ഗള്‍ഫ് സഹകരണ കൗണ്‍സില്‍ (ജി.സി.സി) അംഗരാജ്യങ്ങളെ തമ്മില്‍ തുന്നിച്ചേര്‍ക്കുന്ന 1,700 കിലോമീറ്റര്‍ ദൈര്‍ഘ്യമുള്ള കൂറ്റന്‍ റെയില്‍വേ ശൃംഖലയുടെ നിര്‍മാണം പകുതിയോളം പിന്നിട്ട പശ്ചാത്തലത്തില്‍ ഒപ്പുവെച്ച ചരിത്രപരമായ ജനറല്‍ അഗ്രിമെന്റ് മേഖലയുടെ സാമ്പത്തിക, സാമൂഹിക രംഗങ്ങളില്‍ വലിയൊരധ്യായത്തിനാണ് തുടക്കമിടുന്നത്. ബഹ്റൈന്‍ തലസ്ഥാനമായ മനാമയിലെ അല്‍ റിഫ കൊട്ടാരത്തില്‍ വെച്ച് നടന്ന ജി.സി.സി ഗതാഗത-വാര്‍ത്താവിനിമയ മന്ത്രിമാരുടെ 31-ാമത് യോഗത്തിലാണ് ഈ നിര്‍ണായക കരാര്‍ ഒപ്പുവെക്കപ്പെട്ടത്. ബഹ്റൈന്‍ കിരീടാവകാശിയും പ്രധാനമന്ത്രിയുമായ പ്രിന്‍സ് സല്‍മാന്‍ ബിന്‍ ഹമദ് അല്‍ ഖലീഫ, ജി.സി.സി സെക്രട്ടറി ജനറല്‍ ജാസിം മുഹമ്മദ് അല്‍ ബദൈവി, യു.എ.ഇ, സൗദി അറേബ്യ, ബഹ്റൈന്‍, കുവൈത്ത്, ഒമാന്‍, ഖത്തര്‍ എന്നീ ആറ് രാജ്യങ്ങളിലെയും ഗതാഗത-വാര്‍ത്താവിനിമയ മന്ത്രിമാര്‍ എന്നിവരുടെ സാന്നിധ്യം പദ്ധതിയുടെ പ്രാധാന്യത്തെയും ജി.സി.സി രാജ്യങ്ങളുടെ ദീര്‍ഘവീക്ഷണത്തെയും എടുത്തുകാണിക്കുന്നു.
2030 ഡിസംബറോടെ പൂര്‍ണ സജ്ജമാകുന്ന ഈ പദ്ധതി ഗള്‍ഫ് മേഖലയിലെ യാത്രക്കാര്‍ക്കും വ്യാപാരികള്‍ക്കും അതിലുപരി ദശലക്ഷക്കണക്കിന് വരുന്ന പ്രവാസി സമൂഹത്തിനും നല്‍കുന്ന നേട്ടങ്ങള്‍ അളവറ്റതാണ്. റോഡ്, വ്യോമ ഗതാഗതങ്ങളെ മാത്രം പ്രധാനമായി ആശ്രയിച്ചിരുന്ന ഒരു മേഖലയില്‍ അതിവേഗ റെയില്‍ സര്‍വീസുകള്‍ ആരംഭിക്കുന്നത് യാത്രാ സമയം ഗണ്യമായി കുറയ്ക്കും. പ്രത്യേകിച്ച്, ആറ് രാജ്യങ്ങളിലായി ചിതറിക്കിടക്കുന്ന മലയാളി സമൂഹമടക്കമുള്ള പ്രവാസികള്‍ക്ക് കുറഞ്ഞ ചെലവിലും സുരക്ഷിതമായും രാജ്യങ്ങള്‍ക്കിടയില്‍ യാത്ര ചെയ്യാന്‍ ഇതിലൂടെ സാധിക്കും. വിനോദസഞ്ചാരം, കുടുംബ സന്ദര്‍ശനങ്ങള്‍, ജോലിയുമായി ബന്ധപ്പെട്ട യാത്രകള്‍ എന്നിവയ്ക്ക് റെയില്‍വേ ശൃംഖല പുത്തന്‍ വേഗത നല്‍കും.
