ദുബായ്: പ്രമുഖ റീട്ടെയില്‍ ശൃംഖലയായ ലാന്‍ഡ്മാര്‍ക്ക് ഗ്രൂപ്പിന്റെ ലോയല്‍റ്റി പ്രോഗ്രാമായ 'ശുക്രന്‍' അംഗങ്ങളുടെ വ്യക്തിഗത വിവരങ്ങള്‍ അനധികൃതമായി ചോര്‍ന്നതായി കമ്പനി സ്ഥിരീകരിച്ചു. ഉപഭോക്താക്കളുടെ പേര്, ബന്ധപ്പെടാനുള്ള വിവരങ്ങള്‍, ജനനത്തീയതി എന്നിവയാണ് സുരക്ഷാ ലംഘനത്തിലൂടെ പുറത്തുപോയതെന്ന് ബാധിക്കപ്പെട്ട ഉപഭോക്താക്കള്‍ക്ക് അയച്ച ജാഗ്രതാ സന്ദേശത്തില്‍ കമ്പനി വ്യക്തമാക്കി. സംഭവം ശ്രദ്ധയില്‍പ്പെട്ട ഉടന്‍ തന്നെ സാങ്കേതിക തകരാര്‍ പരിഹരിക്കാനുള്ള അടിയന്തര നടപടികള്‍ സ്വീകരിച്ചതായും നിയമപാലകരെയും ബന്ധപ്പെട്ട അതോറിറ്റികളെയും വിവരം അറിയിച്ചതായും കമ്പനി വ്യക്തമാക്കിയിട്ടുണ്ട്.
ഉപഭോക്താക്കളുടെ ഡെബിറ്റ്, ക്രെഡിറ്റ് കാര്‍ഡ് വിവരങ്ങള്‍ ശുക്രന്‍ സിസ്റ്റത്തില്‍ സൂക്ഷിക്കാത്തതിനാല്‍ അവ സുരക്ഷിതമാണെന്ന് കമ്പനി ഉറപ്പുനല്‍കി. പാസ്വേഡുകള്‍ എന്‍ക്രിപ്റ്റ് ചെയ്ത രൂപത്തിലായതിനാല്‍ അവയും ചോര്‍ന്നിട്ടില്ല. കൂടാതെ അംഗങ്ങളുടെ ശുക്രന്‍ പോയിന്റുകള്‍, ബാലന്‍സ്, വാലറ്റ് എന്നിവയെല്ലാം സുരക്ഷിതമാണെന്നും ആപ്പും മറ്റ് ലോയല്‍റ്റി സേവനങ്ങളും സാധാരണ നിലയില്‍ പ്രവര്‍ത്തിക്കുന്നുണ്ടെന്നും അധികൃതര്‍ അറിയിച്ചു. കമ്പനിയുടെ മുന്നറിയിപ്പ് സന്ദേശം ലഭിച്ച ഉപഭോക്താക്കള്‍ തങ്ങളുടെ വിവരങ്ങള്‍ ചോര്‍ന്ന പട്ടികയില്‍ ഉള്‍പ്പെട്ടിട്ടുണ്ടെന്ന് കരുതി ജാഗ്രത പാലിക്കണമെന്ന് ശുക്രന്‍ നിര്‍ദ്ദേശിച്ചു.
വിവരചോര്‍ച്ചയുടെ പശ്ചാത്തലത്തില്‍ ഉപഭോക്താക്കള്‍ സൈബര്‍ തട്ടിപ്പുകള്‍ക്കെതിരെ അതീവ ജാഗ്രത പാലിക്കണമെന്ന് ശുക്രന്‍ അഭ്യര്‍ത്ഥിച്ചു. ലാന്‍ഡ്മാര്‍ക്ക് ഗ്രൂപ്പ്, ശുക്രന്‍ അല്ലെങ്കില്‍ അനുബന്ധ ബ്രാന്‍ഡുകളുടെ പേരില്‍ വരുന്ന അപ്രതീക്ഷിത ഫോണ്‍ കോളുകള്‍, ഇമെയിലുകള്‍, എസ്.എം.എസ്, വാട്സ്ആപ്പ് സന്ദേശങ്ങള്‍ എന്നിവയെക്കുറിച്ച് ജാഗ്രത പുലര്‍ത്തണം. ഫോണ്‍ വഴിയോ സന്ദേശങ്ങള്‍ വഴിയോ ബന്ധപ്പെടുന്ന ആര്‍ക്കും പാസ്വേഡുകള്‍, ഒ.ടി.പി, ബാങ്ക് വിവരങ്ങള്‍, തിരിച്ചറിയല്‍ രേഖകള്‍ എന്നിവ കൈമാറരുത്. റീഫണ്ടുകളോ സമ്മാനങ്ങളോ ബോണസ് പോയിന്റുകളോ വാഗ്ദാനം ചെയ്തുകൊണ്ട് അടിയന്തരമായി പ്രതികരിക്കാന്‍ ആവശ്യപ്പെടുന്ന വ്യാജ ലിങ്കുകളില്‍ ക്ലിക്ക് ചെയ്യരുതെന്നും ശക്തവും വ്യത്യസ്തവുമായ പാസ്വേഡുകള്‍ ഉപയോഗിക്കണമെന്നും കമ്പനി നിര്‍ദ്ദേശിച്ചു. സ്റ്റോറുകളിലെ കൗണ്ടറുകളില്‍ വെച്ചോ ഔദ്യോഗിക ശുക്രന്‍ ആപ്പിനുള്ളിലോ മാത്രമേ കമ്പനി ഒ.ടി.പി ആവശ്യപ്പെടുകയുള്ളൂവെന്നും ഫോണ്‍ വഴിയോ ഇമെയില്‍ വഴിയോ ഒരിക്കലും ഇത്തരം വിവരങ്ങള്‍ ചോദിക്കില്ലെന്നും അധികൃതര്‍ വ്യക്തമാക്കി.
Related News
