.jpg)
റിയാദ്: സൗദി അറേബ്യയിലെ വിവിധ പ്രദേശങ്ങള്‍ ലക്ഷ്യമാക്കി ഹൂതി ഭീകരര്‍ നടത്തിയ മിസൈല്‍, ഡ്രോണ്‍ ആക്രമണങ്ങള്‍ സൗദി സഖ്യസേന വിജയകരമായി തടയുകയും നശിപ്പിക്കുകയും ചെയ്തു. റിയാദ് മേഖലയെ ലക്ഷ്യമിട്ട് ഹൂതികള്‍ തൊടുത്തുവിട്ട ക്രൂയിസ് മിസൈല്‍ വ്യോമസേന തകര്‍ത്തതായി സഖ്യസേനയുടെ ഔദ്യോഗിക വക്താവ് മേജര്‍ ജനറല്‍ തുര്‍ക്കി അല്‍-മാലികി ശനിയാഴ്ച രാവിലെ അറിയിച്ചു.
വെള്ളിയാഴ്ച വൈകുന്നേരം റിയാദ് മേഖലയില്‍ എത്തിയ ഭീകരരുടെ ഒരു ഡ്രോണും സഖ്യസേന തകര്‍ത്തിരുന്നു. കൂടാതെ, ശനിയാഴ്ച രാവിലെ നജ്‌റാന്‍ ലക്ഷ്യമാക്കി വന്ന രണ്ട് ബാലിസ്റ്റിക് മിസൈലുകളും, പിന്നീട് മക്ക മേഖലയില്‍ ഒരു ഡ്രോണും സഖ്യസേന തടഞ്ഞു നശിപ്പിച്ചു. മിസൈലുകള്‍ തകര്‍ത്തതിനെ തുടര്‍ന്ന് അവയുടെ അവശിഷ്ടങ്ങള്‍ നിലത്തുവീണിട്ടുണ്ടെന്നും ഇതിന്റെ നാശനഷ്ടങ്ങള്‍ വിലയിരുത്തി വരികയാണെന്നും അല്‍-മാലികി വ്യക്തമാക്കി.
ആക്രമണ ഭീഷണിയുടെ പശ്ചാത്തലത്തില്‍ സിവില്‍ ഡിഫന്‍സ് നജ്‌റാനിലും ജിസാന്‍ നഗരത്തിലും ദേശീയ മുന്‍കരുതല്‍ പ്ലാറ്റ്ഫോം വഴി ജാഗ്രതാ നിര്‍ദ്ദേശം പുറപ്പെടുവിച്ചിരുന്നു. എന്നാല്‍ മിനിറ്റുകള്‍ക്ക് ശേഷം അപകടസാധ്യത ഒഴിവായതായി അധികൃതര്‍ പ്രഖ്യാപിച്ചു.
Related News
