റിയാദ്: പ്രവാസികള്ക്കിടയില് വര്ധിച്ചുവരുന്ന ജീവിതശൈലീരോഗങ്ങളെക്കുറിച്ച് അവബോധം വളര്ത്താനും നടത്തം നിത്യജീവിതത്തിന്റെ ഭാഗമാക്കാനും ലക്ഷ്യമിട്ട് റിയാദിലെ കോഴിക്കോട് നിവാസികളുടെ കൂട്ടായ്മയായ 'കോഴിക്കോടന്സ്' സംഘടിപ്പിക്കുന്ന വാക്കിങ് ചലഞ്ചിന്റെ മൂന്നാം ഘട്ടത്തിന് തുടക്കമായി. 'വി ഗോ ഫിറ്റ് 3.0' (WE GO FIT 3.0) എന്ന മുദ്രാവാക്യവുമായി നടക്കുന്ന ചലഞ്ചില് ഓരോരുത്തരും ഒരു മാസം കുറഞ്ഞത് നൂറ് കിലോമീറ്റര് നടക്കുകയാണ് ലക്ഷ്യം.
കോഴിക്കോടന്സ് അംഗങ്ങള്ക്കും കുടുംബാംഗങ്ങള്ക്കും ലോകത്തിന്റെ ഏതു ഭാഗത്തുനിന്നും പങ്കെടുക്കാവുന്ന രീതിയിലാണ് ചലഞ്ച് ഒരുക്കിയിരിക്കുന്നത്. മൊബൈല് ആപ്ലിക്കേഷന് വഴി ഓരോരുത്തരുടെയും നടത്തം വിലയിരുത്തും. മികച്ച രീതിയില് ചലഞ്ച് പൂര്ത്തിയാക്കുന്നവര്ക്ക് സര്ട്ടിഫിക്കറ്റുകളും സമ്മാനങ്ങളും വിതരണം ചെയ്യും. സമാപനദിവസം കോഴിക്കോടന്സ് അംഗങ്ങള്ക്കായി മാരത്തോണ് മത്സരവും സംഘടിപ്പിക്കും.
മുന് ഘട്ടങ്ങളില്നിന്ന് വ്യത്യസ്തമായി ഇത്തവണ ഗ്രൂപ്പ് അടിസ്ഥാനത്തിലാണ് ചലഞ്ച് നടക്കുന്നത്. നാല് ഗ്രൂപ്പുകളുടെ ലീഡര്മാരായി വി.കെ.കെ. അബ്ബാസ്, മിര്ഷാദ് ബക്കര്, മുനീബ് പാഴൂര്, ഉമ്മര് മുക്കം എന്നിവരെ തിരഞ്ഞെടുത്തു.
റിയാദ് അല് നഹ്ദ പാര്ക്കില് നടന്ന പരിപാടിയില് കോഴിക്കോടന്സ് ചീഫ് ഓര്ഗനൈസര് കെ.സി. ഷാജു ചലഞ്ച് ഫ്ലാഗ് ഓഫ് ചെയ്തു. മുന് ഓര്ഗനൈസര്മാരായ ഹസന് ഹര്ഷദ് ഫറോക്ക്, സഹീര് മുഹ്യുദ്ദീന്, മുജീബ് മൂത്താട്ട്, ഗ്രൂപ്പ് ലീഡര്മാര് എന്നിവര് പങ്കെടുത്തു. റയീസ് പൂനൂര്, അന്സാര് കൊടുവള്ളി, അബ്ദുല് റഷീദ് പൂനൂര്, സി.ടി. സഫറുള്ള എന്നിവര് നേതൃത്വം നല്കി.