ജിദ്ദ: ഇന്ത്യന്‍ കള്‍ച്ചറല്‍ ഫൗണ്ടേഷന്‍ (ICF) ജിദ്ദ റീജിയന്‍ കമ്മിറ്റിയുടെ 'എഡ്യൂ സ്‌കോളര്‍ഷിപ്പ്' പദ്ധതിക്ക് ഔദ്യോഗിക തുടക്കമായി. സാമ്പത്തികമായി പിന്നാക്കം നില്‍ക്കുന്നതും പഠനത്തില്‍ മികവ് പുലര്‍ത്തുന്നതുമായ ബിരുദ വിദ്യാര്‍ത്ഥികള്‍ക്ക് ഏറെ ആശ്വാസകരമാകുന്നതാണ് ഈ പദ്ധതി.
പ്ലസ് ടുവിന് ശേഷം ബിരുദ കോഴ്സുകളില്‍ പ്രവേശനം നേടിയ അര്‍ഹരായ വിദ്യാര്‍ത്ഥികള്‍ക്കാണ് ഉന്നത പഠനത്തിനായുള്ള സഹായം നല്‍കുന്നത്. അക്കാദമിക പിന്തുണയ്ക്ക് പുറമെ വിദ്യാര്‍ത്ഥികളുടെ വ്യക്തിത്വ വികസനവും ധാര്‍മിക മൂല്യവര്‍ദ്ധനവും ലക്ഷ്യമിട്ട് പ്രമുഖര്‍ നയിക്കുന്ന പ്രത്യേക പരിശീലന ക്ലാസുകളും ഈ പദ്ധതിയുടെ ഭാഗമാണ്. കൂടാതെ, വിദഗ്ദ്ധരടങ്ങുന്ന പാനല്‍ നയിക്കുന്ന പേഴ്സണല്‍ മെന്റര്‍ഷിപ്പ് സൗകര്യവും വിദ്യാര്‍ത്ഥികള്‍ക്കായി ഒരുക്കിയിട്ടുണ്ട്.
പ്രാഥമിക തിരഞ്ഞെടുപ്പ് നടപടികള്‍ പൂര്‍ത്തിയാക്കി, യോഗ്യരായ വിദ്യാര്‍ത്ഥികള്‍ക്കാണ് പ്രതിമാസ സ്‌കോളര്‍ഷിപ്പ് തുക നല്‍കുക.
മത-ഭൗതിക വിദ്യാഭ്യാസ രംഗത്ത് വേറിട്ട പ്രവര്‍ത്തനങ്ങളിലൂടെ ശ്രദ്ധേയമായ 'ഹിദായ പാലാഴി'യുടെ സഹകരണത്തോടെയാണ് ഐ.സി.എഫ് ജിദ്ദ ഈ പദ്ധതി നടപ്പിലാക്കുന്നത്. പ്രവാസി സമൂഹത്തിന്റെ സാമൂഹിക-വിദ്യാഭ്യാസ ഉന്നമനം ലക്ഷ്യമിട്ടുള്ള ഐ.സി.എഫിന്റെ ബഹുമുഖ പ്രവര്‍ത്തനങ്ങളുടെ ഭാഗമായാണ് ഈ സംരംഭം.
അബ്ദുല്‍ കലാം അഹ്സനിയുടെ പ്രാര്‍ത്ഥനയോടെ ആരംഭിച്ച ഉദ്ഘാടനച്ചടങ്ങില്‍ യഹ്യ ഖലീല്‍ നൂറാനി അധ്യക്ഷത വഹിച്ചു. ഐ.സി.എഫ് ഇന്റര്‍നാഷണല്‍ ജനറല്‍ സെക്രട്ടറി നിസാര്‍ സഖാഫി ഒമാന്‍ ഔദ്യോഗിക ഉദ്ഘാടനം നിര്‍വ്വഹിച്ചു. പ്രമുഖ മോട്ടിവേഷണല്‍ സ്പീക്കറും സൈക്യാട്രിസ്റ്റുമായ ഡോ. നൂറുദ്ദീന്‍ റാസി വിദ്യാര്‍ത്ഥികള്‍ക്കായുള്ള പരിശീലന ക്ലാസിന് നേതൃത്വം നല്‍കി.
സമസ്ത കോഴിക്കോട് ജില്ലാ വൈസ് പ്രസിഡന്റ് അബ്ദുറഹ്‌മാന്‍ മദനി, ഹാമിദ് സഖാഫി, റാഷിദ് സഖാഫി, ഐ.സി.എഫ് നേതാക്കളായ സയ്യിദ് സൈനുല്‍ ആബിദീന്‍ തങ്ങള്‍, മുജീബ് എ.ആര്‍. നഗര്‍, ബഷീര്‍ മാസ്റ്റര്‍ പറവൂര്‍, ഹസ്സന്‍ സഖാഫി തുടങ്ങിയവര്‍ ആശംസകള്‍ നേര്‍ന്നു. സൈദ് മുഹമ്മദ് മാസ്റ്റര്‍ കണ്ണമംഗലം സ്വാഗതവും മന്‍സൂര്‍ മാസ്റ്റര്‍ മണ്ണാര്‍ക്കാട് നന്ദിയും പറഞ്ഞു.
Related News