വാണിജ്യ-ബിസിനസ് രംഗങ്ങളിലാണ് റെയില്‍വേ കരാര്‍ ഏറ്റവും വലിയ വിപ്ലവം സൃഷ്ടിക്കാന്‍ പോകുന്നത്. പദ്ധതി നടപ്പാക്കല്‍, സാങ്കേതിക സംയോജനം, പരസ്പര ഏകോപനം, മേഖല ബന്ധം ശക്തിപ്പെടുത്തല്‍ എന്നീ നാല് പ്രധാന സ്തംഭങ്ങളിലൂന്നിയാണ് ഈ കരാര്‍ തയ്യാറാക്കിയിട്ടുള്ളത്. 2030-ല്‍ 20 കോടി ടണ്ണായി പ്രതീക്ഷിക്കുന്ന ചരക്കുനീക്കം 2045 ഓടെ 27.1 കോടി ടണ്ണായി ഉയരുമെന്നാണ് കണക്കാക്കുന്നത്. അന്താരാഷ്ട്ര അതിര്‍ത്തികള്‍ കടന്നുള്ള ചരക്കുനീക്കം എളുപ്പമാകുന്നതോടെ പ്രാദേശിക വിതരണ ശൃംഖലയും ലോജിസ്റ്റിക്‌സ് മേഖലയും കൂടുതല്‍ ശക്തമാകും. ഇത് വഴി നിര്‍മാണ സാമഗ്രികള്‍, ഭക്ഷ്യവസ്തുക്കള്‍, മറ്റ് ഉല്‍പ്പന്നങ്ങള്‍ എന്നിവയുടെ കടത്തുകൂലി കുറയുകയും പ്രാദേശിക വ്യാപാരം സുഗമമാകുകയും ചെയ്യും. ചെറിയ ബിസിനസുകള്‍ക്കും സംരംഭകര്‍ക്കും മറ്റ് ഗള്‍ഫ് രാജ്യങ്ങളിലേക്ക് തങ്ങളുടെ ബിസിനസ് വ്യാപിപ്പിക്കാന്‍ ഇത് വഴിയൊരുക്കും.
യാത്രാ രംഗത്തും വലിയ കുതിച്ചുചാട്ടമാണ് പ്രതീക്ഷിക്കുന്നത്. 2030-ല്‍ 60 ലക്ഷമായി കണക്കാക്കുന്ന യാത്രക്കാരുടെ എണ്ണം 2045 ആകുമ്പോഴേക്കും 80 ലക്ഷത്തിന് മുകളിലെത്തും. കുറഞ്ഞ ചെലവിലുള്ള അന്തര്‍ദേശീയ യാത്രകള്‍ സാധ്യമാകുന്നത് ടൂറിസം മേഖലയ്ക്ക് വലിയ ഉണര്‍വ് നല്‍കും. ഒപ്പം, പദ്ധതിയുടെ ഭാഗമായി നിര്‍മാണ മേഖലയിലും തുടര്‍ന്ന് റെയില്‍വേ പ്രവര്‍ത്തനങ്ങളിലും കസ്റ്റംസ്, ലോജിസ്റ്റിക്‌സ് തുടങ്ങിയ അനുബന്ധ മേഖലകളിലും ആയിരക്കണക്കിന് പുതിയ തൊഴിലവസരങ്ങള്‍ സൃഷ്ടിക്കപ്പെടും. ഇത് പ്രവാസി ഉദ്യോഗാര്‍ത്ഥികള്‍ക്കും വിദഗ്ധ തൊഴിലാളികള്‍ക്കും വന്‍ അവസരങ്ങളാണ് തുറന്നുനല്‍കുക.
ഗള്‍ഫ് രാജ്യങ്ങള്‍ തമ്മിലുള്ള സഹകരണം ശക്തമാക്കുന്നതിലും സുസ്ഥിര സാമ്പത്തിക വളര്‍ച്ച ഉറപ്പാക്കുന്നതിലും പദ്ധതി നിര്‍ണായക പങ്കുവഹിക്കുമെന്ന് ജി.സി.സി സെക്രട്ടറി ജനറല്‍ ജാസിം മുഹമ്മദ് അല്‍ ബദൈവി വ്യക്തമാക്കിയിട്ടുണ്ട്. ചുരുക്കത്തില്‍, വിതരണ ശൃംഖലകളെ പരസ്പരം ബന്ധിപ്പിക്കുക മാത്രമല്ല, ആറ് ഗള്‍ഫ് രാജ്യങ്ങളിലെ ജനങ്ങളുടെയും പ്രവാസികളുടെയും ജീവിതനിലവാരം ഉയര്‍ത്താനും ബിസിനസ് സമൃദ്ധി ഉറപ്പാക്കാനും പോകുന്ന വികസന കുതിപ്പായി ഈ ജി.സി.സി റെയില്‍വേ ശൃംഖല മാറും.
