റിയാദ്: റിയാദിലെ കിംഗ് സല്മാന് എയര് ബേസിലെ പുതിയ വികസന പദ്ധതികള് സൗദി കിരീടാവകാശിയും ഉപപ്രധാനമന്ത്രിയുമായ മുഹമ്മദ് ബിന് സല്മാന് രാജകുമാരന് ഉദ്ഘാടനം ചെയ്തു. റോയല് സൗദി എയര് ഫോഴ്സിന്റെ യുദ്ധസജ്ജത വര്ധിപ്പിക്കുന്നതിനുള്ള തന്ത്രപ്രധാനമായ വികസന പദ്ധതികളുടെ ഭാഗമായാണ് ഈ നവീകരണം.
എയര് ബേസില് എത്തിയ കിരീടാവകാശിയെ പ്രതിരോധ മന്ത്രി ഖാലിദ് ബിന് സല്മാന് രാജകുമാരന്, ഡെപ്യൂട്ടി പ്രതിരോധ മന്ത്രി അബ്ദുല്റഹ്മാന് ബിന് അയ്യാഫ് രാജകുമാരന്, ചീഫ് ഓഫ് ജനറല് സ്റ്റാഫ് ലഫ്റ്റനന്റ് ജനറല് ഫയ്യാദ് അല് റുവൈലി, അസിസ്റ്റന്റ് മന്ത്രി (എക്സിക്യൂട്ടീവ് അഫയേഴ്സ്) ഡോ. ഖാലിദ് അല് ബയാരി, റോയല് സൗദി എയര്ഫോഴ്സ് കമാന്ഡര് ലഫ്റ്റനന്റ് ജനറല് തുര്ക്കി ബിന് ബന്ദര് ബിന് അബ്ദുല് അസീസ് എന്നിവര് ചേര്ന്ന് സ്വീകരിച്ചു.
തുടര്ന്ന് ദേശീയഗാനം ആലപിക്കുകയും, കിരീടാവകാശി സൗകര്യങ്ങള് ഔദ്യോഗികമായി ഉദ്ഘാടനം ചെയ്യുകയും ചെയ്തു. ചടങ്ങിന്റെ ഭാഗമായി പദ്ധതിയിലെ ഉദ്യോഗസ്ഥരോടൊപ്പം അദ്ദേഹം ഫോട്ടോയും എടുത്തു.
സാങ്കേതിക, അഡ്മിനിസ്ട്രേറ്റീവ്, റെസിഡന്ഷ്യല് ഏരിയകള് ഉള്പ്പെടെയുള്ള എയര് ബേസിലെ വിവിധ സൗകര്യങ്ങള് കിരീടാവകാശി പരിശോധിച്ചു. സൈനിക കെട്ടിടങ്ങള്ക്കായുള്ള ഏറ്റവും ഉയര്ന്ന അന്താരാഷ്ട്ര നിലവാരത്തിലാണ് ഈ ആധുനിക അടിസ്ഥാന സൗകര്യങ്ങള് നിര്മ്മിച്ചിരിക്കുന്നത്.
നിര്മ്മാണ ഘട്ടങ്ങള്, എന്ജിനീയറിങ്-സാങ്കേതിക വശങ്ങള്, സംയോജിത പരിശീലന സൗകര്യങ്ങള്, അനുബന്ധ സേവനങ്ങള് എന്നിവയെക്കുറിച്ച് പര്യടനത്തിനിടെ ഉദ്യോഗസ്ഥര് അദ്ദേഹത്തിന് വിശദീകരിച്ചു നല്കി. ആസൂത്രണം, കമാന്ഡ് ആന്ഡ് കണ്ട്രോള്, ലോജിസ്റ്റിക്സ്, സംയുക്ത നീക്കങ്ങള് എന്നിവയെ പിന്തുണയ്ക്കുന്നതിലൂടെ വ്യോമസേനയുടെയും മൊത്തം സായുധ സേനയുടെയും പോരാട്ടവീര്യം വര്ദ്ധിപ്പിക്കാനാണ് ഈ പുതിയ സൗകര്യങ്ങള് ലക്ഷ്യമിടുന്നത്.
.jpg)
Related News
