.jpg)
ജിദ്ദ: മസ്തിഷ്ക്കാഘാതത്തെ തുടര്ന്ന് ചികിത്സയിലായിരുന്ന ഉംറ തീര്ത്ഥാടകന് കൊല്ലം ചവറ പുല്ലംവയലില് ലൈജു നിവാസില് റഷീദ് കുഞ്ഞ് (76) ജിദ്ദ അല്മഹജ്ര് കിംഗ് അബ്ദുള് അസീസ് ആശുപത്രിയില് നിര്യാതനായി. നാട്ടില് നിന്ന് ഭാര്യയോടൊപ്പം ഉംറ നിര്വഹിക്കാന്, ജിദ്ദയില് ജോലിചെയ്യുന്ന മകന് ഷൈജുവിന്റെ അടുത്ത് ഇക്കഴിഞ്ഞ സെപ്തംബര് 24 നാണ് ഇദ്ദേഹമെത്തിയത്. ഉംറ നിര്വഹിച്ചശേഷം മകനോടൊപ്പം ജിദ്ദയില് കഴിയുമ്പോഴാണ് അസുഖബാധിതനായത്. തലചോറില് രക്തസ്രാവമുണ്ടായതിനെ തുടര്ന്ന് അല്മഹജ്ര് കിംഗ് അബ്ദുള് അസീസ് ആശുപത്രിയില് അടിയന്തര ശസ്ത്രക്രിയക്ക് വിധേയനാക്കിയ ഇദ്ദേഹം ആശുപത്രിയിലെ തീവ്രപരിചരണ വിഭാഗത്തില് ഒരു മാസത്തിലധികമായി ചികിത്സയിലായിരുന്നു. അസുഖ വിവരമറിഞ്ഞ് മക്കളായ ലൈജുവും ബൈജുവും നാട്ടില് നിന്ന് ജിദ്ദയില് എത്തിയിരുന്നു.
സംസ്ഥാന റവന്യൂ വകുപ്പില് ദീര്ഘകാലം സേവനം അനുഷ്ഠിച്ചിട്ടുള്ള ഇദ്ദേഹം കരുനാഗപ്പള്ളി താലൂക്ക് മുന് ഡെപ്യൂട്ടി തഹസില്ദാരാണ്. കുടുംബത്തിന്റെയും നാട്ടിലെ പ്രവാസികളുടെയും ജിദ്ദയിലെ സാമൂഹിക പ്രവര്ത്തകരുടെയും സാന്നിദ്ധ്യത്തില് മൃതദേഹം ഇന്ന് രാവിലെ റുവൈസ് ഖബര്സ്ഥാനില് ഖബറടക്കി. റുവൈസ് മസ്ജിദില് നടന്ന മയ്യിത്ത് നമസ്കാരത്തിലും ഖബറടക്ക ചടങ്ങിലും നിരവധി പ്രവാസികളും സ്വദേശികളും പങ്കടുത്തു. കെഎംസിസി വെല്ഫെയര് വിംഗ് നടപടിക്രമങ്ങളുടെ സഹായത്തിനായി രംഗത്തുണ്ടായിരുന്നു.
നൂര്നിസയാണ് ഭാര്യ. മക്കള്: ലൈജു (ആമീസ് പാരഡൈസ്, ചവറ), ബൈജു (പോലീസ് ഐ.ടി വിഭാഗം, തിരുവനന്തപുരം), ഷൈജു (ജിദ്ദ). മരുമക്കള്: സുമയ്യ (വനം വകുപ്പ് ഉദ്യോഗസ്ഥ), ഡോ.ജാസ്മിന് (ആയുര്വേദ കോളജ്, തിരുവനന്തപുരം), സൗഫിയ എന്നിവര്.
.jpg)
Related News
