റിയാദ്: സൗദി അറേബ്യയില്‍ പ്രവാസികള്‍ക്കും വിദേശ കമ്പനികള്‍ക്കും വസ്തുവകകള്‍ സ്വന്തമാക്കാന്‍ അനുവാദം നല്‍കുന്ന ചരിത്രപരമായ നിയമം പ്രാബല്യത്തില്‍ വന്നു. സൗദി റിയല്‍ എസ്റ്റേറ്റ് ജനറല്‍ അതോറിറ്റിയാണ് 2026 ജനുവരി 22 വ്യാഴാഴ്ച മുതല്‍ പുതിയ നിയമം നടപ്പിലാക്കിയതായി പ്രഖ്യാപിച്ചത്. രാജ്യത്തെ റിയല്‍ എസ്റ്റേറ്റ് വിപണിയെ കൂടുതല്‍ സുതാര്യമാക്കാനും ആഗോള നിക്ഷേപം ആകര്‍ഷിക്കാനുമാണ് ഈ നീക്കം.


വിദേശികള്‍ക്ക് ഭൂമി വാങ്ങുന്നതിനായുള്ള അപേക്ഷകള്‍ 'സൗദി റിയല്‍ എസ്റ്റേറ്റ്' എന്ന ഔദ്യോഗിക ഡിജിറ്റല്‍ പോര്‍ട്ടല്‍ വഴി സമര്‍പ്പിക്കാവുന്നതാണ്. രാജ്യത്തിനകത്ത് താമസിക്കുന്ന പ്രവാസികള്‍ക്കും വിദേശത്തുള്ള നിക്ഷേപകര്‍ക്കും ഈ സേവനം ഉപയോഗപ്പെടുത്താം.

പ്രവാസികള്‍ക്ക് തങ്ങളുടെ ഇഖാമ ഉപയോഗിച്ച് പോര്‍ട്ടല്‍ വഴി നേരിട്ട് അപേക്ഷിക്കാം. നിയമപരമായ ആവശ്യകതകള്‍ പരിശോധിച്ച ശേഷം നടപടികള്‍ പൂര്‍ണ്ണമായും ഇലക്ട്രോണിക് സംവിധാനത്തിലൂടെ പൂര്‍ത്തിയാക്കും. രാജ്യത്തിന് പുറത്തുള്ളവര്‍ക്ക് സൗദി എംബസികള്‍ വഴി ഡിജിറ്റല്‍ ഐഡന്റിറ്റി കരസ്ഥമാക്കിയ ശേഷം പോര്‍ട്ടല്‍ വഴി അപേക്ഷ സമര്‍പ്പിക്കാം. സൗദിയില്‍ സാന്നിധ്യമില്ലാത്ത വിദേശ കമ്പനികള്‍ ആദ്യം നിക്ഷേപ മന്ത്രാലയത്തിന്റെ 'ഇന്‍വെസ്റ്റ് ഇന്‍ സൗദി അറേബ്യ' പ്ലാറ്റ്ഫോമില്‍ രജിസ്റ്റര്‍ ചെയ്ത് യൂണിഫൈഡ് നമ്പര്‍ നേടേണ്ടതുണ്ട്.

പുതിയ നിയമമനുസരിച്ച് റിയാദ്, ജിദ്ദ ഉള്‍പ്പെടെയുള്ള രാജ്യത്തെ വിവിധ ഭാഗങ്ങളില്‍ വിദേശികള്‍ക്ക് വസ്തുവകകള്‍ സ്വന്തമാക്കാം. എന്നാല്‍ മക്ക, മദീന എന്നീ പുണ്യനഗരങ്ങളില്‍ ഉടമസ്ഥാവകാശം മുസ്ലിംകള്‍ക്കും സൗദി കമ്പനികള്‍ക്കും മാത്രമായി പരിമിതപ്പെടുത്തിയിട്ടുണ്ട്. 2026-ന്റെ ആദ്യ പാദത്തില്‍ പുറത്തിറക്കുന്ന 'ഭൂമിശാസ്ത്ര മേഖല രേഖ' അനുസരിച്ചായിരിക്കും ഉടമസ്ഥാവകാശം അനുവദിക്കുന്ന സ്ഥലങ്ങള്‍ തീരുമാനിക്കുക.

സൗദി വിഷന്‍ 2030-ന്റെ ഭാഗമായി എണ്ണയിതര വരുമാനം വര്‍ദ്ധിപ്പിക്കുക എന്നതാണ് ഈ നിയമത്തിന്റെ പ്രധാന ലക്ഷ്യം. രാജ്യാന്തര ഡെവലപ്പര്‍മാരെയും വന്‍കിട കമ്പനികളെയും ആകര്‍ഷിക്കുന്നതിലൂടെ റസിഡന്‍ഷ്യല്‍, കൊമേഴ്സ്യല്‍, ടൂറിസം മേഖലകളില്‍ വലിയ വളര്‍ച്ചയാണ് പ്രതീക്ഷിക്കുന്നത്. കൂടാതെ, റിയല്‍ എസ്റ്റേറ്റ് രംഗത്ത് സ്വദേശികള്‍ക്ക് കൂടുതല്‍ തൊഴിലവസരങ്ങള്‍ സൃഷ്ടിക്കാനും ഇത് സഹായിക്കും.

കൂടുതല്‍ വിവരങ്ങള്‍ക്കും അപേക്ഷകള്‍ക്കുമായി www.rega.gov.sa എന്ന വെബ്‌സൈറ്റ് സന്ദര്‍ശിക്കുകയോ 920017183 എന്ന നമ്പറില്‍ ബന്ധപ്പെടുകയോ ചെയ്യാവുന്നതാണ്.