിഭ അദ്വാനിയുടെ സാന്നിധ്യത്തില്‍ ചടങ്ങിനെ അഭിസംബോധന ചെയ്യും. അദ്വാനിയുടെ ജീവിതത്തെയും രാഷ്ട്രീയ യാത്രയെയും ആസ്പദമാക്കിയുള്ള പ്രത്യേക അവതരണവും ചടങ്ങിലുണ്ടാകും.

ബി.ജെ.പിയുടെ വളര്‍ച്ചയില്‍ നിര്‍ണ്ണായക പങ്ക് വഹിച്ച അദ്വാനി മൂന്ന് തവണ പാര്‍ട്ടി അധ്യക്ഷനായി സേവനമനുഷ്ഠിച്ചിട്ടുണ്ട്. അടല്‍ ബിഹാരി വാജ്പേയി സര്‍ക്കാരില്‍ കേന്ദ്ര ആഭ്യന്തര മന്ത്രിയായും 2002 മുതല്‍ 2004 വരെ ഉപപ്രധാനമന്ത്രിയായും അദ്ദേഹം പ്രവര്‍ത്തിച്ചു. 2024 മാര്‍ച്ചില്‍ രാജ്യത്തെ പരമോന്നത സിവിലിയന്‍ ബഹുമതിയായ 'ഭാരതരത്‌ന' നല്‍കി രാഷ്ട്രം അദ്ദേഹത്തെ ആദരിച്ചിരുന്നു.

നെഞ്ചിലെ അണുബാധയെ തുടര്‍ന്ന് ദല്‍ഹിയിലെ അപ്പോളോ ആശുപത്രിയില്‍ ചികിത്സയിലായിരുന്ന അദ്വാനി ഒക്ടോബര്‍ 19-നാണ് ആശുപത്രി വിട്ടത്. പ്രധാനമന്ത്രി നരേന്ദ്ര മോദി ഒക്ടോബര്‍ 7-ന് അദ്ദേഹത്തിന്റെ വസതിയിലെത്തി സന്ദര്‍ശിച്ചിരുന്നു.