ദോഹ: ഇസ്രായേല് ആക്രമണത്തില് രക്തസാക്ഷിത്വം വരിച്ച ആഭ്യന്തര സുരക്ഷാ സേനയായ ലഖ്വിയ സേനാംഗം ബദര് സാദ് മുഹമ്മദ് അല് ഹുമൈദി അല് ദോസരിക്ക് ആദരവൊരുക്കി ഖത്തര്. അമീര് ശൈഖ് തമീം ബിന് ഹമദ് ആല്ഥാനിയുടെ നിര്ദേശങ്ങള്ക്കനുസൃതമായി, ആദരസൂചകമായി സെക്കന്ഡ് ലെഫ്റ്റനന്റ് പദവി സ്ഥാനക്കയറ്റം നല്കും. അദ്ദേഹത്തിന്റെ ധീരമായ നിലപാടിനും ത്യാഗത്തിനും നിസ്വാര്ഥതക്കുമുള്ള അംഗീകാരവുമാണ് ഈ നടപടി. കൂടാതെ, രക്തസാക്ഷി മെഡല്, ധീരത മെഡല്, മിലിട്ടറി ഡ്യൂട്ടി മെഡല്, ധീരത ബാഡ്ജ് എന്നിവയും സമ്മാനിച്ചു.
ഇസ്രായേല് ആക്രമണത്തിനിടെ ലഖ്വിയ സേനാംഗങ്ങള് നടത്തിയ ത്യാഗങ്ങളെയും കര്ത്തവ്യനിര്വഹണത്തിലെ മികവിനെയും ആദരിക്കുന്നതിനായി സംഘടിപ്പിച്ച ചടങ്ങില് മെഡലുകള് വിതരണം ചെയ്തു. രാജ്യത്തിന്റെ സുരക്ഷയും സ്ഥിരതയും സംരക്ഷിക്കുന്നതില് ലഖ്വിയ അംഗങ്ങള് ത്യാഗപൂര്ണമായ ഇടപെടലുകള് നടത്തിയിരുന്നു.
ഖത്തര് തലസ്ഥാനമായ ദോഹയില് ഇസ്രായേല് നടത്തിയ ആക്രമണത്തില് ആഭ്യന്തര സുരക്ഷാ സേനയായ ലഖ്വിയ അംഗമായ വാറന്റ് കോര്പറല് ബദര് സാദ് മുഹമ്മദ് അല് ഹുമൈദി അല് ദൊസരി രക്തസാക്ഷിയായിരുന്നു. കൂടാതെ നിരവധി സുരക്ഷാ ഉദ്യോഗസ്ഥര്ക്ക് പരിക്കേല്ക്കുകയും ചെയ്തു. നേരത്തേ, രക്തസാക്ഷിയോടുള്ള സ്മരണക്കായി അല് വക്റയിലെ വീടിന് എതിര്വശത്തുള്ള സ്ട്രീറ്റ് നമ്പര് (90) അദ്ദേഹത്തിന്റെ പേരും നല്കിയിരുന്നു
ആഭ്യന്തര മന്ത്രിയും ആഭ്യന്തര സുരക്ഷാ സേനാ കമാന്ഡറുമായ ശൈഖ് ഖലീഫ ബിന് ഹമദ് ബിന് ഖലീഫ ആല്ഥാനി ചടങ്ങില് പങ്കെടുത്തു, മെഡലുകള് കൈമാറി. കൂടാതെ, ത്യാഗത്തിന്റെയും ധീരതയും പ്രകടമാക്കിയ ഓഫിസര്മാര്ക്കും ഉദ്യോഗസ്ഥര്ക്കും മെഡലുകള് നല്കാനും തീരുമാനിച്ചു.
.jpg)
Related News
