ടെഹ്റാന്/വാഷിംഗ്ടണ്: പശ്ചിമേഷ്യന് യുദ്ധം അതീവ ഗുരുതരമായ ഘട്ടത്തിലേക്ക്. അമേരിക്കയുടെ കരുത്തുറ്റ വിമാനവാഹിനിക്കപ്പലായ യുഎസ്എസ് എബ്രഹാം ലിങ്കണ് (USS Abraham Lincoln) നേരെ ഇറാന് നാല് ബാലിസ്റ്റിക് മിസൈലുകള് തൊടുത്തു. ഇറാന് പരമോന്നത നേതാവ് ആയത്തുള്ള ഖമേനിയുടെ വധത്തിന് പ്രതികാരമായാണ് ഈ പ്രത്യാക്രമണമെന്ന് ഇറാന്റെ റെവല്യൂഷണറി ഗാര്ഡ് (IRGC) പ്രഖ്യാപിച്ചു.
ഇറാന് തീരത്തിന് സമീപം വിന്യസിച്ചിരിക്കുന്ന അമേരിക്കയുടെ ഏക വിമാനവാഹിനിക്കപ്പലാണ് എബ്രഹാം ലിങ്കണ്. മിസൈല് ആക്രമണത്തില് കപ്പലിന് നാശനഷ്ടങ്ങള് സംഭവിച്ചിട്ടുണ്ടോ എന്ന കാര്യത്തില് വ്യക്തത വന്നിട്ടില്ല. നിലവിലെ സംഘര്ഷ സാഹചര്യത്തില് അമേരിക്കന് നാവികസേനയുടെ ഏറ്റവും പ്രധാനപ്പെട്ട യുദ്ധക്കപ്പലിനെ ലക്ഷ്യമിട്ടത് യുദ്ധം നേരിട്ടുള്ള ഏറ്റുമുട്ടലിലേക്ക് മാറിയതിന്റെ സൂചനയായാണ് വിലയിരുത്തപ്പെടുന്നത്.
'ഓപ്പറേഷന് എപിക് ഫ്യൂറി'യുടെ ഭാഗമായി നടന്ന ഏറ്റുമുട്ടലുകളില് മൂന്ന് അമേരിക്കന് സൈനികര് കൊല്ലപ്പെട്ടതായി യുഎസ് സെന്ട്രല് കമാന്ഡ് സ്ഥിരീകരിച്ചു. സംഘര്ഷം ആരംഭിച്ചതിന് ശേഷം അമേരിക്കന് പക്ഷത്തുണ്ടാകുന്ന ആദ്യത്തെ പ്രധാന സൈനിക ആള്നാശമാണിത്.
അതേസമയം, ഇറാന്റെ ജമാരന് ക്ലാസ് യുദ്ധക്കപ്പല് തകര്ത്തതായും അത് ചഹാ ബഹാര് തീരത്ത് കടലില് മുങ്ങിക്കൊണ്ടിരിക്കുകയാണെന്നും അമേരിക്കന് സൈന്യം സ്ഥിരീകരിച്ചു. കപ്പല് ഉപേക്ഷിച്ച് സൈനികര് രക്ഷപ്പെടണമെന്നും ആയുധം താഴെ വെച്ച് കീഴടങ്ങണമെന്നും പ്രസിഡന്റ് ട്രംപ് ഇറാന് സേനയ്ക്ക് കര്ശന നിര്ദ്ദേശം നല്കി.
കടലില് യുദ്ധക്കപ്പലുകള് ലക്ഷ്യമിട്ടുള്ള ആക്രമണം വര്ദ്ധിച്ചതോടെ അന്താരാഷ്ട്ര കപ്പല് ഗതാഗതം പൂര്ണ്ണമായും തടസ്സപ്പെട്ടു. ഹോര്മുസ് കടലിടുക്കിന് സമീപം യുദ്ധസമാനമായ സാഹചര്യം തുടരുന്നത് ആഗോള എണ്ണ വിപണിയെയും ഗുരുതരമായി ബാധിക്കുമെന്ന് ആശങ്കയുണ്ട്. ഇരുപക്ഷവും പ്രത്യാക്രമണങ്ങള് ശക്തമാക്കിയതോടെ പശ്ചിമേഷ്യ വലിയൊരു ദുരന്തത്തിന്റെ വക്കിലാണ്.
Related News
