കൊച്ചി: മലയാള സിനിമയിലെ പ്രശസ്ത ഛായാഗ്രാഹകന്‍ ഷാജി കുമാര്‍ (57) അന്തരിച്ചു. കൊച്ചിയിലെ സ്വകാര്യ ആശുപത്രിയില്‍ ഇന്ന് പുലര്‍ച്ചെയായിരുന്നു അന്ത്യം. രണ്ടു ദിവസം മുമ്പ് സിനിമാ ചിത്രീകരണത്തിനിടെ സെറ്റില്‍ കുഴഞ്ഞുവീണതിനെ തുടര്‍ന്ന് ആശുപത്രിയില്‍ പ്രവേശിപ്പിക്കുകയായിരുന്നു.
മലയാളത്തിലും തമിഴിലും ഹിന്ദിയിലുമായി അമ്പതിലേറെ സിനിമകള്‍ക്ക് ക്യാമറ ചലിപ്പിച്ച ഷാജി കുമാര്‍, മാസ് ആക്ഷന്‍ ചിത്രങ്ങളുടെ ദൃശ്യാവിഷ്‌കാരത്തിലൂടെ ശ്രദ്ധേയനായി. വൈശാഖ്, ഷാജി കൈലാസ്, ജോഷി, അനില്‍ ബാബു തുടങ്ങിയ സംവിധായകര്‍ക്കൊപ്പം നിരവധി ചിത്രങ്ങളില്‍ പ്രവര്‍ത്തിച്ചു.
2016ല്‍ പുറത്തിറങ്ങിയ വൈശാഖ് ചിത്രം 'പുലിമുരുകന്‍' ആയിരുന്നു ശ്രദ്ധേയമായ സിനിമകളിലൊന്ന്. 'നരന്‍', 'ഒടിയന്‍' തുടങ്ങിയ ചിത്രങ്ങളുടെയും ഛായാഗ്രഹണം നിര്‍വഹിച്ചു. 'ഉത്തമന്‍', 'പകല്‍പ്പൂരം', 'പട്ടണത്തില്‍ സുന്ദരന്‍', 'നസ്രാണി', 'റോബിന്‍ഹുഡ്', 'ബാബാ കല്യാണി', 'വെള്ളിനക്ഷത്രം', 'അത്ഭുതദ്വീപ്', 'മധുരരാജ', 'റിംഗ് മാസ്റ്റര്‍', 'മല്ലു സിങ്', 'രാമലീല', 'പത്തൊന്‍പതാം നൂറ്റാണ്ട്', 'ബാന്ദ്ര', 'കാഥികന്‍', 'തുടരും' തുടങ്ങി നിരവധി ചിത്രങ്ങളില്‍ പ്രവര്‍ത്തിച്ചിട്ടുണ്ട്.
റിലീസിന് ഒരുങ്ങുന്ന 'അതിമനോഹരം', 'ഒറ്റക്കൊമ്പന്‍' എന്നീ ചിത്രങ്ങളുടെയും ഛായാഗ്രാഹകനായിരുന്നു. സിനിമയുടെ വലുപ്പമോ ചെറുപ്പമോ നോക്കാതെ ഓരോ ചിത്രത്തെയും ഒരേ ആത്മാര്‍ഥതയോടെ സമീപിച്ചിരുന്ന ഛായാഗ്രാഹകനായിരുന്നു ഷാജി കുമാര്‍.
മൃതദേഹം സ്വകാര്യ ആശുപത്രി മോര്‍ച്ചറിയിലേക്ക് മാറ്റി. സുഹൃത്തിന്റെ ഫ്‌ലാറ്റിലേക്ക് മൃതദേഹം എത്തിക്കുമെന്നാണ് റിപ്പോര്‍ട്ട്.
Related News
