ജിദ്ദ: ജിദ്ദ സൂപ്പര്‍ഡോമില്‍ നടക്കുന്ന ആറാമത് ഹജ്ജ് കോണ്‍ഫറന്‍സ് & എക്‌സിബിഷന്റെ ഉദ്ഘാടന ചടങ്ങില്‍ കേന്ദ്ര ന്യൂനപക്ഷ ക്ഷേമ മന്ത്രി കിരണ്‍ റിജിജു പങ്കെടുത്തു. ജിദ്ദയിലെ ഇന്ത്യന്‍ കോണ്‍സല്‍ ജനറല്‍ ഫഹദ് സുരി, ഹജ്ജ് ജോയിന്റ് സെക്രട്ടറി മുഹമ്മദ് അഫ്‌സല്‍ എന്നിവരും കേന്ദ്ര മന്ത്രിയോടൊപ്പം ഉണ്ടായിരുന്നു.
സൗദി ഹജ്ജ്-ഉംറ മന്ത്രി ഡോ. തൗഫീഖ് അല്‍-റാബിയയുടെ അധ്യക്ഷതയില്‍ ചേര്‍ന്ന മന്ത്രിതല സമ്മേളനത്തില്‍, ഹജ്ജ് തീര്‍ത്ഥാടകരുടെ ക്ഷേമത്തിനായി സൗദി ഭരണകൂടം നല്‍കുന്ന നിരന്തരമായ പിന്തുണയ്ക്ക് കേന്ദ്ര മന്ത്രി ഇന്ത്യയുടെ നന്ദി അറിയിച്ചു. വരാനിരിക്കുന്ന ഹജ്ജ് 202 7-ന്റെ വിജയകരമായ സംഘാടനത്തിനായി ഭാരതവും സൗദി അറേബ്യയും തമ്മിലുള്ള ശക്തമായ പങ്കാളിത്തവും സഹകരണവും അദ്ദേഹം ആവര്‍ത്തിച്ചു.
ചടങ്ങിന്റെ ഭാഗമായി, മക്ക മേഖല ഡെപ്യൂട്ടി ഗവര്‍ണര്‍ സൗദ് ബിന്‍ മിശ്അല്‍ ബിന്‍ അബ്ദുല്‍ അസീസ് അല്‍ സൗദ് രാജകുമാരനുമായി മറ്റ് വിദേശ പ്രതിനിധികള്‍ക്കൊപ്പം മന്ത്രി കിരണ്‍ റിജിജു കൂടിക്കാഴ്ച നടത്തുകയും ചെയ്തു.
