എരുമേലി: 57 വര്‍ഷക്കാലം എരുമേലി മഹല്ല് മുസ്ലിം ജമാഅത്തില്‍ ചീഫ് ഇമാമായി സേവനമനുഷ്ഠിച്ച പ്രമുഖ പണ്ഡിതന്‍ വി.എസ്. അബ്ദുല്‍ കരീം മൗലവി (മൗലവി സാഹിബ്) നിര്യാതനായി. ഇന്ന് (തിങ്കള്‍) രാവിലെ 7.30-നായിരുന്നു അന്ത്യം. ഭൗതികശരീരം ഇന്ന് അസര്‍ നമസ്‌കാരത്തിന് ശേഷം എരുമേലി മഹല്ല് മുസ്ലിം ജമാഅത്ത് ഖബര്‍സ്ഥാനില്‍ ഖബറടക്കും.
ഭാര്യ: സൈനബ ബീവി. മക്കള്‍: ടി.എ. റഹ്‌മത്ത് (റിട്ട. റെയില്‍വേ ഡിവിഷന്‍ പാര്‍സല്‍ ഓഫീസര്‍), സക്കീന ബീവി. മരുമക്കള്‍: അന്‍സാരി, ഹബീബ ബീവി.
തെക്കന്‍ കേരളത്തിലെ പ്രമുഖ ആത്മീയ കേന്ദ്രമായ എരുമേലി മഹല്ലിന്റെ ആത്മാവായി പതിറ്റാണ്ടുകള്‍ നിലകൊണ്ട അദ്ദേഹം, സര്‍വജനസമ്മതനായ പണ്ഡിതശ്രേഷ്ഠനും ഒരു കാലഘട്ടത്തിന്റെ വഴിവിളക്കുമായിരുന്നു. കേവലം ഒരു ഇമാമെന്ന അതിര്‍വരമ്പുകള്‍ക്കപ്പുറം സമൂഹത്തിന്റെ നാനാതുറകളിലുള്ള മനുഷ്യരെ ചേര്‍ത്തുപിടിച്ച വ്യക്തിത്വമായിരുന്നു അദ്ദേഹത്തിന്റേത്. ആഴത്തിലുള്ള അറിവ്, ആത്മീയ വിശുദ്ധി, സൗമ്യമായ പെരുമാറ്റം, ലളിത ജീവിതം എന്നിവ അദ്ദേഹത്തിന്റെ സവിശേഷതകളായിരുന്നു.
തെക്കന്‍ കേരളത്തിലെ പ്രഭാഷണ വേദികളില്‍ തനതായ ശൈലി കൊണ്ട് ശ്രദ്ധേയനായ പ്രാസംഗികനായിരുന്നു അബ്ദുല്‍ കരീം മൗലവി. സങ്കീര്‍ണ്ണമായ വിഷയങ്ങളെപ്പോലും സാധാരണക്കാര്‍ക്ക് ലളിതമായി മനസ്സിലാകുന്ന രീതിയില്‍ അവതരിപ്പിക്കാന്‍ അദ്ദേഹത്തിന് പ്രത്യേക കഴിവുണ്ടായിരുന്നു.
മതസൗഹാര്‍ദ്ദത്തിന്റെ ഉജ്ജ്വല മാതൃകയായ എരുമേലിയില്‍ മാനവികതയുടെയും സാഹോദര്യത്തിന്റെയും സന്ദേശം ഉയര്‍ത്തിപ്പിടിക്കാന്‍ അദ്ദേഹം എന്നും മുന്നില്‍നിന്നു. പ്രദേശവാസികളുടെയും പരിസരവാസികളുടെയും വ്യക്തിപരമായ തര്‍ക്കങ്ങളില്‍ നീതിപൂര്‍വ്വമായ മധ്യസ്ഥത വഹിക്കാനും, സങ്കടങ്ങളുമായി എത്തുന്നവര്‍ക്ക് ആശ്വാസമേകാനും അദ്ദേഹം എപ്പോഴും ശ്രദ്ധിച്ചിരുന്നു. മൗലവിയുടെ വേര്‍പാടില്‍ പ്രമുഖരും പ്രദേശവാസികളും അനുശോചനം രേഖപ്പെടുത്തി.
Related News
