അല്‍ഉല: സൗദി അറേബ്യയിലെ ആദ്യ യുനെസ്‌കോ ലോക പൈതൃക കേന്ദ്രമായ അല്‍ഉലയിലെ ചരിത്ര പ്രസിദ്ധമായ ഹെഗ്രയില്‍ വര്‍ണ്ണാഭമായ ലൈറ്റ് ആന്റ് ഹോട്ട് എയര്‍ ബലൂണ്‍ പ്രദര്‍ശനം സംഘടിപ്പിച്ചു. മനോഹരമായ വെളിച്ച സംവിധാനങ്ങളും തത്സമയ കലാപ്രകടനങ്ങളും ദൃശ്യശ്രവ്യ വിസ്മയങ്ങളും ചേര്‍ന്നതായിരുന്നു പ്രദര്‍ശനം.
സൗദി പൈതൃകവും അല്‍ഉലയുടെ ചരിത്രവും വിളിച്ചോതുന്ന തത്സമയ കലാപരിപാടികളുടെ പശ്ചാത്തലത്തില്‍, വിവിധ വര്‍ണ്ണങ്ങളില്‍ പ്രകാശിക്കുന്ന ബലൂണുകള്‍ വാനിലുയര്‍ന്നത് സന്ദര്‍ശകര്‍ക്ക് ദൃശ്യവിരുന്നായി. പാറകളില്‍ കൊത്തിയെടുത്ത പുരാതന ശില്പകലകള്‍ക്ക് മുന്നില്‍ നടന്ന ചടങ്ങ് കാണാന്‍ സൗദിയുടെ വിവിധ ഭാഗങ്ങളില്‍ നിന്നും വിദേശങ്ങളില്‍ നിന്നും നിരവധി സഞ്ചാരികളാണ് എത്തിയത്.
നവംബറില്‍ അല്‍ഉലയില്‍ സംഘടിപ്പിക്കുന്ന വിനോദസഞ്ചാര പരിപാടികളുടെ ഭാഗമായാണ് ഈ പ്രദര്‍ശനം നടന്നത്. വരുന്ന ആഴ്ചയില്‍ അല്‍ഉലയിലെ പ്രശസ്തമായ 'എലിഫന്റ് റോക്കിന്' സമീപവും ഇത്തരം ബലൂണ്‍ പ്രദര്‍ശനങ്ങള്‍ തുടരുമെന്ന് സംഘാടകര്‍ അറിയിച്ചു.
